Mancherial: మంచిర్యాల కలెక్టరేట్ ఎదుట మధ్యాహ్న భోజన కార్మికుల ధర్నా!

Mancherial: మధ్యాహ్న భోజన కార్మికుల సమస్యలను ప్రభుత్వం వెంటనే పరిష్కరించాలని డిమాండ్ చేస్తూ మంచిర్యాల జిల్లా కలెక్టరేట్ ఎదుట సీఐటీయూ ఆధ్వర్యంలో కార్మికులు ఆందోళన చేపట్టారు. ఎన్నికల సమయంలో ఇచ్చిన హామీ మేరకు నెలకు రూ.10 వేల వేతనం చెల్లించడంతో పాటు, పెండింగ్‌లో ఉన్న బిల్లులు, వేతనాలను తక్షణమే విడుదల చేయాలని డిమాండ్ చేశారు.

ఈ సందర్భంగా కార్మికులు మాట్లాడుతూ.. పాఠశాలల్లో విద్యార్థులకు మధ్యాహ్న భోజనం అందిస్తున్న కార్మికులు అనేక సమస్యలు ఎదుర్కొంటున్నారని ఆవేదన వ్యక్తం చేశారు. నిత్యావసర వస్తువుల ధరలు పెరిగిన నేపథ్యంలో విద్యార్థులకు అందించే భోజనానికి సంబంధించిన మెనూ ఛార్జీలను కూడా పెంచాలని కోరారు. ప్రతి పాఠశాలకు గ్యాస్ సిలిండర్లు అందించి, వంట నిర్వహణలో ఎదురవుతున్న ఇబ్బందులను తొలగించాలని ప్రభుత్వాన్ని విజ్ఞప్తి చేశారు.

మధ్యాహ్న భోజన పథకం నిర్వహణ బాధ్యతలను స్వచ్ఛంద సంస్థలకు అప్పగించవద్దని, ప్రస్తుతం పనిచేస్తున్న కార్మికుల ఉపాధికి భరోసా కల్పించాలని డిమాండ్ చేశారు. అలాగే ఎలాంటి షరతులు లేకుండా బ్యాంకుల ద్వారా రుణాలు అందించాలని కోరారు.

ప్రభుత్వం స్పందించి మధ్యాహ్న భోజన కార్మికులకు ఇచ్చిన హామీలను అమలు చేయాలని, పెండింగ్ బిల్లులు, వేతనాలు చెల్లించి తమ సమస్యలను పరిష్కరించాలని వారు డిమాండ్ చేశారు.