Mancherial: మంచిర్యాలలో క్రిటికల్ కేర్ ఆసుపత్రి పనులు వేగవంతం చేయాలి!

Mancherial: జిల్లాలో వైద్య సేవలను మరింత బలోపేతం చేసి ప్రజలకు మెరుగైన వైద్యం అందుబాటులోకి తీసుకువచ్చే లక్ష్యంతో చేపట్టిన ఆసుపత్రి నిర్మాణ పనులను త్వరితగతిన పూర్తి చేయాలని జిల్లా కలెక్టర్ కుమార్ దీపక్ అధికారులను ఆదేశించారు.

శనివారం మంచిర్యాల జిల్లా కేంద్రంలోని కాలేజ్ రోడ్డులో నిర్మాణంలో ఉన్న క్రిటికల్ కేర్ ఆసుపత్రిని కలెక్టర్ ఆకస్మికంగా సందర్శించారు. ఈ సందర్భంగా నిర్మాణ పనుల పురోగతిని పరిశీలించి, సంబంధిత అధికారుల నుంచి వివరాలు అడిగి తెలుసుకున్నారు. పనుల్లో జాప్యం జరగకుండా నిర్దేశిత గడువులోగా నిర్మాణాన్ని పూర్తి చేయాలని సూచించారు.

ఈ సందర్భంగా కలెక్టర్ మాట్లాడుతూ ప్రజలకు నాణ్యమైన వైద్య సేవలు అందించేందుకు ప్రభుత్వం ప్రత్యేక చర్యలు చేపడుతోందన్నారు. ఇందులో భాగంగా రూ.129.25 కోట్లతో ప్రభుత్వ ఆసుపత్రి, మరో రూ.23.75 కోట్లతో క్రిటికల్ కేర్ విభాగాన్ని ఏర్పాటు చేస్తున్నట్లు తెలిపారు. మొత్తం రూ.153 కోట్ల వ్యయంతో చేపడుతున్న ఈ నిర్మాణాలు పూర్తయితే జిల్లాలో అత్యవసర వైద్య సేవలు మరింత అందుబాటులోకి వస్తాయని పేర్కొన్నారు.

వైద్య రంగాన్ని బలోపేతం చేయడంతో పాటు ప్రజలకు వేగవంతమైన, మెరుగైన వైద్య సేవలు అందించడమే ప్రభుత్వ లక్ష్యమని కలెక్టర్ తెలిపారు. నిర్మాణ పనుల నాణ్యత విషయంలో రాజీ పడకుండా ఎప్పటికప్పుడు పర్యవేక్షించాలని అధికారులకు సూచించారు.