Asifabad: కొమురం భీం వర్ధంతి: 26న బడులకు స్థానిక సెలవు: కలెక్టర్ హరిత

ఆసిఫాబాద్: ఆదివాసీ వీరుడు కొమురం భీం 86వ వర్ధంతిని పురస్కరించుకుని ఈ నెల 26న (సోమవారం) కొమురం భీం జిల్లాలోని అన్ని ప్రభుత్వ, ప్రైవేట్ విద్యాసంస్థలకు స్థానిక సెలవు ప్రకటిస్తూ జిల్లా కలెక్టర్ కె. హరిత ఉత్తర్వులు జారీ చేశారు.

కొమురం భీం వర్ధంతి సందర్భంగా విద్యార్థులు, ప్రజలు ఆయన త్యాగాలను స్మరించుకునేందుకు వీలుగా ఈ నిర్ణయం తీసుకున్నారు. జిల్లాలోని ప్రభుత్వ, ప్రైవేట్ పాఠశాలలు, కళాశాలలకు ఈ సెలవు వర్తిస్తుందని ఉత్తర్వుల్లో పేర్కొన్నారు. అయితే ఆవాస పాఠశాలలకు మాత్రం ఈ సెలవు వర్తించదని స్పష్టం చేశారు.

ఈ నెల 26న ప్రకటించిన స్థానిక సెలవుకు బదులుగా నవంబర్ 14వ తేదీ రెండో శనివారం రోజున జిల్లాలోని ప్రభుత్వ, ప్రైవేట్ పాఠశాలలు, కళాశాలలు పనిచేయనున్నాయి. ఈ మేరకు సంబంధిత విద్యాశాఖ అధికారులు, విద్యాసంస్థలు అవసరమైన చర్యలు తీసుకోవాలని కలెక్టర్ ఆదేశించారు.