Mancherial: దీపావళి వేడుకల్లో అప్రమత్తతే ముఖ్యం!

Mancherial: దీపావళి పండుగను ఆనందోత్సాహాల మధ్య సురక్షితంగా జరుపుకోవాలని EMRI GHS–108 అత్యవసర సేవల సంస్థ ప్రజలకు సూచించింది.

బాణసంచా కాల్చే సమయంలో ఏమాత్రం నిర్లక్ష్యం వహించినా అగ్నిప్రమాదాలు, కాలిన గాయాలు, కంటి సమస్యలు వంటి ప్రమాదాలు సంభవించే అవకాశం ఉందని హెచ్చరించింది. ముఖ్యంగా చిన్నపిల్లలు, వృద్ధుల భద్రతపై ప్రత్యేక శ్రద్ధ తీసుకోవాలని విజ్ఞప్తి చేసింది.

గత గణాంకాల ప్రకారం.. 2025లో సాధారణ రోజుల్లో అగ్నిప్రమాదాల కారణంగా 1,766 మంది గాయపడగా, దీపావళి రోజున బాణసంచా ప్రమాదాల కారణంగా 1,699 మంది ప్రభావితమైనట్లు సంస్థ వెల్లడించింది. ఈ గణాంకాలు పండుగ సమయంలో తీసుకోవాల్సిన జాగ్రత్తల ఆవశ్యకతను తెలియజేస్తున్నాయని పేర్కొంది.

EMRI GHS స్టేట్ హెడ్ ఆఫ్ ఆపరేషన్స్ బి. సుధాకర్ మాట్లాడుతూ.. తెలంగాణ రాష్ట్రవ్యాప్తంగా ప్రతి మండలంలో అంబులెన్స్ సేవలు అందుబాటులో ఉన్నాయని తెలిపారు. 108 అత్యవసర సేవలు 24 గంటల పాటు పనిచేస్తాయని, అగ్నిప్రమాదాలు, కాలిన గాయాలు లేదా ఇతర అత్యవసర పరిస్థితులు ఎదురైతే వెంటనే 108కు సమాచారం అందించాలని సూచించారు.

బాణసంచా కాల్చేటప్పుడు జాగ్రత్తలు

బాణసంచాను ఇళ్లలో కాకుండా విశాలమైన బహిరంగ ప్రదేశాల్లో మాత్రమే కాల్చాలి. పిల్లలు పెద్దల పర్యవేక్షణలోనే టపాసులు కాల్చాలి. వదులుగా ఉండే దుస్తులకు బదులుగా కాటన్ దుస్తులు ధరించాలి. బాణసంచా కాల్చేటప్పుడు తగినంత దూరం పాటించాలి.

వాహనాలు, వృద్ధులు, మందులు నిల్వ ఉంచే ప్రాంతాలకు దూరంగా ఉండాలి. అవసరమైనప్పుడు కళ్లకు రక్షణగా గాగుల్స్ ధరించాలి. చేతిలో పట్టుకుని టపాసులు పేల్చకూడదు. సమీపంలో నీరు లేదా ఇసుక బకెట్ అందుబాటులో ఉంచుకోవాలి. పేలని బాణసంచాను తిరిగి వెలిగించే ప్రయత్నం చేయకూడదు.

కాలిన గాయాలైతే ఏం చేయాలి?

బాణసంచా ప్రమాదంలో కాలిన గాయాలు సంభవిస్తే వెంటనే 108కు కాల్ చేసి వైద్య సహాయం పొందాలి. గాయపడిన ప్రాంతాన్ని సాధారణ చల్లని నీటితో సుమారు 20 నిమిషాల పాటు చల్లబరచాలి. ఐస్ ఉపయోగించకూడదు. గాయాన్ని శుభ్రమైన మెత్తటి వస్త్రంతో లేదా స్టెరైల్ డ్రెస్సింగ్‌తో కప్పాలి.

టూత్‌పేస్ట్, ఇంకు, క్రీములు వంటి పదార్థాలను గాయాలపై పూయకూడదు. ఏర్పడిన బొబ్బలను పగలగొట్టకూడదు. చర్మానికి అంటుకున్న దుస్తులను బలవంతంగా తొలగించకూడదని సంస్థ సూచించింది.

చిన్నపాటి నిర్లక్ష్యం కూడా పెద్ద ప్రమాదానికి దారితీసే అవకాశం ఉందని, ప్రతి ఒక్కరూ బాధ్యతాయుతంగా వ్యవహరించి సురక్షిత వాతావరణంలో దీపావళి జరుపుకోవాలని EMRI GHS–108 అత్యవసర సేవల సంస్థ ప్రజలకు విజ్ఞప్తి చేసింది.