Bellampalli: ఘటనను పక్కదారి పట్టించే ప్రయత్నం నిష్పక్షపాత విచారణకు డిమాండ్!
Bellampalli: మంచిర్యాల జిల్లా బెల్లంపల్లి సింగరేణి ఏరియా ఆసుపత్రిలో మహిళా వైద్యురాలి పట్ల అసభ్య ప్రవర్తన ఘటనపై డిజిటల్ ఆధారాలతో సమగ్ర, నిష్పక్షపాత విచారణ జరపాలని డిమాండ్.
Bellampalli: ఘటనను పక్కదారి పట్టించే ప్రయత్నం నిష్పక్షపాత విచారణకు డిమాండ్!
Bellampalli: బెల్లంపల్లి సింగరేణి ఏరియా ఆసుపత్రిలో మహిళా వైద్యురాలి పట్ల అసభ్య ప్రవర్తన జరిగిందన్న ఆరోపణలపై హెచ్‌ఎంటీవీ వార్తను ప్రచురించింది. మహిళలకు అన్యాయం జరగకూడదనే బాధ్యతతో, బాధితురాలికి న్యాయం జరగాలనే ఉద్దేశంతో ఈ ఘటనను వెలుగులోకి తీసుకొచ్చాం. అయితే, ఘటనపై వాస్తవాలు వెలికితీయాల్సింది పోయి, కొందరు వ్యవహారాన్ని పక్కదారి పట్టించే ప్రయత్నం చేస్తున్నారన్న అభ్యంతరాలు వ్యక్తమవుతున్నాయి.
మహిళా అధికారికి అండగా నిలవాల్సింది పోయి.. ఆరోపణలు ఎదుర్కొంటున్న వ్యక్తికి మద్దతా?
మహిళా వైద్యురాలికి అన్యాయం జరిగిందనే ఆరోపణలు వచ్చినప్పుడు, ఆమెకు అండగా నిలిచి వాస్తవాలను తెలుసుకోవాల్సిన బాధ్యత అధికారులపై ఉంది. కానీ, ఈ వ్యవహారంలో తప్పు చేసినట్లు ఆరోపణలు ఎదుర్కొంటున్న వ్యక్తికి కొందరు మద్దతుగా నిలుస్తున్నారన్న విమర్శలు వినిపిస్తున్నాయి.
యూనియన్‌కు చెందిన ఓ నాయకుడు బెదిరింపులకు పాల్పడుతూ ఘటనను పక్కదారి పట్టించే ప్రయత్నం చేస్తున్నారన్న ఆరోపణలు కూడా ఉన్నాయి. ఈ ఆరోపణలపై సంబంధిత అధికారులు నిష్పక్షపాతంగా విచారణ జరిపి నిజానిజాలను తేల్చాల్సిన అవసరం ఉంది.
సింగరేణి ఐటీ విభాగం ఉందిగా.. డిజిటల్ ఆధారాలు సేకరించండి!
ఈ ఘటనకు సంబంధించి అనుమానాలు, ఆరోపణలకు తెరదించాలంటే మాటలతో సరిపెట్టకుండా శాస్త్రీయ ఆధారాలతో విచారణ జరపాలి. సింగరేణి సంస్థలో ఉన్న ఐటీ విభాగం సహకారంతో అందుబాటులో ఉన్న సీసీటీవీ ఫుటేజీ, విధుల రికార్డులు, సంబంధిత డిజిటల్ సమాచారాన్ని నిబంధనల ప్రకారం సేకరించి పరిశీలించాలి. ఘటన జరిగిన సమయం, అక్కడ ఉన్న వ్యక్తులు, సంబంధిత పరిణామాలపై ఆధారాలతో స్పష్టత తీసుకురావాలి.
అవసరమైతే సింగరేణి విజిలెన్స్‌ విభాగం ద్వారా సమగ్ర దర్యాప్తు చేపట్టాలి. ఎవరు తప్పు చేసినా, ఎంతటి వారైనా, ఆధారాల ప్రకారం బాధ్యత వహించేలా చర్యలు తీసుకోవాలి. విచారణ నిష్పక్షపాతంగా జరిగితేనే అసలు వాస్తవాలు వెలుగులోకి వస్తాయి.
విచారణకు వచ్చిన అధికారులపై ఆగ్రహం ఎందుకు?
ఈ వ్యవహారంపై విచారణకు వచ్చిన అధికారుల పట్ల కొందరు గట్టిగా మాట్లాడటం, ఆగ్రహం వ్యక్తం చేయడం ఎందుకన్న ప్రశ్నలు కూడా తలెత్తుతున్నాయి. విచారణలో సహకరించాల్సిన సమయంలో అధికారులపై ఒత్తిడి తీసుకురావడం లేదా వారి విధులకు ఆటంకం కలిగించడం సమంజసం కాదు. అయితే, అక్కడ ఏం జరిగింది? ఎవరు ఎలా వ్యవహరించారు? అన్నది కూడా సంబంధిత ఆధారాలు, ప్రత్యక్ష సాక్షుల వాంగ్మూలాల ఆధారంగా నిర్ధారించాల్సి ఉంది.
ఇద్దరి మధ్య వ్యవహారమని చెప్పి తేలిగ్గా తీసుకోవద్దు!
ఈ ఘటనను ఇద్దరి మధ్య జరిగిన వ్యక్తిగత వ్యవహారంగా మాత్రమే పరిగణించి పక్కన పెట్టడం సరికాదు. మహిళా ఉద్యోగి భద్రత, కార్యాలయంలో గౌరవప్రదమైన వాతావరణం, ఉద్యోగుల బాధ్యత వంటి అంశాలు ఇందులో ముడిపడి ఉన్నాయి. అదే సమయంలో, ఆరోపణలు ఎదుర్కొంటున్న వ్యక్తి తప్పు చేసినట్లు విచారణలో నిర్ధారణ కాకముందే దోషిగా చిత్రీకరించడం కూడా సరికాదు.
మహిళా వైద్యురాలికి న్యాయం జరగాలి!.
బెల్లంపల్లి సింగరేణి ఏరియా ఆసుపత్రి ఘటనపై యాజమాన్యం స్పష్టమైన ప్రకటన చేయాలి. బాధితురాలి వాంగ్మూలాన్ని గోప్యతతో నమోదు చేసి, అవసరమైన రక్షణ కల్పించాలి. అందుబాటులో ఉన్న డిజిటల్ ఆధారాలను భద్రపరిచి, విజిలెన్స్‌ లేదా సంబంధిత అధికారుల ద్వారా నిష్పక్షపాత విచారణ జరపాలి. ఆరోపణలు నిజమని తేలితే నిబంధనల ప్రకారం చర్యలు తీసుకోవాలి.
మహిళలకు అన్యాయం జరిగినప్పుడు వారి పక్షాన నిలవడం మీడియా బాధ్యత. ఆరోపణలు ఎదుర్కొంటున్న వారిని ముందుగానే దోషులుగా ప్రకటించడం కాదు.. నిజానిజాలను వెలికితీసి బాధితులకు న్యాయం జరిగేలా చూడటమే లక్ష్యం. ఈ ఘటనలోనూ అదే జరగాలి. బెదిరింపులతోనో, ఒత్తిళ్లతోనో వాస్తవాలు మరుగున పడకూడదు.. నిష్పక్షపాత విచారణతో నిజం బయటకు రావాలి!
