Asifabad: ఏఆర్‌ హెడ్‌క్వార్టర్స్‌లో ఘనంగా పోలీసు అమరవీరుల దినోత్సవం!

కొమురం భీం ఆసిఫాబాద్ జిల్లా కేంద్రంలోని ఏఆర్ హెడ్‌క్వార్టర్స్‌లో పోలీసు అమరవీరుల దినోత్సవాన్ని ఘనంగా నిర్వహించారు. ఈ కార్యక్రమంలో జిల్లా ఎస్పీ నితిక పంత్ పాల్గొని విధి నిర్వహణలో ప్రాణాలర్పించిన పోలీసు అమరవీరులకు ఘనంగా నివాళులర్పించారు. అనంతరం అమరవీరుల కుటుంబ సభ్యులను ఆప్యాయంగా పలకరించి, వారి యోగక్షేమాలను అడిగి తెలుసుకున్నారు.

ఈ సందర్భంగా ఎస్పీ నితిక పంత్ మాట్లాడుతూ.. ప్రజల రక్షణ, సమాజంలో శాంతిభద్రతల పరిరక్షణ కోసం తమ ప్రాణాలను సైతం త్యాగం చేసిన పోలీసుల సేవలు వెలకట్టలేనివని అన్నారు. విధి నిర్వహణలో అమరులైన పోలీసుల త్యాగాలను ప్రతి ఒక్కరూ ఎప్పటికీ గుర్తుంచుకోవాలని పేర్కొన్నారు.

తమ కుటుంబాలను, వ్యక్తిగత జీవితాలను పక్కనపెట్టి ప్రజల భద్రతే లక్ష్యంగా పనిచేసిన పోలీసు అమరవీరుల అంకితభావం స్ఫూర్తిదాయకమని తెలిపారు. సమాజంలో శాంతిభద్రతలను కాపాడేందుకు వారు చేసిన త్యాగాలను స్మరించుకోవడం ప్రతి ఒక్కరి బాధ్యత అని అన్నారు. ప్రజల భద్రత కోసం జీవితాలను అంకితం చేసిన పోలీసు అమరవీరులకు సమాజం ఎప్పటికీ రుణపడి ఉంటుందని ఎస్పీ నితిక పంత్ పేర్కొన్నారు.