Achampet: మోటారు ఆన్ చేశాడని తమ్ముడిని కొట్టి చంపిన అన్న!

అచ్చంపేట: నాగర్ కర్నూల్ జిల్లా అచ్చంపేట మండలం బక్కలింగయ్యపల్లిలో శుక్రవారం అన్నదమ్ముల మధ్య చిన్న ఘర్షణ విషాదాంతంగా మారింది. పొలం వద్ద మోటారు ఆన్ చేశాడనే కోపంతో అన్న తమ్ముడిని కర్రతో కొట్టి హత్య చేసిన ఘటన కలకలం రేపింది.

ఘటన వివరాలు:

బక్కలింగయ్యపల్లికి చెందిన కేతావత్ బావుసింగ్, అతని తమ్ముడు కేతావత్ మోహన్ (38) మధ్య పొలం నీటి విషయంలో గొడవ జరిగినట్లు తెలుస్తోంది. తమ్ముడు మోహన్ పొలం వద్ద మోటారు ఆన్ చేయడాన్ని అన్న బావుసింగ్ అభ్యంతరం వ్యక్తం చేశాడు. ఈ క్రమంలో మాటామాటా పెరిగి ఘర్షణకు దారితీసింది.

ఆగ్రహంతో ఊగిపోయిన అన్న బావుసింగ్ కర్రతో తమ్ముడు మోహన్ తలపై బలంగా కొట్టినట్లు సమాచారం. తీవ్ర గాయాలతో మోహన్ అక్కడికక్కడే కుప్పకూలి మృతి చెందాడు.

సమాచారం అందుకున్న అచ్చంపేట పోలీసులు ఘటనా స్థలానికి చేరుకుని మృతదేహాన్ని పోస్టుమార్టం నిమిత్తం ప్రభుత్వ ఆసుపత్రికి తరలించారు. నిందితుడు బావుసింగ్ పరారీలో ఉన్నట్లు తెలుస్తోంది. ఈ ఘటనపై కేసు నమోదు చేసి దర్యాప్తు చేపట్టినట్లు పోలీసులు తెలిపారు.