Morning Heart Attack Risk: ఉదయం వేళల్లోనే ఎక్కువగా గుండెపోటు ఎందుకు వస్తుంది? అసలు కారణాలు ఇవే!

Morning Heart Attack Risk: సాధారణంగా ఉదయం 6 గంటల నుంచి మధ్యాహ్నం 12 గంటల మధ్య గుండెపోటు వచ్చే అవకాశాలు ఎక్కువగా ఉంటాయని వైద్య నిపుణులు చెబుతున్నారు. దీనికి కేవలం జీవనశైలి మాత్రమే కాదు.. మన శరీరంలో సహజంగా జరిగే మార్పులు కూడా కారణమవుతాయని మీకు తెలుసా?

ఉదయం వేళల్లో గుండెపోటు ముప్పు ఎందుకు ఎక్కువ?

మన శరీరం ఒక నిర్దిష్ట జీవ గడియారం (సర్కేడియన్ రిథమ్) ప్రకారం పనిచేస్తుంది. ఇది నిద్ర, మెలకువ, హార్మోన్ల స్థాయులు, రక్తపోటు వంటి అంశాలను నియంత్రిస్తుంది. ఉదయం నిద్ర నుంచి మేల్కొన్న తర్వాత శరీరం విశ్రాంతి స్థితి నుంచి చురుకైన స్థితిలోకి మారుతుంది. ఈ సమయంలో కార్టిసాల్, అడ్రినలిన్ వంటి హార్మోన్ల విడుదల పెరుగుతుంది. ఫలితంగా గుండె వేగం పెరగడంతో పాటు రక్తపోటు కూడా ఒక్కసారిగా ఎక్కువవుతుంది. రక్తనాళాలు కొంత సంకోచిస్తాయి. ఇప్పటికే గుండె రక్తనాళాలు సన్నబడిన వారికి ఈ మార్పులు అదనపు ఒత్తిడిని కలిగించి గుండెపోటు ముప్పును పెంచవచ్చు.

గుండె రక్తనాళాల్లో అడ్డంకులు ఎలా ఏర్పడతాయి?

వైద్య నిపుణుల అభిప్రాయం ప్రకారం.. ఉదయం 6 గంటల నుంచి మధ్యాహ్నం 12 గంటల మధ్య గుండెపోటు కేసులు ఎక్కువగా నమోదవుతుంటాయి. ఈ సమయంలో రక్తపోటు, గుండె వేగం పెరగడంతో పాటు రక్తం గడ్డకట్టే అవకాశం కూడా ఎక్కువవుతుంది. ఇప్పటికే గుండెకు రక్తాన్ని సరఫరా చేసే రక్తనాళాల్లో కొవ్వు పేరుకుపోయి ఉంటే సమస్య మరింత తీవ్రమవుతుంది.

రక్తనాళాల్లో పేరుకుపోయిన కొవ్వు పొరను ప్లాక్ అంటారు. ఉదయం రక్తపోటు పెరిగినప్పుడు ఈ ప్లాక్ పగిలిపోయే ప్రమాదం ఉంటుంది. అలా జరిగినప్పుడు శరీరం దాన్ని గాయం లాగా గుర్తించి అక్కడ రక్తం గడ్డకట్టేలా చేస్తుంది. ఈ గడ్డ రక్తప్రసరణకు అడ్డుపడితే గుండెకు రక్తం, ఆక్సిజన్ అందక గుండెపోటు వస్తుంది.

మధ్యాహ్నం, సాయంత్రం వేళల్లో ప్రమాదం తగ్గుతుందా?

ఉదయం సమయంతో పోలిస్తే రోజులో సమయం గడిచేకొద్దీ శరీరంలోని హార్మోన్ల స్థాయులు సాధారణ స్థితికి చేరుకుంటాయి. రక్తపోటు కూడా స్థిరంగా మారుతుంది. అందువల్ల ఉదయంతో పోలిస్తే కొన్ని సందర్భాల్లో సాయంత్రం గుండెపోటు ముప్పు తక్కువగా ఉండవచ్చు. అయితే పూర్తిగా ప్రమాదం లేదని భావించకూడదు.

సాయంత్రం వేళల్లో అధికంగా ఆహారం తీసుకోవడం, మద్యం సేవించడం, మానసిక ఒత్తిడి, ఒక్కసారిగా శరీరంపై ఎక్కువ శ్రమ పడటం వంటి అంశాలు గుండెపై ప్రభావం చూపుతాయి. ముఖ్యంగా రక్తనాళాల్లో ఇప్పటికే అడ్డంకులు ఉన్నవారు ఎప్పుడైనా గుండెపోటుకు గురయ్యే అవకాశం ఉంటుంది.

గుండెపోటు ముప్పు తగ్గించుకోవాలంటే ఏం చేయాలి?

మన జీవనశైలి కూడా గుండె ఆరోగ్యంపై ప్రభావం చూపుతుంది. సరైన నిద్ర లేకపోవడం, రాత్రి ఆలస్యంగా భోజనం చేయడం, నిరంతర మానసిక ఒత్తిడి వంటివి శరీర సహజ జీవ గడియారాన్ని దెబ్బతీస్తాయి. అందుకే కొన్ని అలవాట్లను పాటించడం మంచిది.

ప్రతిరోజూ ఒకే సమయానికి నిద్రపోవడం, మేల్కొనడం అలవాటు చేసుకోవాలి.

రాత్రి భోజనం తేలికగా, త్వరగా ముగించాలి.

ఉదయం నిద్ర లేవగానే కఠినమైన వ్యాయామాలు చేయకుండా నెమ్మదిగా రోజును ప్రారంభించాలి.

రక్తపోటు, షుగర్, కొలెస్ట్రాల్ స్థాయులను క్రమం తప్పకుండా పరీక్షించుకోవాలి.

రోజూ తగినంత శారీరక శ్రమ చేయడంతో పాటు ఒత్తిడిని తగ్గించుకోవాలి.

ఛాతీలో నొప్పి లేదా బిగుతు, శ్వాస తీసుకోవడంలో ఇబ్బంది, చల్లటి చెమటలు, అకస్మాత్తుగా తల తిరగడం వంటి లక్షణాలు కనిపిస్తే నిర్లక్ష్యం చేయకూడదు. వెంటనే వైద్య సహాయం తీసుకోవాలి. గుండెపోటు ఏ సమయంలోనైనా రావచ్చు. ఉదయం వేళల్లో ముప్పు ఎక్కువగా ఉంటుందనే కారణంతో మిగతా సమయాల్లో అజాగ్రత్తగా ఉండకూడదు.

గమనిక: ఇది సాధారణ ఆరోగ్య సమాచారం మాత్రమే. వ్యక్తిగత వైద్య సలహాకు ప్రత్యామ్నాయం కాదని గుర్తించాలి.