తాతల కాలం నాటి ఈ పచ్చడి ఒక్కసారి టేస్ట్ చేయండి.. ఒంట్లో రక్తం టన్నుల కొద్దీ పెరగాల్సిందే..!

Chinta Chiguru Pachadi Recipe: నోరూరించే రుచి, అంతకుమించిన ఆరోగ్యం.. పల్లెటూరి వంటల ప్రత్యేకత ఇదే. ప్రస్తుతం మార్కెట్లో కిలో ఐదు వందల రూపాయలు పలుకుతూ చికెన్, మటన్ ధరలతో పోటీ పడుతున్న 'చింతచిగురు'తో నానమ్మల కాలం నాటి పద్ధతిలో పుల్లపుల్లగా, కారంగా పచ్చడి చేసుకుంటే ఆ రుచే వేరు. విటమిన్ సి, ఐరన్ సమృద్ధిగా ఉండే ఈ పచ్చడి ఆరోగ్యానికి ఎంతో మేలు చేస్తుంది.

ఆకాశాన్ని తాకుతున్న ధర.. అయినా తగ్గని క్రేజ్!

ఒకప్పుడు పల్లెటూళ్లలో చెట్ల వెంట ఉచితంగా దొరికే చింతచిగురుకు ఇప్పుడు నగరాల్లో విపరీతమైన గిరాకీ పెరిగింది. దీనిలోని అద్భుతమైన ఆరోగ్య ప్రయోజనాల వల్ల మార్కెట్లో కిలో ధర ఏకంగా రూ. 400 నుంచి రూ. 500 వరకు పలుకుతోంది. చింతచిగురుతో పప్పు, కూర, పులుసు చేయడం మనకు తెలిసిందే. అయితే ఆంధ్రా స్టైల్లో పచ్చిమిర్చి, ఎండుమిరపకాయలు వేసి నూరిన చింతచిగురు పచ్చడి తింటే ఆ మజానే వేరు. వేడివేడి అన్నంలో కాస్త నెయ్యి వేసుకుని ఈ పచ్చడి కలుపుకుని తింటుంటే.. ఎన్ని ముద్దలు తింటున్నామో కూడా తెలియదు.

నోరూరించే పచ్చడికి కావలసిన పదార్థాలు.. అచ్చమైన పల్లెటూరి రుచిని ఇంట్లోనే ఆస్వాదించడానికి కావలసిన వస్తువులు:

శుభ్రం చేసిన చింతచిగురు – ఒక పెద్ద కప్పు (లేదా రెండు కప్పులు)

ఎండుమిరపకాయలు – 10 నుండి 15 (తాలింపుతో కలిపి)

పచ్చిమిరపకాయలు – 100 గ్రాములు

మినప్పప్పు – అర టీస్పూన్

జీలకర్ర – అర టీస్పూన్

ఆవాలు – అర టీస్పూన్

వెల్లుల్లి రెబ్బలు – 10 సిబ్బలు

కరివేపాకు – రెండు రెమ్మలు

వంట నూనె – పచ్చడికి సరిపడా

ఉప్పు – రుచికి తగినంత

నానమ్మల కాలం నాటి తయారీ విధానం..

మొదటి విడత (చింతచిగురు వేయించడం): ముందుగా చింతచిగురును తీసుకొని నలకలు లేకుండా శుభ్రంగా కడిగి, తడి లేకుండా ఆరబెట్టుకోవాలి. ఆ తర్వాత ఒక బాణలిలో కొద్దిగా నూనె వేడి చేసి, ఎండుమిరపకాయలు, ఆవాలు, జీలకర్ర వేసి దోరగా వేయించి పక్కన పెట్టుకోవాలి. ఇప్పుడు అదే బాణలిలో ఆరబెట్టుకున్న చింతచిగురును వేసి, పచ్చివాసన పోయేంత వరకు మంటను తక్కువలో ఉంచి బాగా వేయించుకోవాలి.

రెండో విడత (రుబ్బే పద్ధతి): మీకు వీలైతే రోట్లో, లేదంటే మిక్సీ జార్‌లో వంద గ్రాముల పచ్చిమిరపకాయలు, నాలుగు ఎండుమిరపకాయలు, వెల్లుల్లి రెబ్బలు, రుచికి సరిపడా ఉప్పు వేసి మొదటగా కొద్దిగా కచ్చాపచ్చాగా నూరుకోవాలి. ఆ తర్వాత అందులోనే వేయించి పెట్టుకున్న చింతచిగురును వేసి, అవసరమైతే కొన్ని నీళ్లు చల్లుకుంటూ మెత్తటి పచ్చడిలా చేసుకోవాలి.

మూడో విడత (కమ్మని తాలింపు): పచ్చడి మరింత రుచిగా మారడానికి చివర్లో తాలింపు పెట్టడం చాలా ముఖ్యం. బాణలిలో నూనె వేసి ఆవాలు, కరివేపాకు, ఎండుమిరపకాయలు వేసి వేయించి, ఆ పోపును సిద్ధమైన పచ్చడిలో కలుపుకుంటే కమ్మని సువాసనలతో చింతచిగురు పచ్చడి సిద్ధమవుతుంది.

రక్తహీనతకు చెక్.. ఇమ్యూనిటీకి బూస్టర్!

ఈ పచ్చడి కేవలం నాలుకకు రుచిని ఇవ్వడమే కాదు, శరీరానికి అమృతంలా పనిచేస్తుంది. చింతచిగురులో విటమిన్ సి అత్యధికంగా ఉంటుంది. ఇది శరీరంలో రోగనిరోధక శక్తిని (ఇమ్యూనిటీ పవర్) అద్భుతంగా పెంచుతుంది. అన్నింటికంటే ముఖ్యంగా, ఇందులో ఉండే ఐరన్ కంటెంట్ వల్ల రక్తహీనత (ఎనీమియా) సమస్యతో బాధపడేవారికి ఇది ఒక గొప్ప ఔషధం. దీన్ని తరచూ డైట్‌లో చేర్చుకోవడం వల్ల రక్తంలో హిమోగ్లోబిన్ శాతాన్ని పెంచుకోవచ్చు.

వారానికి ఒక్కసారైనా ఇలాంటి సాంప్రదాయ వంటకాలను తింటే నోటికి హాయిగా ఉండటమే కాకుండా ఎలాంటి అనారోగ్య సమస్యలు దరిచేరవు. నాన్‌వెజ్ కూరలు కూడా ఈ రుచి ముందు సరిపోవంటే నమ్మండి. కాబట్టి, ఈ సారి మార్కెట్‌కు వెళ్ళినప్పుడు ధర కొంచెం ఎక్కువైనా సరే, కాస్త చింతచిగురు తెచ్చి ఈ అద్భుతమైన పచ్చడిని ట్రై చేయండి!