Nutrition Food: ప్రోటీన్ మాత్రమే కాదు ఫైబర్ కూడా చాలా ముఖ్యం.. ఈ ఆహారాలతో రెండూ పొందండి

Nutrition Food: బాడీ ఫిట్‌నెస్, కండరాల బలం కోసం చాలామంది కేవలం ప్రోటీన్ అందించే ఆహారాల మీదే ఎక్కువగా దృష్టి పెడుతుంటారు. పన్నీర్, గుడ్లు వంటి వాటిని ఆహారంలో విరివిగా తీసుకుంటారు. అయితే ప్రోటీన్‌తో పాటు శరీరానికి ఫైబర్ కూడా సమానంగా అవసరమనే విషయాన్ని చాలామంది మర్చిపోతుంటారు. ప్రోటీన్ మన శరీర కండరాలను దృఢంగా మార్చడానికి సహాయపడితే, ఫైబర్ మాత్రం జీర్ణక్రియ సజావుగా సాగేలా చేసి తీసుకున్న ఆహారం తేలికగా అరిగేలా చేస్తుంది. అందువల్ల కేవలం ఒకదానిపైనే కాకుండా ఈ రెండూ లభించే సమతుల్య ఆహారాన్ని తీసుకోవాలని ఆరోగ్య నిపుణులు సూచిస్తున్నారు.

పప్పుధాన్యాలు, సోయాబీన్‌తో అద్భుతమైన ప్రయోజనాలు

భారతీయ వంటకాల్లో పప్పుధాన్యాలకు ఎంతో ప్రాధాన్యత ఉంది. ఒక కప్పు ఉడికించిన పప్పులో గుడ్ల కంటే అధికంగా ప్రోటీన్ అలాగే ఫైబర్ లభిస్తాయి. దీనిని సూప్‌లు లేదా సలాడ్‌లతో కలిపి తీసుకోవడం ద్వారా ఆరోగ్యం మరింత మెరుగవుతుంది. అలాగే పచ్చి సోయాబీన్ గింజలు శరీరానికి కావలసిన పోషకాలను ఇస్తాయి. గోధుమ రోటితో పాటు ఒక కప్పు సోయాబీన్ కూర తింటే కావాల్సినంత శక్తి లభిస్తుంది. ఇవి కండరాల నిర్మాణానికి, జీర్ణవ్యవస్థ పనితీరుకు ఎంతగానో సహకరిస్తాయి.

శనగలు, క్వినోవా, ఓట్స్ అందించే పోషకాలు

తెల్ల శనగలు లేదా నల్ల శనగలు శరీరానికి అద్భుతమైన పోషకాహార వనరుగా పనిచేస్తాయి. రాత్రి సమయంలో నానబెట్టిన శనగలను ఉదయం పూట సలాడ్ రూపంలో తీసుకుంటే అద్భుతమైన ఫలితాలు ఉంటాయి. వీటితో పాటు క్వినోవా గింజలు కూడా శరీరానికి మేలు చేస్తాయి. అన్నం బదులుగా క్వినోవాతో చేసిన వంటకాలు తినడం ద్వారా శరీరానికి సరిపడా ప్రోటీన్, ఫైబర్ అందుతాయి. ఓట్స్‌లో కూడా పీచు పదార్థం పుష్కలంగా ఉంటుంది. రాత్రిపూట నానబెట్టిన ఓట్స్‌లో వివిధ రకాల గింజలను (సీడ్స్) కలుపుకుని ఉదయం అల్పాహారంగా తీసుకుంటే రోజంతా ఉత్సాహంగా ఉండవచ్చు.