Pomegranate: చిన్న చిన్న గింజలే అనుకోకండి.. గుండెను కాపాడడంలో ఈ పండు సూపర్‌హీరో

Pomegranate: మన ఆరోగ్యాన్ని కాపాడుకోవడంలో పండ్లు కీలకమైన పాత్ర పోషిస్తాయనే విషయం అందరికీ తెలిసిందే. ప్రతి పండుకు దానికంటూ ప్రత్యేకమైన పోషక విలువలు ఉంటాయి. అందులోనూ దానిమ్మ పండును ఆరోగ్యానికి ఎంతో ప్రయోజనకరమైనదిగా భావిస్తారు. అయితే తాజాగా దానిమ్మ పండుకు సంబంధించి ఒక ఆసక్తికరమైన పరిశోధన వెలుగులోకి వచ్చింది. ఈ పండులో ఉండే ప్రత్యేకమైన గుణాలు గుండె జబ్బుల చికిత్సకు సరికొత్త మార్గాన్ని చూపుతాయని శాస్త్రవేత్తలు నిరూపించారు. దీని ద్వారా హార్ట్ పనితీరులో ఏకంగా 80 శాతం వరకు మెరుగుదల సాధ్యమని పరిశోధనలు స్పష్టం చేస్తున్నాయి.

యునైటెడ్ కింగ్‌డమ్‌లోని ప్రఖ్యాత కింగ్స్ కాలేజ్ లండన్ శాస్త్రవేత్తలు ఈ పరిశోధనను నిర్వహించారు. గుండె పనితీరుకు సంబంధించిన ఒక ప్రత్యేకమైన సమస్యను వారు తమ అధ్యయనంలో కేంద్రంగా ఎంచుకున్నారు. గుండె రక్తాన్ని సాధారణంగానే పంప్ చేసినప్పటికీ, కొట్టుకున్న తర్వాత సరైన రీతిలో రిలాక్స్ (సడలడం) కాలేకపోవడాన్ని వారు పరిశీలించారు. దానిమ్మ, అక్రోట్లు అలాగే కొన్ని రకాల బెర్రీ పండ్లను తీసుకున్నప్పుడు శరీరంలో యురోలిథిన్ ఏ అనే ప్రత్యేక పదార్థం తయారవుతుంది. ఈ పదార్థం గుండె కండరాల పనితీరును అద్భుతంగా మెరుగుపరచడంలో కీలక పాత్ర పోషిస్తుందని శాస్త్రవేత్తలు గుర్తించారు.

గుండె కండరాలపై దాని ప్రభావం ఎలా ఉంటుంది?

మన గుండె నిరంతరం కొట్టుకుంటూనే ఉంటుంది. ప్రతి స్పందన తర్వాత గుండె కండరాలు కొద్దిసేపు తేలికపడితేనే వాటిలోకి తిరిగి రక్తం నిండుతుంది. కానీ కొన్ని రకాల అనారోగ్య సమస్యల వల్ల గుండె కండరాలు గట్టిపడిపోయి సరిగ్గా సాగలేవు. దీనివల్ల శరీరానికి తగినంత రక్తం అందక త్వరగా ఆయాసం రావడం, అలసట కలుగుతుంటాయి. ఈ సమస్యను నివారించడంలో యూరోలిథిన్ ఏ అద్భుతంగా పనిచేస్తుంది. ఇది గుండె రక్తనాళాల్లో ఉండే ఒక ప్రత్యేక ప్రోటీన్‌ను ఉత్తేజితం చేసి, కండరాలు సులభంగా సడలడానికి సహాయపడుతుంది.

జంతువులపై చేసిన ప్రయోగంలో అద్భుత ఫలితాలు

శాస్త్రవేత్తలు ఈ పదార్థాన్ని జంతువులపై ప్రయోగించి పరిశీలించారు. ఈ ప్రయోగంలో గుండె పనితీరుకు సంబంధించిన కొలతలలో ఏకంగా 80 శాతం వరకు మెరుగుదల కనిపించింది. అంతేకాకుండా గుండె కండరాలలో ఏర్పడే అనవసరమైన మచ్చలు లేదా నష్టాలు కూడా చాలా వరకు తగ్గాయి. కేవలం జంతువులపైనే కాకుండా, ప్రయోగశాలలో మానవ కణాల సహాయంతో తయారుచేసిన గుండె కణజాలంపై కూడా దీనిని పరీక్షించి సానుకూల ఫలితాలను సాధించారు.

ఇది కేవలం ఒక ప్రారంభ అడుగు మాత్రమే

ఈ పరిశోధన ఫలితాలు వైద్య రంగంలో ఎంతో ఉత్సాహాన్ని ఇచ్చినప్పటికీ, కేవలం దానిమ్మ పండ్లు తింటేనే గుండె జబ్బులన్నీ పూర్తిగా నయమవుతాయని దీని అర్థం కాదు. ప్రస్తుతం ఈ ప్రయోగాలు ప్రాథమిక దశలోనే ఉన్నాయి. మానవులపై పెద్ద ఎత్తున క్లినికల్ ట్రయల్స్ నిర్వహించిన తర్వాతే దీనికి సంబంధించిన పూర్తి స్పష్టత రానుంది. ఏదేమైనప్పటికీ ప్రకృతి సిద్ధంగా లభించే పండ్లు మన శరీరానికి, గుండె ఆరోగ్యానికి ఎంతో మేలు చేస్తాయనడంలో ఎలాంటి సందేహం లేదు.