Covid Variant: మరోసారి ప్రపంచాన్ని వణికిస్తున్న కొత్త వైరస్.. భారత్‌కు వస్తోందా?

Covid Variant: ప్రపంచాన్ని ఒక ఊపు ఊపిన కరోనా వైరస్ మహమ్మారి మళ్లీ వార్తల్లో నిలిచింది. ఇప్పుడు PJ.2.1 అనే సరికొత్త వేరియంట్ తెరపైకి వచ్చి అందరిలోనూ ఆందోళన రేకెత్తిస్తోంది. కెనడా, అమెరికా, యూరప్, ఆస్ట్రేలియా అలాగే కొన్ని ఆసియా దేశాల్లో ఈ కొత్త వేరియంట్ కేసులు క్రమంగా వెలుగు చూస్తున్నాయి. వైరస్ స్పైక్ ప్రొటీన్‌లో జరిగిన భారీ మార్పుల కారణంగా ఇది మానవ కణాల్లోకి వేగంగా చొచ్చుకుపోయే సామర్థ్యాన్ని సంతరించుకున్నట్లు శాస్త్రవేత్తలు చెబుతున్నారు. అయితే ఇది మునుపటి వేరియంట్ల కంటే ప్రాణాంతకమైనదనేది ఇంకా నిర్ధారణ కాలేదు.

ఎక్కడ పుట్టింది.. ఎందుకు ప్రమాదకరం?

గత మే నెలలో కెనడాలోని ఒంటారియోలో ఈ వేరియంట్‌ను తొలిసారిగా గుర్తించారు. ఆ తర్వాత అమెరికాలోని పలు రాష్ట్రాలతో పాటు సింగపూర్, ఫ్రాన్స్, స్పెయిన్, న్యూజిలాండ్ దేశాలకు కూడా ఇది పాకింది. జర్నల్ ఆఫ్ ఇన్ఫెక్షన్‌లో ప్రచురితమైన నివేదిక ప్రకారం, జెఎన్.వన్ రకానికి చెందిన పాత వేరియంట్ నుంచి ఇది రూపాంతరం చెందింది. సాధారణంగా వైరస్‌లు నెమ్మదిగా మారుతుంటాయి, కానీ ఇందులో ఒకేసారి అనేక జన్యుపరమైన మార్పులు రావడంతో శాస్త్రవేత్తలు దీనిని సాల్టేషన్ వేరియంట్ అని పిలుస్తున్నారు. ఇది కణాల ఉపరితలంపై ఉండే రిసెప్టర్లతో బలంగా అతుక్కునే గుణం కలిగి ఉంది.

PJ.2.1 వేరియంట్ ప్రధాన లక్షణాలు ఏమిటి?

ఈ కొత్త వేరియంట్ సోకినప్పుడు ప్రత్యేకంగా కొత్త లక్షణాలేమి కనిపించడం లేదు. సాధారణ కొవిడ్ లేదా ఫ్లూ లక్షణాల మాదిరిగానే ఇవి ఉంటున్నాయి. తీవ్రమైన జ్వరం, గొంతు నొప్పి, విపరీతమైన దగ్గు, ముక్కు కారడం లేదా మూసుకుపోవడం, తీవ్రమైన తలనొప్పి, ఒళ్లు నొప్పులు, విపరీతమైన అలసట వంటి సమస్యలు కనిపిస్తున్నాయి. కొన్ని కేసుల్లో తీవ్రమైన గొంతు నొప్పి సుదీర్ఘకాలం పాటు వేధిస్తున్నట్లు నివేదికలు చెబుతున్నాయి. ఫ్లూ లక్షణాలకు కొవిడ్ లక్షణాలకు పెద్దగా తేడా లేకపోవడం వల్ల కేవలం లక్షణాలతో వ్యాధిని గుర్తించడం కష్టమవుతోంది.

భారత్ అప్రమత్తత అవసరమా?

ప్రస్తుతం అందుబాటులో ఉన్న వ్యాక్సిన్లు ఈ కొత్త వేరియంట్‌పై కొంతవరకు ప్రభావం చూపుతున్నట్లు ల్యాబ్ పరీక్షల్లో తేలింది. పాత వేరియంట్ల కోసం తయారైన యాంటీబాడీలు PJ.2.1 వైరస్‌ను కూడా గుర్తించి నిర్వీర్యం చేయగలవని పరిశోధనలు స్పష్టం చేస్తున్నాయి. ఇప్పటివరకు డబ్ల్యూహెచ్‌ఓ దీనిని ప్రమాదకరమైన జాబితాలో చేర్చలేదు. వృద్ధులు, దీర్ఘకాలిక వ్యాధులతో బాధపడేవారు మాత్రం తగు జాగ్రత్తలు తీసుకోవడం మంచిది. ప్రస్తుతం భారత్‌లో ఈ వేరియంట్‌కు సంబంధించి ఎలాంటి అధికారిక నిర్ధారణ లేనప్పటికీ, ప్రజలు అనవసరంగా భయపడకుండా సాధారణ ఆరోగ్య జాగ్రత్తలు పాటించడం ఉత్తమం.