భార‌త్‌లో పెరుగుతున్న క్యాన్స‌ర్ ముప్పు.. 2050 నాటికి ఏటా 28 లక్షల కొత్త కేసులు!

Cancer Risk: భారత్‌లో క్యాన్సర్ ముప్పు వేగంగా పెరుగుతోంది. 2022లో 14.13 లక్షల కొత్త కేసులు నమోదవగా, 9.16 లక్షల మంది ప్రాణాలు కోల్పోయారు. జనాభా పెరుగుదల, మారుతున్న జీవనశైలి కారణంగా 2050 నాటికి ఏటా 28 లక్షల కొత్త కేసులు నమోదయ్యే అవకాశం ఉందని అంచనా వేస్తున్నారు.

చిన్న వయసులోనూ క్యాన్సర్ కేసులు

గతంలో క్యాన్సర్ అంటే ఎక్కువగా వృద్ధుల్లో కనిపించే వ్యాధిగా భావించేవారు. కానీ ప్రస్తుతం 30, 40 ఏళ్ల వయసున్న వారిలోనూ ఈ వ్యాధి బయటపడుతోంది. ఆకాశ్ హెల్త్‌కేర్ సర్జికల్ ఆంకాలజీ డైరెక్టర్ డాక్టర్ అరుణ్ కుమార్ గిరి తెలిపిన వివరాల ప్రకారం.. క్యాన్సర్ బారిన పడుతున్న వారి వయసులో గణనీయమైన మార్పులు కనిపిస్తున్నాయి. తక్కువ వయసులోనే చాలామంది చికిత్స కోసం ఆసుపత్రులకు వస్తున్నారు.

పొగాకు, గుట్కా, ఇతర పొగాకు ఉత్పత్తుల వినియోగం, మద్యం సేవించడం, సరైన ఆహారం తీసుకోకపోవడం, వ్యాయామం లేకపోవడం, కాలుష్యం వంటి అంశాలు క్యాన్సర్ ముప్పును పెంచుతున్నాయి. ముఖ్యంగా శారీరక శ్రమ తగ్గి, గంటల తరబడి ఒకేచోట కూర్చుని పనిచేసే జీవనశైలి కూడా ఆరోగ్యంపై ప్రభావం చూపుతోంది. క్యాన్సర్ కేసులు కేవలం హైదరాబాద్, ఢిల్లీ, ముంబై వంటి పెద్ద నగరాలకే పరిమితం కావడం లేదు. చిన్న పట్టణాలు, గ్రామీణ ప్రాంతాల్లోనూ బాధితులు బయటపడుతున్నారు.

క్యాన్సర్ లక్షణాలను నిర్లక్ష్యం చేయొద్దు

క్యాన్సర్ చికిత్సలో వ్యాధిని ఎంత త్వరగా గుర్తిస్తే అంత మెరుగైన ఫలితాలు పొందే అవకాశం ఉంటుంది. అయితే చాలామంది ప్రారంభ లక్షణాలను సాధారణ ఆరోగ్య సమస్యలుగా భావించి నిర్లక్ష్యం చేస్తున్నారు. వైద్యుల అభిప్రాయం ప్రకారం.. ఆసుపత్రికి వస్తున్న చాలామంది రోగులు క్యాన్సర్ మూడో లేదా నాలుగో దశలో ఉన్నప్పుడు గుర్తిస్తున్నారు. ఈ దశలో చికిత్స మరింత క్లిష్టంగా మారడంతో పాటు ఖర్చులు కూడా పెరుగుతాయి.

శరీరంపై ఎక్కడైనా గడ్డలు ఏర్పడటం, ఎంతకాలమైనా తగ్గని పుండ్లు, కారణం లేకుండా బరువు తగ్గడం, అసాధారణ రక్తస్రావం వంటి లక్షణాలు కనిపిస్తే వెంటనే వైద్యులను సంప్రదించాలి. ఒక వైద్యుడి దగ్గర నుంచి మరొక వైద్యుడి దగ్గరకు తిరుగుతూ సరైన పరీక్షలు చేయించుకోవడంలో ఆలస్యం చేయకూడదు.

మహిళలు, పురుషులు ఇద్దరూ ఆరోగ్య పరీక్షల విషయంలో అప్రమత్తంగా ఉండాలి. చాలామంది పురుషులు సమస్య తీవ్రంగా మారే వరకు పరీక్షలు చేయించుకోవడం లేదని వైద్యులు చెబుతున్నారు. పొగాకు, మద్యం అలవాట్లతో పాటు మూత్ర, లైంగిక ఆరోగ్య సమస్యల గురించి బయటకు చెప్పడానికి ఇష్టపడకపోవడం కూడా ఆలస్యానికి కారణమవుతోంది.

మహిళల్లో గర్భాశయ ముఖద్వార క్యాన్సర్ (సర్వైకల్ క్యాన్సర్) నివారణకు HPV వ్యాక్సిన్ తీసుకోవడం, క్రమం తప్పకుండా స్క్రీనింగ్ పరీక్షలు చేయించుకోవడం ఎంతో ముఖ్యం. పాప్ స్మియర్, HPV పరీక్షల ద్వారా వ్యాధిని ముందుగానే గుర్తించే అవకాశం ఉంటుంది. రొమ్ములో గడ్డలు, అసాధారణ రక్తస్రావం, ఎక్కువకాలం కొనసాగుతున్న డిశ్చార్జ్ వంటి లక్షణాలను కూడా నిర్లక్ష్యం చేయకూడదు.

చికిత్స కోసం ఊరు వదిలి వెళ్లాల్సిన పరిస్థితి

క్యాన్సర్ నిర్ధారణ అయిన తర్వాత బాధితులు ఎదుర్కొనే సమస్యలు మరింత ఎక్కువగా ఉంటాయి. ముఖ్యంగా చిన్న పట్టణాలు, గ్రామాల్లో నివసించే వారికి ఆధునిక వైద్య సదుపాయాలు అందుబాటులో ఉండటం లేదు. రేడియేషన్, శస్త్రచికిత్స, కీమోథెరపీ వంటి చికిత్సలు అందించే ఆసుపత్రులు ఎక్కువగా పెద్ద నగరాల్లోనే ఉన్నాయి. దీంతో గ్రామీణ ప్రాంతాల రోగులు చికిత్స కోసం పదేపదే నగరాలకు వెళ్లాల్సి వస్తోంది.

ఆసుపత్రుల సమీపంలో ఉండటానికి అయ్యే ఖర్చు, ప్రయాణ ఖర్చులు, పనులకు సెలవులు పెట్టడం వంటి కారణాలతో కుటుంబాలపై ఆర్థిక భారం పెరుగుతోంది. కొందరు చికిత్స కోసం అప్పులు చేయాల్సిన పరిస్థితి ఏర్పడుతోంది. మరికొందరు ఆర్థిక ఇబ్బందులను తట్టుకోలేక మధ్యలోనే చికిత్సను నిలిపివేస్తున్నారు.

అందుకే క్యాన్సర్‌పై ప్రజల్లో అవగాహన పెంచడం, అవసరమైన వారికి ముందస్తు పరీక్షలు అందుబాటులోకి తీసుకురావడం, చిన్న పట్టణాల్లోనూ మెరుగైన వైద్య సదుపాయాలను విస్తరించడం కీలకంగా మారింది. ఆరోగ్యకరమైన జీవనశైలిని అలవాటు చేసుకోవడంతో పాటు అనుమానాస్పద లక్షణాలు కనిపించిన వెంటనే వైద్యులను సంప్రదించడం ద్వారా వ్యాధిని ముందుగానే గుర్తించే అవకాశం ఉంటుంది.