Guduru: ఇది అహంకారానికి, అభివృద్ధికి మధ్య జరుగుతున్న పోరాటం!

Guduru: కర్నూలు జిల్లా గూడూరు నగర పంచాయతీ ఎన్నికల ప్రచారంలో వైఎస్సార్ కాంగ్రెస్ పార్టీ నాయకులు విస్తృతంగా పాల్గొన్నారు. కుడా మాజీ ఛైర్మన్ కోట్ల హర్షవర్ధన్ రెడ్డి, కోడుమూరు నియోజకవర్గ వైసీపీ ఇన్‌చార్జి ఆదిమూలపు సతీష్ ప్రచార కార్యక్రమంలో పాల్గొన్నారు.

ఎస్సీ కాలనీ నుంచి వైసీపీ నాయకులు, కార్యకర్తలు ర్యాలీగా బయలుదేరి పాత బస్టాండ్ వద్ద ఏర్పాటు చేసిన సభకు చేరుకున్నారు. ఈ సందర్భంగా వారు మాట్లాడుతూ వైసీపీ ఛైర్మన్ అభ్యర్థి పద్మావతిని గెలిపిస్తే గూడూరు నగర పంచాయతీ అభివృద్ధికి కృషి చేస్తారని తెలిపారు. గతంలో వైసీపీ ప్రభుత్వం అమలు చేసిన ఆరోగ్య, సంక్షేమ పథకాలను ప్రజలకు వివరించారు.

వెంకటేశ్వర్లు మాట్లాడుతూ

గూడూరు పట్టణాన్ని అభివృద్ధి చేసింది తమ పార్టీయేనని వైసీపీ ఛైర్మన్ అభ్యర్థి పద్మావతి భర్త వెంకటేశ్వర్లు పేర్కొన్నారు. కేంద్రంలో బీజేపీ అధికారంలోకి వచ్చి 12 ఏళ్లు గడిచినా గూడూరు నగర పంచాయతీ అభివృద్ధికి ఎన్ని నిధులు తీసుకొచ్చారని ప్రశ్నించారు. ఈ ఎన్నికలు డబ్బుకు, సామాన్య ప్రజలకు మధ్య జరుగుతున్నాయని, ప్రజలు తమకు మద్దతు తెలిపి పద్మావతిని గెలిపించాలని కోరారు.

ఆదిమూలపు సతీష్ మాట్లాడుతూ

రాజ్యాంగబద్ధంగా స్థానిక సంస్థలకు రావాల్సిన అభివృద్ధి నిధులు కచ్చితంగా వస్తాయని తెలిపారు. ఎన్నికలు ప్రజాస్వామ్యబద్ధంగా, పారదర్శకంగా జరిగేలా అధికార యంత్రాంగం చర్యలు తీసుకోవాలని విజ్ఞప్తి చేశారు. వైసీపీ అభ్యర్థులను గెలిపించాలని ప్రజలను కోరారు.

కోట్ల హర్షవర్ధన్ రెడ్డి మాట్లాడుతూ

ఈ ఎన్నికలు అహంకారానికి, అభివృద్ధికి మధ్య జరుగుతున్నాయని వ్యాఖ్యానించారు. కూటమి అభ్యర్థి డబ్బు, అహంకారంతో ఎన్నికల బరిలోకి వస్తున్నారని విమర్శించారు. సామాన్య ప్రజలు తమ ఓటు హక్కును వినియోగించుకుని వైసీపీ అభ్యర్థి పద్మావతికి మద్దతు తెలపాలని కోరారు.