Kurnool: వర్కూర్ గ్రామంలో పొలం పిలుస్తోంది కార్యక్రమం!

కర్నూలు: కర్నూలు జిల్లా కోడుమూరు మండలంలోని వర్కూర్ గ్రామంలో ఏఓ రవిప్రకాష్ ఆధ్వర్యంలో పొలం పిలుస్తోంది కార్యక్రమం నిర్వహించారు. ఈ కార్యక్రమంలో రబీ సీజన్ పంటల నమోదు, పంటల బీమా ప్రీమియం చెల్లింపులపై రైతులకు అవగాహన కల్పించారు.

ఈ సందర్భంగా అధికారులు రైతులకు పలు సూచనలు చేశారు.

రబీ సీజన్‌లో సాగు చేసిన ప్రతి పంటను రైతు సేవా కేంద్రం సిబ్బంది ద్వారా తప్పనిసరిగా నమోదు చేయించుకోవాలి. డిసెంబర్ 15వ తేదీలోపు సాగు చేసిన పంటలకు పంటల బీమా ప్రీమియం చెల్లించాలి. శనగ, జొన్న, కొర్ర, సద్ద, మొక్కజొన్న తదితర పంటలకు బీమా సౌకర్యం అందుబాటులో ఉందని తెలిపారు.

శనగ పంటకు ఎకరాకు రూ.370 ప్రీమియం చెల్లించాలి. కొర్ర, సద్ద పంటలకు ఎకరాకు రూ.60 ప్రీమియం చెల్లించాలి. రైతులు తమ సమీప బ్యాంకు లేదా కామన్ సర్వీస్ సెంటర్ (CSC) ద్వారా పంటల బీమా ప్రీమియం చెల్లించాలని సూచించారు. రైతులు ఈ అవకాశాన్ని సద్వినియోగం చేసుకొని పంటల బీమా చేయించుకోవాలని ఏఓ రవిప్రకాష్ కోరారు.