Nandigama: ఐతవరం ప్యాక్స్ సొసైటీలో నూతన క్యాష్ కౌంటర్ ప్రారంభం!

Nandigama: రైతులకు మెరుగైన సేవలు అందిస్తూ సహకార వ్యవస్థను మరింత బలోపేతం చేయడమే కూటమి ప్రభుత్వ లక్ష్యమని ఆంధ్రప్రదేశ్ ప్రభుత్వ విప్, నందిగామ ఎమ్మెల్యే శ్రీమతి తంగిరాల సౌమ్య పేర్కొన్నారు.

నందిగామ మండలం ఐతవరం గ్రామంలోని ప్రాథమిక వ్యవసాయ సహకార పరపతి సంఘం (PACS) సొసైటీలో నూతనంగా ఏర్పాటు చేసిన క్యాష్ కౌంటర్‌ను ఉమ్మడి కృష్ణాజిల్లా కేడీసీసీ బ్యాంక్ చైర్మన్ శ్రీ నెట్టెం రఘురాం, మాజీ మంత్రి శ్రీ వసంత నాగేశ్వరరావు, మైలవరం ఎమ్మెల్యే వసంత కృష్ణ ప్రసాద్ తో కలిసి ఎమ్మెల్యే తంగిరాల సౌమ్య ప్రారంభించారు.

ఈ సందర్భంగా సొసైటీలో రైతులకు అందుతున్న సేవలు, నగదు లావాదేవీల నిర్వహణ, సహకార బ్యాంకింగ్ వ్యవస్థ ద్వారా రైతులకు కలుగుతున్న ప్రయోజనాలపై నాయకులు చర్చించారు. నూతన క్యాష్ కౌంటర్ అందుబాటులోకి రావడంతో రైతులు, ఖాతాదారులకు లావాదేవీల నిర్వహణ మరింత సులభతరం కానుంది. గ్రామీణ ప్రాంతాల్లో సహకార సంఘాల సేవలను మెరుగుపరచడం ద్వారా రైతులకు స్థానికంగానే అవసరమైన బ్యాంకింగ్ సేవలు అందించేందుకు అవకాశం కలుగుతుంది.

రైతు సంక్షేమమే లక్ష్యంగా అభివృద్ధి కార్యక్రమాలు

కూటమి ప్రభుత్వం రైతుల సంక్షేమానికి, గ్రామీణ ఆర్థిక వ్యవస్థ అభివృద్ధికి ప్రాధాన్యతనిస్తూ ముందుకు సాగుతోందని ఈ సందర్భంగా నాయకులు పేర్కొన్నారు. గ్రామస్థాయిలో వ్యవసాయ సహకార సంఘాలను బలోపేతం చేయడం, రైతులకు అవసరమైన సేవలను అందుబాటులోకి తీసుకురావడం ద్వారా వ్యవసాయ రంగానికి మరింత అండగా నిలవవచ్చని తెలిపారు.ప్రజలకు, రైతులకు ఉపయోగపడే మౌలిక సదుపాయాల కల్పనలో భాగంగా ఐతవరం సొసైటీలో నూతన క్యాష్ కౌంటర్ ప్రారంభించడం సంతోషకరమని ఎమ్మెల్యే తంగిరాల సౌమ్య పేర్కొన్నారు.

రైతులకు మెరుగైన సేవలు అందించేందుకు సంబంధిత బ్యాంకు అధికారులు, సహకార సంఘాల ప్రతినిధులు సమన్వయంతో పనిచేయాలని సూచించారు.ఈ కార్యక్రమం ద్వారా గ్రామీణ ప్రాంతాల్లో సహకార బ్యాంకింగ్ సేవల మెరుగుదలకు, రైతులకు మరింత సౌకర్యవంతమైన సేవల అందుబాటుకు ప్రాధాన్యత లభించింది.కార్యక్రమంలో ప్రాధమిక వ్యవసాయ సహకార పరపతి సంఘం చైర్మన్ మద్దుకూరి రామారావు, సొసైటీ చైర్మన్లు, స్థానిక ప్రజాప్రతినిధులు, కూటమి నాయకులు, సహకార సంఘం ప్రతినిధులు, బ్యాంకు అధికారులు, రైతులు పాల్గొన్నారు.