Gampalagudem: తెగిపోయిన తాత్కాలిక రోడ్డు, 20 గ్రామాలకు నిలిచిన రాకపోకలు!!

Gampalagudem: ఎన్టీఆర్ జిల్లా గంపలగూడెం మండలం వినగడప–తోటమూల గ్రామాల మధ్య కట్టలేరు వాగు మరోసారి ఉగ్రరూపం దాల్చింది. మురసు తుఫాన్ ప్రభావంతో కురిసిన భారీ వర్షాలకు వాగులో వరద ప్రవాహం పోటెత్తడంతో పలుచోట్ల గండ్లు పడి తాత్కాలిక రహదారి పూర్తిగా కొట్టుకుపోయింది. దీంతో రాకపోకలు పూర్తిగా నిలిచిపోయి పరిసర ప్రాంతాల్లోని 20 శివారు గ్రామాల ప్రజలు తీవ్ర ఇబ్బందులు ఎదుర్కొంటున్నారు.

ఏటా వరదలు.. ఏటా అదే కన్నీటి కష్టాలు!

2018 నుంచి కట్టలేరు వాగుకు భారీ వరదలు వచ్చిన ప్రతిసారీ ఇదే పరిస్థితి పునరావృతమవుతోంది. వరద ఉధృతికి రహదారి కొట్టుకుపోవడం, వరదలు తగ్గిన తర్వాత తాత్కాలిక మరమ్మతులు చేపట్టడం, మళ్లీ వర్షాకాలం రాగానే రహదారి ధ్వంసం కావడం పరిపాటిగా మారింది.

ఏళ్లు గడుస్తున్నా సమస్యకు శాశ్వత పరిష్కారం చూపడంలో పాలకులు విఫలమవుతున్నారనే విమర్శలు వ్యక్తమవుతున్నాయి.

రెండు కిలోమీటర్లకు 30 కిలోమీటర్ల చుట్టూ ప్రయాణం!

కట్టలేరు వరద కారణంగా గత తొమ్మిది రోజులుగా 20 శివారు గ్రామాల ప్రజలకు రాకపోకలు నిలిచిపోయాయి. సాధారణంగా కేవలం రెండు కిలోమీటర్ల దూరంలో ఉన్న ప్రాంతానికి చేరుకోవాలంటే ప్రస్తుతం సుమారు 30 కిలోమీటర్లు చుట్టూ తిరిగి వెళ్లాల్సిన దుస్థితి నెలకొంది.

విద్యార్థులు, ఉపాధ్యాయులు, వ్యాపారులు, రోజువారీ కూలీలు, అత్యవసర వైద్య సేవల కోసం వెళ్లే ప్రజలు తీవ్ర ఇబ్బందులు పడుతున్నారు. ప్రయాణ సమయంతో పాటు అదనపు రవాణా ఖర్చులు భరించలేక ప్రజలు వ్యయప్రయాసలకు గురవుతున్నారు.

అనుమతులున్నా.. నిధుల విడుదలలో జాప్యమెందుకు?

కట్టలేరు సమస్యకు శాశ్వత పరిష్కారం చూపే విషయంలో పరిపాలనాపరమైన అనుమతులు వచ్చినప్పటికీ ఆర్థికపరమైన అనుమతులు మాత్రం లభించడం లేదనే అంశం ఇప్పుడు ప్రధాన చర్చనీయాంశంగా మారింది. నిధుల మంజూరులో జాప్యం కారణంగా శాశ్వత నిర్మాణ పనులు ముందుకు సాగడం లేదనే అభిప్రాయాలు వ్యక్తమవుతున్నాయి.

ఇప్పటికే ముఖ్యమంత్రి చంద్రబాబు నిర్వహించిన కలెక్టర్ల సమావేశంలో జిల్లా కలెక్టర్ జి. లక్ష్మీ షా సైతం కట్టలేరు సమస్యను ముఖ్యమంత్రి దృష్టికి తీసుకెళ్లారు. అయినప్పటికీ సమస్యకు పూర్తిస్థాయి పరిష్కారం ఎప్పుడు లభిస్తుందన్నది ప్రశ్నార్థకంగా మారింది.

50 వేలకు పైగా జనాభా.. ప్రధాన రహదారికే దిక్కులేదా?

గంపలగూడెం మండలం 50 వేలకు పైగా జనాభా కలిగిన మండలం. అంతేకాకుండా విజయవాడ, నూజివీడు ప్రాంతాలకు వెళ్లే ప్రజలకు ఈ మార్గం ప్రధాన రహదారిగా ఉంది. రెండు రాష్ట్రాలను కలిపే కీలక మండలంగా ఉన్న ఈ ప్రాంతంలో రహదారి తెగిపోవడంతో ప్రజల రాకపోకలకు తీవ్ర అంతరాయం ఏర్పడుతోంది.

కేవలం రెండు కిలోమీటర్ల దూరానికి సైతం చుట్టూ 30 కిలోమీటర్లు తిరిగి ప్రయాణించాల్సి రావడంతో ప్రజలు సమయం, డబ్బు వృథా చేసుకుంటూ తీవ్ర అవస్థలు పడుతున్నారు.

ఇప్పటికైనా ప్రభుత్వం స్పందించాలి!

వరద ఉధృతి తగ్గినప్పటికీ కొట్టుకుపోయిన రహదారి పరిస్థితి దారుణంగా ఉంది. పూర్తిస్థాయి మరమ్మతులు చేపట్టిన తర్వాతే రాకపోకలు పునరుద్ధరించే పరిస్థితి కనిపిస్తోంది. ప్రతిసారీ వరదలు వచ్చినప్పుడు తాత్కాలిక మరమ్మతులు చేపట్టడం కాకుండా శాశ్వత నిర్మాణం చేపట్టాల్సిన అవసరం ఎంతైనా ఉంది.

రాష్ట్ర ప్రభుత్వం వెంటనే స్పందించి ఆర్థికపరమైన అనుమతులు మంజూరు చేయడంతో పాటు అవసరమైన నిధులు విడుదల చేసి శాశ్వత రహదారి నిర్మాణ పనులు చేపట్టాలని 20 గ్రామాల ప్రజలు కోరుతున్నారు. రెండు రాష్ట్రాలను కలిపే కీలక ప్రాంతం, 50 వేలకు పైగా జనాభా కలిగిన మండల ప్రజల కష్టాలను ఇకనైనా తీర్చాలని విజ్ఞప్తి చేస్తున్నారు.

ఏటా వరదలొచ్చినప్పుడు రహదారి కొట్టుకుపోవడం.. ప్రజలు ఇబ్బందులు పడటం.. వరదలు తగ్గాక తాత్కాలిక మరమ్మతులు చేయడం.. ఇదేనా శాశ్వత పరిష్కారం? పరిపాలన అనుమతుల నుంచి ఆర్థిక అనుమతుల వరకు ఫైళ్లు కదలడానికి ఇంకెన్నేళ్లు పడుతుంది? 20 గ్రామాల ప్రజల నిరీక్షణకు తెరదించేది ఎప్పుడు? అన్న ప్రశ్నలు ప్రభుత్వాన్ని నిలదీస్తున్నాయి.