Lakshmidevipalli: కారుకొండ రామవరం బౌద్ధ గుహల్లో పర్యాటక దినోత్సవం

లక్ష్మీదేవిపల్లి: భద్రాద్రి కొత్తగూడెం జిల్లా లక్ష్మీదేవిపల్లి మండలం కారుకొండ రామవరం బౌద్ధ గుహల వద్ద ప్రపంచ పర్యాటక దినోత్సవం–2026 వేడుకలు ఘనంగా నిర్వహించారు. జిల్లా కలెక్టర్ మార్గదర్శకత్వంలో జిల్లా పర్యాటక నోడల్ అధికారి బి. అనూష ఆధ్వర్యంలో కార్యక్రమం జరిగింది.

కార్యక్రమానికి అదనపు కలెక్టర్ (లోకల్ బాడీస్), డీఆర్‌డీఓ ఎం. విద్యా చందన ముఖ్య అతిథిగా హాజరయ్యారు. కారుకొండ రామవరం సర్పంచ్, వార్డు సభ్యులతో పాటు లక్ష్మీదేవిపల్లి మండలంలోని వివిధ గ్రామ పంచాయతీల సర్పంచ్‌లు, పంచాయతీ కార్యదర్శులు పాల్గొన్నారు.

ఈ సందర్భంగా బాధ్యతాయుతమైన పర్యాటకం, సాంస్కృతిక వారసత్వ పరిరక్షణ, సుస్థిర పర్యాటక ప్రాధాన్యతపై అవగాహన కల్పించారు. కారుకొండ రామవరం బౌద్ధ గుహలు, అక్కడి బౌద్ధ సాంస్కృతిక నిర్మాణాల చారిత్రక ప్రాధాన్యత, వాటి పరిరక్షణ ఆవశ్యకతపై బుద్ధిస్ట్ సొసైటీ సభ్యులు వివరించారు.

ప్రపంచ పర్యాటక దినోత్సవంలో భాగంగా స్వచ్ఛతా హీ సేవా కార్యక్రమాలు నిర్వహించారు. విద్యార్థులకు పరిశుభ్రత, పర్యావరణ పరిరక్షణ, పర్యావరణహిత జీవన విధానం, బాధ్యతాయుత ప్రవర్తనపై అవగాహన కల్పించారు. పర్యాటక ప్రాంతాలను పరిశుభ్రంగా, పర్యావరణహితంగా ఉంచడంలో విద్యార్థులు, యువత భాగస్వామ్యం కీలకమని అధికారులు తెలిపారు.

పర్యాటక ప్రాంతాల్లో సందర్శకులకు భద్రత, మార్గదర్శకత్వం అందిస్తూ సేవలందిస్తున్న టూరిజం పోలీసులను జిల్లా పర్యాటక నోడల్ అధికారి బి. అనూష ఘనంగా సత్కరించి వారి సేవలను అభినందించారు.

చారిత్రక, సాంస్కృతిక వారసత్వ ప్రదేశాలను పరిరక్షిస్తూ, పరిశుభ్రతను పాటిస్తూ, స్థానిక సమాజ భాగస్వామ్యంతో బాధ్యతాయుతమైన, పర్యావరణహితమైన, సుస్థిర పర్యాటక అభివృద్ధిని ముందుకు తీసుకెళ్లాల్సిన అవసరం ఉందని ఈ సందర్భంగా అధికారులు పేర్కొన్నారు.