Sathupalli: సత్తుపల్లిలో పారిశుద్ధ్య, రోడ్డు అభివృద్ధి పనులు ముమ్మరం!

సత్తుపల్లి: సత్తుపల్లి మున్సిపాలిటీ పరిధిలో ప్రజలకు మెరుగైన మౌలిక వసతులు, పరిశుభ్రమైన వాతావరణం కల్పించే దిశగా పలు అభివృద్ధి, పారిశుద్ధ్య కార్యక్రమాలు ఆదివారం చేపట్టారు. సత్తుపల్లి మున్సిపాలిటీలోని 12వ వార్డు విరాట్ నగర్ నుంచి సింగరేణి కాలనీకి వెళ్లే మార్గంలో రోడ్డుకు ఇరువైపులా పేరుకుపోయిన చెత్తను జేసీబీ సహాయంతో పూర్తిగా తొలగించారు. పారిశుద్ధ్య కార్యక్రమంలో భాగంగా చెత్తను తొలగించి పరిసరాలను శుభ్రం చేశారు.

అదేవిధంగా 7వ వార్డులో గత 22 సంవత్సరాలుగా రోడ్డు, డ్రైనేజీ సౌకర్యాలు లేని ప్రాంతంలో స్థానిక సమస్యను సత్తుపల్లి ఎమ్మెల్యే మట్టా రాగమయి దయానంద్ గారి దృష్టికి తీసుకెళ్లడంతో, వారి ఆదేశాల మేరకు రోడ్డు, డ్రైనేజీ నిర్మాణ పనులు చేపట్టారు. ఈ సందర్భంగా 7వ వార్డు సభ్యులు సత్తుపల్లి ఎమ్మెల్యే మట్టా రాగమయి దయానంద్, మున్సిపల్ చైర్‌పర్సన్ రిహన కమల్ పాషా, వార్డు కౌన్సిలర్ నసీమా షరీఫ్లకు ధన్యవాదాలు తెలిపారు.

ఈ అభివృద్ధి, పారిశుద్ధ్య పనులను మున్సిపల్ చైర్‌పర్సన్ రిహన కమల్ పాషా దగ్గరుండి పర్యవేక్షించారు. ఆమెతో పాటు కాంగ్రెస్ నాయకులు గుడ్లూరి రవి, రాజు, బీఆర్‌ఎస్ వార్డు కౌన్సిలర్ విజయ్ తదితరులు పాల్గొన్నారు. ప్రజలకు పరిశుభ్రమైన, సుందరమైన వాతావరణాన్ని అందించడంతో పాటు అవసరమైన మౌలిక వసతులను మెరుగుపరచడమే లక్ష్యంగా మున్సిపాలిటీ పరిధిలో అభివృద్ధి, పారిశుద్ధ్య కార్యక్రమాలు కొనసాగుతున్నట్లు తెలిపారు.