Sathupalli: ఈనెల 28 నుంచి సత్తుపల్లిలో కబడ్డీ సంబరం: మువ్వా విజయబాబు!

సత్తుపల్లి: మహిళా క్రీడాకారుల్లో దాగి ఉన్న ప్రతిభను వెలికితీసి, క్రీడారంగంలో వారికి మరిన్ని అవకాశాలు కల్పించడమే లక్ష్యంగా సత్తుపల్లిలో 73వ రాష్ట్రస్థాయి సీనియర్ మహిళల కబడ్డీ పోటీలను నిర్వహించనున్నట్లు మాజీ తెలంగాణ రాష్ట్ర పారిశ్రామిక మౌలిక సదుపాయాల సంస్థ (టీజీఐడీసీ) చైర్మన్ మువ్వా విజయబాబు తెలిపారు. సోమవారం రాణి సెలబ్రేషన్ ఫంక్షన్ హాల్ లో జరిగిన విలేకరుల సమావేశంలో మాట్లాడుతూ ఈ క్రీడా సంబరానికి ప్రజలు, యువత, క్రీడాభిమానులు పెద్ద సంఖ్యలో హాజరై విజయవంతం చేయాలని ఆయన పిలుపునిచ్చారు.

కబడ్డీ మన దేశ సంప్రదాయ క్రీడల్లో ఒకటని, ముఖ్యంగా గ్రామీణ ప్రాంతాల్లో ఈ క్రీడకు విశేష ఆదరణ ఉందని పేర్కొన్నారు. కబడ్డీ ద్వారా మహిళల్లో ఆత్మవిశ్వాసం, పట్టుదల, క్రమశిక్షణతో పాటు జట్టుగా పనిచేసే లక్షణాలు పెంపొందుతాయని తెలిపారు. మహిళలు అన్ని రంగాల్లో ముందుకు సాగుతున్న తరుణంలో క్రీడారంగంలోనూ వారిని ప్రోత్సహించడం ఎంతో అవసరమని అన్నారు.

రాష్ట్రంలోని వివిధ ప్రాంతాల నుంచి మహిళా కబడ్డీ జట్లు ఈ పోటీల్లో పాల్గొననున్నాయని తెలిపారు. క్రీడాకారులు తమ ప్రతిభను ప్రదర్శించేందుకు, నైపుణ్యాలను మెరుగుపరుచుకునేందుకు ఈ పోటీలు చక్కటి వేదికగా నిలుస్తాయని ఆశాభావం వ్యక్తం చేశారు. యువతలో ఆరోగ్యకరమైన జీవనశైలి, పోటీతత్వం, నాయకత్వ లక్షణాలను పెంపొందించడంలో క్రీడలు కీలక పాత్ర పోషిస్తాయని పేర్కొన్నారు.

మంత్రి పొంగులేటి శ్రీనివాసరెడ్డి జన్మదినాన్ని పురస్కరించుకుని నిర్వహిస్తున్న ఈ రాష్ట్రస్థాయి క్రీడా కార్యక్రమం మహిళా క్రీడాకారులకు ప్రోత్సాహాన్ని అందించడంతో పాటు సత్తుపల్లికి క్రీడారంగంలో ప్రత్యేక గుర్తింపు తీసుకువస్తుందని నిర్వాహకులు తెలిపారు. మూడు రోజుల పాటు జరిగే పోటీలను తిలకించేందుకు ప్రజలు పెద్ద సంఖ్యలో తరలివచ్చి క్రీడాకారులను ప్రోత్సహించాలని మువ్వా విజయబాబు కోరారు.

ఈ సమావేశంలో కబడ్డీ సంఘం రాష్ట్ర ఉపాధ్యక్షుడు, ఖమ్మం జిల్లా కార్యదర్శి కటికాల క్రిస్టఫర్ బాబు, రాష్ట్ర సంయుక్త కార్యదర్శి, భద్రాద్రి కొత్తగూడెం జిల్లా కార్యదర్శి కె. స్వాతిముత్యం, ఖమ్మం జిల్లా సంయుక్త కార్యదర్శి చి. సుధాకర్, సత్తుపల్లి పట్టణ 1వ వార్డు కౌన్సిలర్ మట్టా ప్రసాద్, 6వ వార్డు కౌన్సిలర్ సుజల రాణి, అన్నపురెడ్డిపల్లి శివాలయ చైర్మన్ మల్లెల నరసింహారావు, బెతుపల్లి సర్పంచ్ దొడ్డా రాజేంద్ర ప్రసాద్ (అమ్ములు), భీమవరం సర్పంచ్ వంట్ల రమేష్, కాకర్లపల్లి సర్పంచ్ పొదిలి మారేశ్వరరావు, పట్టణ కాంగ్రెస్ నాయకులు, వివిధ గ్రామాల నాయకులు, మువ్వా విజయబాబు అభిమానులు తదితరులు పాల్గొన్నారు.