Palwancha: పాల్వంచలో పోలీసుల ఆధ్వర్యంలో ఘనంగా రక్తదాన శిబిరం!

పాల్వంచ: పోలీసు అమరవీరుల సంస్మరణ వారోత్సవాలను పురస్కరించుకుని పాల్వంచలో పోలీసు శాఖ ఆధ్వర్యంలో రక్తదాన శిబిరాన్ని నిర్వహించారు. తలసేమియా వ్యాధితో బాధపడుతున్న చిన్నారులకు అవసరమైన రక్తాన్ని అందించాలనే ఉద్దేశంతో ఈ కార్యక్రమాన్ని ఏర్పాటు చేశారు. అక్టోబర్ 21న నిర్వహించే పోలీసు అమరవీరుల దినోత్సవాన్ని పురస్కరించుకుని ప్రతి సంవత్సరం వారం రోజుల పాటు పోలీసు శాఖ ఆధ్వర్యంలో పలు సేవా కార్యక్రమాలు చేపడుతున్నట్లు పాల్వంచ డీఎస్పీ ఆర్. సతీష్ తెలిపారు.

ప్రతి ఏడాది సంస్మరణ వారోత్సవాల్లో భాగంగా జిల్లా ఎస్పీ రోహిత్ రాజ్ ఆదేశాల మేరకు పాల్వంచ సబ్ డివిజన్ పరిధిలోని పాల్వంచ టౌన్ పోలీస్ స్టేషన్‌లో రక్తదాన శిబిరాన్ని ఏర్పాటు చేసినట్లు ఆయన పేర్కొన్నారు. తలసేమియా వ్యాధితో బాధపడుతున్న చిన్నారులకు తరచూ రక్తం అవసరమవుతుందని, అలాంటి వారికి రక్తం అందించేందుకు స్వచ్ఛందంగా ముందుకు రావడం అభినందనీయమని తెలిపారు.

ఈ శిబిరంలో పోలీస్ శాఖకు చెందిన ఎస్సైలు, పోలీసు సిబ్బందితో పాటు పలువురు ప్రజలు ఉత్సాహంగా పాల్గొని రక్తదానం చేశారు. పోలీసు అమరవీరుల త్యాగాలను స్మరించుకోవడంతో పాటు సమాజానికి ఉపయోగపడే సేవా కార్యక్రమాలు నిర్వహించడం ఈ వారోత్సవాల ముఖ్య ఉద్దేశమని పోలీసు అధికారులు తెలిపారు. రక్తదానం ద్వారా ఆపదలో ఉన్న వారికి ప్రాణదానం చేసే అవకాశం ఉంటుందని, ప్రతి ఒక్కరూ సామాజిక బాధ్యతగా రక్తదానానికి ముందుకు రావాలని పిలుపునిచ్చారు.