Palwancha: కేటీపీఎస్ 7వ దశలో వ్యాగన్ ప్రమాదం.. కార్మికుడు మృతి

పాల్వంచ: పాల్వంచ కేటీపీఎస్ ఏడో దశలో శనివారం విషాదం చోటుచేసుకుంది. వ్యాగన్ లో ఉన్న బొగ్గును కిందకు దించుతున్న క్రమంలో జరిగిన ప్రమాదంలో ఆర్టిజన్ గ్రేడ్-2 పెమ్ముల వెంకటేశ్వర్లు (50) అక్కడికక్కడే మృతి చెందారు. విధి నిర్వహణలో ఉండగానే మృత్యువు కబళించడంతో కార్మిక వర్గంలో విషాదం నెలకొంది.

పాల్వంచలోని వెంకటేశ్వర హిల్స్ కాలనీకి చెందిన వెంకటేశ్వర్లుకు భార్య రమణ (41), ఇద్దరు పిల్లలు ఉన్నారు. వారికి 27 సంవత్సరాల క్రితం వివాహం జరిగింది. వెంకటేశ్వర్లు గత 8 సంవత్సరాల నుండి కేటీపీఎస్ లో ఆర్టిజన్ గ్రేడ్-2 గా పనిచేస్తున్నారు. పిల్లలిద్దరూ ప్రస్తుతం హైదరాబాద్ లో చదువుకుంటున్నారు.

రోజు లాగానే శనివారం ఉదయం 6 గంటలకు డ్యూటీకి వెళ్లారు. మధ్యాహ్నం సుమారు 12:40 గంటల సమయంలో 7 స్టేజ్ కోల్ ప్లాంట్ ట్రాక్ వద్ద బిఓబిఆర్ వ్యాగన్స్ ద్వారా వచ్చిన బొగ్గు అన్ లోడ్ చేసేందుకు తన తోటి ఉద్యోగికి ఎయిర్ పైప్ అందించి, మరో వ్యాగన్ బాక్స్ దగ్గరికి ప్లాట్ ఫామ్ పై నుండి నడుచుకుంటూ వెళుతుండగా ప్రమాదవశాత్తు కాలుజారి ప్లాట్ ఫామ్ కు ఉన్న గ్రిల్ కు, ట్రైన్ వ్యాగన్ బాక్స్ మధ్యలో పడిపోయి ఇరుక్కున్నారు.

దీంతో కుడి చేయి, తుంటి భాగంలో బలమైన రక్త గాయాలయ్యాయి. అక్కడ ఉన్న తోటి ఉద్యోగులు కాకరాల సుబ్బారావు, గడ్డం సత్యనారాయణ, బోడ రాములు వెంటనే ఆయనను బయటకు తీసి వైద్యం నిమిత్తం పాల్వంచలోని కేటీపీఎస్ హాస్పిటల్ కు తీసుకెళ్లారు. పరీక్షించిన డాక్టర్ అప్పటికే మృతి చెందినట్లు నిర్ధారించారు.

కుటుంబానికి జీవనాధారంగా ఉంటూ భార్యాపిల్లల బాధ్యతలను మోస్తున్న వెంకటేశ్వర్లు ఆకస్మికంగా మృతి చెందడంతో ఆ కుటుంబం పెద్ద దిక్కును కోల్పోయింది. కుటుంబ భవిష్యత్తు కోసం నిరంతరం శ్రమించిన వ్యక్తి తిరిగిరాని లోకాలకు వెళ్లిపోవడంతో భార్య రమణకు తీరని దుఃఖం మిగిలింది. తండ్రి మరణవార్తతో ఇద్దరు పిల్లలు తీవ్ర విషాదంలో మునిగిపోయారు. చదువుకుంటున్న వయసులో తండ్రిని కోల్పోవడం ఆ చిన్నారులకు తీరని లోటుగా మారింది. కుటుంబ పోషణకు ఆధారమైన వ్యక్తి దూరం కావడంతో వారి భవిష్యత్తుపై ఆందోళన నెలకొంది.

వెంకటేశ్వర్లు ఆకస్మిక మృతితో వెంకటేశ్వర హిల్స్ కాలనీలో విషాదఛాయలు అలుముకున్నాయి. ఆయన మృతి పట్ల స్థానికులు, పరిచయస్తులు తీవ్ర దిగ్భ్రాంతి వ్యక్తం చేస్తున్నారు. కుటుంబానికి పెద్ద దిక్కుగా ఉన్న వ్యక్తి ఇలా అర్ధంతరంగా తనువు చాలించడంతో పలువురు కన్నీటిపర్యంతమయ్యారు.

ఈ మరణంపై తమకు ఎవరిపైనా ఎలాంటి అనుమానం లేదని భార్య రమణ ఫిర్యాదులో పేర్కొన్నారు. పోలీసులు కేసు నమోదు చేసి దర్యాప్తు చేస్తున్నారు.