Khammam: శ్రీ రామకృష్ణ విద్యాలయంలో బాలికా దినోత్సవం, బతుకమ్మ వేడుకలు!

Khammam: ఖమ్మంలోని గుట్టల బజార్‌లో ఉన్న శ్రీ రామకృష్ణ విద్యాలయం ఆధ్వర్యంలో శుక్రవారం బాలికలు , మహిళల కోసం ఉచిత వైద్య శిబిరం , అంతర్జాతీయ బాలికా దినోత్సవ కార్యక్రమం మరియు బతుకమ్మ వేడుకలను నిర్వహించారు . అంతర్జాతీయ బాలికా దినోత్సవాన్ని ప్రతి సంవత్సరం అక్టోబర్ 11న నిర్వహిస్తారు. అయితే , రానున్న సెలవుల నేపథ్యంలో విద్యార్థులు , తల్లిదండ్రులు , మహిళలు కార్యక్రమంలో పాల్గొనేందుకు అనుకూలంగా ఉండాలనే ఉద్దేశంతో ముందస్తుగా ఈ వేడుకలను నిర్వహించారు . బిలీఫ్ హాస్పిటల్స్ ఖమ్మం వారి సహకారంతో నిర్వహించిన ఉచిత వైద్య శిబిరం ద్వారా బాలికలు , మహిళల్లో ఆరోగ్యంపై అవగాహన పెంపొందించేందుకు కృషి చేశారు.

ఈ కార్యక్రమానికి ముఖ్య అతిథిగా విచ్చేసిన శ్రీమతి డా. మెదింపూడి రమాజ్యోతి , బిలీఫ్ హాస్పిటల్స్ ఎం.డి. మరియు లీఫ్ చారిటబుల్ ట్రస్ట్ వ్యవస్థాపకురాలు సభికులను ఉద్దేశించి ప్రసంగించారు. ఈ సందర్భంగా ఆమె ఆరోగ్యం , కుటుంబం , పర్యావరణం అనే మూడు ముఖ్యమైన అంశాల ప్రాధాన్యతను వివరించారు . వ్యక్తిగత ఆరోగ్య పరిరక్షణతో పాటు కుటుంబ సభ్యుల మధ్య పరస్పర అవగాహన , ప్రేమానురాగాలు , బాధ్యతాయుతమైన జీవనం ఎంతో అవసరమని పేర్కొన్నారు. ఆరోగ్యవంతమైన సమాజ నిర్మాణానికి కుటుంబ విలువలు , ఆరోగ్య పరిరక్షణ , ప్రకృతి సంరక్షణ పరస్పరం అనుసంధానమై ఉన్నాయని వివరించారు.

ఈ కార్యక్రమంలో సేవికా సమితి జిల్లా కార్యవాహ శ్రీమతి కొంపెర్ల సురేఖ మరియు పాఠశాల పూర్వ కమిటీ సభ్యురాలు శ్రీమతి కారి స్వర్ణలత పాల్గొన్నారు . బాలికలు , మహిళలు ఆరోగ్యంపై అవగాహన పెంపొందించుకోవడంతో పాటు విద్య , ఆత్మవిశ్వాసం , వ్యక్తిత్వ వికాసం ద్వారా జీవితంలో ఉన్నత లక్ష్యాలను సాధించాలని ఈ కార్యక్రమం సందేశాన్నిచ్చింది . అనంతరం తెలంగాణ సంస్కృతి , సంప్రదాయాలకు ప్రతీక అయిన బతుకమ్మ వేడుకలను ఉత్సాహంగా నిర్వహించారు . మహిళలు బతుకమ్మ సంబరాల్లో పాల్గొని సంప్రదాయాల పట్ల తమ అభిమానాన్ని చాటుకున్నారు . ఈ వేడుకలు మహిళల్లో ఐక్యత, సాంస్కృతిక చైతన్యం , సామాజిక సమైక్యతను ప్రతిబింబించాయి. వివేకానంద ఇన్‌స్టిట్యూట్ ఆఫ్ హ్యూమన్ ఎక్సలెన్స్ , ఖమ్మం వారి సహకారంతో నిర్వహించిన ఈ కార్యక్రమానికి బిలీఫ్ హాస్పిటల్స్ మరియు లీఫ్ చారిటబుల్ ట్రస్ట్ సహకారం అందించాయి . ఆరోగ్యవంతమైన బాలికలు , సాధికారత కలిగిన మహిళలు , బలమైన కుటుంబాలు , స్వచ్ఛమైన పర్యావరణం — ఉజ్వల భవిష్యత్తుకు పునాదులు అనే సందేశంతో కార్యక్రమం ముగిసింది.