Kothagudem: ప్రజా భద్రతకు కొత్తగూడెం పోలీసుల సామాజిక చొరవ

కొత్తగూడెం: ప్రజల భద్రతే లక్ష్యంగా విధులు నిర్వహిస్తున్న పోలీసులు సామాజిక బాధ్యతలోనూ తమ వంతు పాత్ర పోషించారు. కొత్తగూడెంలోని సూపర్ బజార్ నుంచి కారుకొండ రామవరం వెళ్లే రహదారిపై ఏర్పడిన గుంతలను త్రీ టౌన్ పోలీసుల ఆధ్వర్యంలో కంకరతో పూడ్చివేశారు.

త్రీ టౌన్ పోలీస్ స్టేషన్ సీఐ ఇంద్రసేనారెడ్డి, ఎస్‌ఐ రమేష్ ఆధ్వర్యంలో ఈ కార్యక్రమం చేపట్టారు. రహదారిపై గుంతల కారణంగా వాహనదారులు, పాదచారులు ఎదుర్కొంటున్న ఇబ్బందులను గుర్తించిన పోలీసులు స్పందించారు. ప్రమాదాల ముప్పును తగ్గించి, ప్రయాణికులకు ఇబ్బందులు లేకుండా చేయాలనే ఉద్దేశంతో గుంతలను కంకరతో పూడ్చే చర్యలు చేపట్టారు.

ఈ కార్యక్రమంలో సీపీఐ 52వ డివిజన్ కార్యదర్శి ధనరాజ్, త్రీ టౌన్ కానిస్టేబుళ్లు చిరంజీవి, మురళి తదితరులు పాల్గొన్నారు. ప్రజా రక్షణతో పాటు సామాజిక బాధ్యత

పోలీసుల విధులు కేవలం నేరాల నియంత్రణ, శాంతిభద్రతల పరిరక్షణకే పరిమితం కాకుండా ప్రజలకు ఎదురయ్యే సమస్యల పరిష్కారంలోనూ సామాజిక బాధ్యతతో స్పందించవచ్చని ఈ కార్యక్రమం ద్వారా చాటిచెప్పారు. రహదారిపై గుంతల పూడ్చివేతకు పోలీసులు చొరవ చూపడంపై స్థానికులు హర్షం వ్యక్తం చేస్తున్నారు.