Vemulawada: వేములవాడ ఈవో కి కొండగట్టు అంజన్న ఉత్సవాల ఆహ్వాన పత్రిక అందజేత!

Vemulawada: జగిత్యాల జిల్లా మల్యాల మండలం ముత్యంపేటలోని ప్రసిద్ధ పుణ్యక్షేత్రం శ్రీ ఆంజనేయస్వామి దేవస్థానం (కొండగట్టు)లో త్వరలో జరగనున్న 'చందనోత్సారణ (చందనం తొలగింపు) - మహా సంప్రోక్షణ' మహోత్సవాలకు సంబంధించిన ఆహ్వాన పత్రికను శ్రీ రాజరాజేశ్వర స్వామి దేవస్థానం (వేములవాడ) ఈవో శ్రీమతి ఎల్. రమాదేవి గారికి కొండగట్టు దేవస్థానం అధికారులు ఘనంగా అందజేశారు.

​కొండగట్టు ఆలయ ఏఈఓ హరిహరనాథ్, ఆలయ ఉప ప్రధాన అర్చకులు శ్రీ లక్ష్మణ ప్రసాద్ గార్లు వేములవాడలో ఈవో రమాదేవిని కలసి ఆహ్వాన పత్రికను అందజేసి ఉత్సవాలకు ఆహ్వానించారు.

​ఉత్సవాల వివరాలు:

​స్వస్తిశ్రీ పరాభవ నామ సంవత్సరం కార్తీక శుద్ధ షష్ఠి, తేదీ: 15-11-2026 (ఆదివారం) నుండి 20-11-2026 (శుక్రవారం) వరకు శ్రీశ్రీశ్రీ జీయర్ స్వాములవారి దివ్య సమక్షంలో మహా వైభవంగా ఈ కార్యక్రమాలు జరగనున్నాయి.

​60 సంవత్సరాల తర్వాత విశేష ఘట్టం గత 60 ఏళ్లుగా స్వామివారి మూలమూర్తిపై పేరుకుపోయిన చందనాన్ని తొలగించే (చందనోత్సారణ) ప్రక్రియ, అనంతరం మహా సంప్రోక్షణ మహోత్సవం నిర్వహించనున్నారు.

​జపాలు, హోమాలు: తేదీ 15-11-2026 నుండి 20-11-2026 వరకు క్షేత్రంలో విశేష హోమాలు, జపాలు, వేద పారాయణాలు జరుగుతాయి.

​దర్శనాల వివరాలు:

​చందనోత్సారణ ప్రక్రియ జరుగుచున్నందున ఉత్సవాల సమయంలో మూలమూర్తి దర్శనం ఉండదు.

​తేదీ: 20-11-2026 (శుక్రవారం) ఉదయం 9:57 గంటలకు శ్రీశ్రీశ్రీ జీయర్ స్వాములవారిచే కుంభ ప్రోక్షణ, మహా సంప్రోక్షణ పూర్తయిన అనంతరం శ్రీస్వామివారి నిజరూప దర్శనం ప్రారంభమవుతుంది.

​భక్తులకు స్వామివారి నిజరూప దర్శనం 29-12-2026 (మంగళవారం) వరకు అంటే మొత్తం 40 రోజుల పాటు అందుబాటులో ఉంటుంది.

​ఈ పవిత్ర మహోత్సవంలో భక్తులందరూ విశేషంగా పాల్గొని శ్రీ అంజనేయస్వామివారి కృపాకటాక్షాలు పొందాలని ఆలయ అధికారులు కోరారు.