Vemulawada: రైతులకు అండగా ప్రభుత్వం.. సన్నాలకు రూ.500 బోనస్!

వేములవాడ: రైతులు పండించిన ధాన్యానికి మద్దతు ధర కల్పించి, మధ్యవర్తుల దోపిడీ నుంచి రైతులను రక్షించడమే ధాన్యం కొనుగోలు కేంద్రాల ప్రధాన లక్ష్యమని రాష్ట్ర ప్రభుత్వ విప్, వేములవాడ ఎమ్మెల్యే ఆది శ్రీనివాస్ అన్నారు. బుధవారం చెక్కపెల్లిలో సింగిల్ విండో ఆధ్వర్యంలో ఏర్పాటు చేసిన ధాన్యం కొనుగోలు కేంద్రాన్ని ఆయన ప్రారంభించారు. ఈ సందర్భంగా మాట్లాడుతూ రైతుల సంక్షేమానికి కాంగ్రెస్ ప్రభుత్వం అత్యంత ప్రాధాన్యత ఇస్తోందని తెలిపారు.

2006లో దివంగత ముఖ్యమంత్రి వైఎస్ రాజశేఖర్ రెడ్డి హయాంలో కాంగ్రెస్ ప్రభుత్వం ధాన్యం కొనుగోలు కేంద్రాలను ప్రారంభించి రైతులకు భరోసా కల్పించిందని ఆది శ్రీనివాస్ గుర్తుచేశారు. అప్పటి నుంచి ప్రభుత్వ ఆధ్వర్యంలో ఐకేపీ, పీఏసీఎస్, మార్కెట్ కమిటీలు, డీసీఎంఎస్ తదితర సంస్థల ద్వారా ధాన్యం కొనుగోలు చేస్తూ రైతులకు అండగా నిలుస్తున్నామని చెప్పారు. కేంద్ర ప్రభుత్వం పంటలకు మద్దతు ధర ప్రకటించినప్పటికీ, కొనుగోళ్లలో తగిన భరోసా లేకపోతే రైతులు ప్రైవేటు వ్యాపారుల చేతుల్లో నష్టపోయే ప్రమాదం ఉందన్నారు.

ఈ పరిస్థితిని నివారించేందుకు కొనుగోలు కేంద్రాలు ఉపయోగపడుతున్నాయని వివరించారు. ముఖ్యమంత్రి రేవంత్ రెడ్డి నేతృత్వంలోని ప్రజా ప్రభుత్వం సన్న వడ్లకు క్వింటాలుకు రూ.500 బోనస్ అందిస్తూ రైతులకు ఆర్థిక ప్రయోజనం కల్పిస్తోందని ఆది శ్రీనివాస్ తెలిపారు. తెలంగాణ నేల స్వభావానికి అనుకూలమైన ఏడు రకాల సన్న వడ్లను సాగు చేయాలని ప్రభుత్వం రైతులకు సూచించిందని చెప్పారు. దీనివల్ల బహిరంగ మార్కెట్‌లోనూ మంచి ధర లభించే అవకాశం ఉంటుందని, ఒకవేళ మార్కెట్‌లో ఆశించిన ధర రాకపోతే ప్రభుత్వం మద్దతు ధరతో పాటు బోనస్ చెల్లించి ధాన్యాన్ని కొనుగోలు చేస్తుందని స్పష్టం చేశారు.

ఏడు రకాల సన్న వడ్ల సాగుపై ప్రతిపక్షాలు చేస్తున్న విమర్శలను ప్రస్తావిస్తూ.. రైతులకు మేలు జరగాలనే ఉద్దేశంతోనే ప్రభుత్వం ఈ నిర్ణయం తీసుకుందని పేర్కొన్నారు. రైతు వేదికల వద్ద విత్తన మేళాలు నిర్వహించి, వ్యవసాయ శాఖ అధికారుల ద్వారా రైతులకు అవగాహన కల్పించామని తెలిపారు. వీడియో కాన్ఫరెన్స్‌ల ద్వారా కూడా రైతులకు సాగు పద్ధతులు, విత్తన రకాలపై అవగాహన కల్పించే కార్యక్రమాలు చేపట్టినట్లు వివరించారు.

రైతులకు ఉచిత విద్యుత్ అందించడం, ధాన్యం కొనుగోలు కేంద్రాలు ఏర్పాటు చేయడం వంటి కార్యక్రమాలను గతంలో వైఎస్ రాజశేఖర్ రెడ్డి నాయకత్వంలోని కాంగ్రెస్ ప్రభుత్వం చేపట్టిందని ఆది శ్రీనివాస్ అన్నారు. ప్రస్తుత ప్రభుత్వం కూడా రైతుల సంక్షేమం కోసం అనేక చర్యలు తీసుకుంటోందని తెలిపారు. రెండు లక్షల రూపాయల వరకు పంట రుణమాఫీ పథకం ద్వారా రాష్ట్రంలో 25.25 లక్షల రైతు కుటుంబాలకు రూ.20,650 కోట్ల మేర ప్రయోజనం చేకూర్చినట్లు పేర్కొన్నారు.

రైతును రాజుగా చేయాలన్నదే ప్రజా ప్రభుత్వ లక్ష్యమని, రైతు పండించిన పంటకు గిట్టుబాటు ధర లభించేలా ప్రభుత్వం నిరంతరం కృషి చేస్తోందని చెప్పారు. నకిలీ విత్తనాలను అరికట్టడంతో పాటు నాణ్యమైన విత్తనాలు రైతులకు అందేలా చర్యలు తీసుకుంటున్నామని తెలిపారు. రైతులను ఇబ్బందులకు గురిచేసే వారిపై కఠిన చర్యలు తీసుకుంటామని స్పష్టం చేశారు..

ధాన్యం కొనుగోలు కేంద్రాలకు రైతులు నిబంధనలకు అనుగుణంగా, 17 శాతం తేమ పరిమితిని దృష్టిలో ఉంచుకుని ధాన్యాన్ని తీసుకురావాలని ఆది శ్రీనివాస్ సూచించారు. పీఏసీఎస్, ఐకేపీ కేంద్రాల నిర్వాహకులకు రైతులు సహకరించాలని కోరారు. బహిరంగ మార్కెట్‌లో మద్దతు ధర కంటే ఎక్కువ ధర లభిస్తే రైతులు అక్కడ విక్రయించుకోవచ్చని, ఆశించిన ధర లభించని పరిస్థితుల్లో ప్రభుత్వ కొనుగోలు కేంద్రాలు అండగా ఉంటాయని భరోసా ఇచ్చారు.

ధాన్యం కోతలు పూర్తయిన ప్రాంతాల్లో వెంటనే కొనుగోలు కేంద్రాలను ప్రారంభించాలని జిల్లా కలెక్టర్‌కు సూచించినట్లు తెలిపారు. సిరిసిల్ల ప్రాంతంలోనూ కొనుగోలు ప్రక్రియ ప్రారంభమైందని, కోతలు పూర్తయిన గ్రామాల్లో దశలవారీగా కేంద్రాలను అందుబాటులోకి తీసుకొస్తామని చెప్పారు. కొనుగోలు ప్రక్రియలో రైతులకు ఎలాంటి సమస్యలు ఎదురైనా వ్యవసాయ శాఖ అధికారులు, కేంద్రాల నిర్వాహకుల దృష్టికి తీసుకురావాలి.