Siricilla: 24వ రోజుకు చేరిన ఎన్హెచ్ఎం ఉద్యోగుల సమ్మె సిరిసిల్లలో నిరసనలు

రాజన్న సిరిసిల్ల జిల్లా: జాతీయ ఆరోగ్య మిషన్ (NHM) పరిధిలో పనిచేస్తున్న కాంట్రాక్ట్, ఔట్‌సోర్సింగ్ ఉద్యోగుల నిరవధిక సమ్మె రాజన్న సిరిసిల్ల జిల్లాలో 24వ రోజుకు చేరింది. ఉద్యోగ భద్రత, క్రమబద్ధీకరణ, సమాన పనికి సమాన వేతనం కల్పించాలనే ప్రధాన డిమాండ్లతో ఉద్యోగులు శాంతియుతంగా ధర్నా కొనసాగిస్తున్నారు. తమ సమస్యలపై ప్రభుత్వం తక్షణమే స్పందించి న్యాయం చేయాలని కోరుతున్నారు.

సమ్మె శిబిరాన్ని సందర్శించిన పలువురు కార్యకర్తలు, వివిధ సంఘాల ప్రతినిధులు NHM ఉద్యోగులకు సంఘీభావం ప్రకటించారు. ప్రజారోగ్య వ్యవస్థలో కీలక సేవలు అందిస్తున్న ఉద్యోగుల సమస్యలను ప్రభుత్వం నిర్లక్ష్యం చేయకుండా వెంటనే పరిష్కరించాలని డిమాండ్ చేశారు.

దీర్ఘకాలంగా NHM పరిధిలో సేవలందిస్తున్న కాంట్రాక్ట్, ఔట్‌సోర్సింగ్ ఉద్యోగులకు ఉద్యోగ భద్రత కల్పించాలని, వారిని క్రమబద్ధీకరించాలని ఉద్యోగులు కోరుతున్నారు. సమాన పనికి సమాన వేతనం అమలు చేయడంతో పాటు మహిళా ఉద్యోగులకు వేతనంతో కూడిన ప్రసూతి సెలవులు, ఆరోగ్య బీమా వంటి సంక్షేమ సదుపాయాలు కల్పించాలని డిమాండ్ చేస్తున్నారు.

రాష్ట్రవ్యాప్తంగా సుమారు 17 వేల మందికి పైగా NHM ఉద్యోగులు సమ్మెలో పాల్గొంటున్నట్లు ఉద్యోగ సంఘాలు పేర్కొంటున్నాయి. వీరిలో అధిక సంఖ్యలో మహిళా ఉద్యోగులు ఉన్నారని, ఉద్యోగ భద్రత లేకుండానే ప్రజలకు వైద్య సేవలు అందిస్తున్నారని ఆవేదన వ్యక్తం చేస్తున్నారు.

ప్రభుత్వం NHM ఉద్యోగ సంఘాలతో చర్చలు జరిపి న్యాయమైన డిమాండ్లకు పరిష్కారం చూపాలని సమ్మె నాయకులు, మద్దతుదారులు కోరుతున్నారు. తమ డిమాండ్లపై ప్రభుత్వం సానుకూల నిర్ణయం తీసుకునే వరకు నిరవధిక సమ్మె కొనసాగిస్తామని ఉద్యోగులు స్పష్టం చేశారు.