Sircilla: సిరిసిల్ల కాంగ్రెస్‌లో కలకలం రేపుతున్న అసమ్మతి కరపత్రం!
Sircilla: రాజన్న సిరిసిల్ల కాంగ్రెస్‌లో అసమ్మతి స్వరం. పదేళ్లుగా కష్టపడిన కార్యకర్తలకు న్యాయం జరగలేదంటూ వైరల్‌గా మారిన కరపత్రం. కలకలం రేపుతున్న ఆరోపణలు.
Sircilla: సిరిసిల్ల కాంగ్రెస్‌లో కలకలం రేపుతున్న అసమ్మతి కరపత్రం!
Sircilla: రాజన్న సిరిసిల్ల జిల్లాలో కాంగ్రెస్ పార్టీ అంతర్గత వ్యవహారాలు మరోసారి చర్చనీయాంశంగా మారాయి. స్థానిక కాంగ్రెస్ నాయకుల తీరుపై ఓ కార్యకర్త తీవ్ర ఆవేదన వ్యక్తం చేసినట్లుగా రూపొందించిన కరపత్రం సోషల్ మీడియాలో వైరల్‌గా మారింది. పార్టీ కోసం పదేళ్లుగా కష్టపడి, పోరాటాలు చేసి, కేసులు ఎదుర్కొన్న కార్యకర్తలకు న్యాయం చేయాలని కోరుతూ కరపత్రంలో ప్రస్తావించిన అంశాలు రాజకీయ వర్గాల్లో ఆసక్తిని రేకెత్తిస్తున్నాయి.
టీపీసీసీ అధ్యక్షుడు, ప్రభుత్వ విప్, డీసీసీ అధ్యక్షుడు, నియోజకవర్గ ఇన్‌ఛార్జిని ఉద్దేశిస్తూ మొదలైన ఈ కరపత్రంలో.. పార్టీ కోసం కష్టపడిన కార్యకర్తలకు గుర్తింపు దక్కడం లేదని ఆవేదన వ్యక్తం చేశారు. సిరిసిల్లలో పార్టీ గెలవకపోయినా, రాష్ట్రంలో కాంగ్రెస్ అధికారంలో ఉందనే ఆనందం కూడా లేకుండా స్థానిక నాయకుల వ్యవహారశైలి ఉందంటూ తీవ్ర అసంతృప్తి వ్యక్తం చేశారు.
ప్రతిపక్ష నాయకుడిని మళ్లీ గెలిపించేందుకు పార్టీలో కొందరు కోవర్టులుగా పనిచేస్తున్నారనే ఆరోపణలను కరపత్రంలో ప్రస్తావించారు. ప్రతిపక్ష నేత విష కౌగిలి కోసమే కొందరు ఆతృత చూపుతున్నట్లు కనిపిస్తోందని పేర్కొన్నారు. పార్టీ కోసం పోరాడిన కార్యకర్తలను పక్కనపెట్టి, తమకు ఇష్టమైన వారికి పదవులు కట్టబెట్టే పరిస్థితి ఉందంటూ విమర్శించారు.
పార్టీ అధికారంలోకి వచ్చి మూడు సంవత్సరాలు గడిచినా, సిరిసిల్లలో కాంగ్రెస్ పార్టీ బలోపేతం కోసం పెద్ద నాయకులు పట్టించుకోవడం లేదని కరపత్రంలో ఆరోపించారు. భారీ బహిరంగ సభ నిర్వహణ వెనుక ఆంతర్యం ఏమిటని ప్రశ్నించారు. పార్టీ కోసం పదేళ్లపాటు పోరాడి కేసులు ఎదుర్కొన్న కార్యకర్తలకు కనీస న్యాయం చేయాలని కోరారు.
కరపత్రం చివరలో.. ప్రతిపక్ష నాయకుడే మళ్లీ గెలవాలనుకుంటే పార్టీలో మీ ఇష్టం వచ్చిన వారికి పదవులు ఇచ్చుకోండి.. కానీ పదేళ్లుగా పార్టీ కోసం పోరాడి కేసుల పాలైన తమపై ఉన్న కేసులనైనా తొలగించాలని వేడుకుంటున్నట్లు పేర్కొన్నారు.
ఈ కరపత్రం సిరిసిల్ల కాంగ్రెస్‌లోని అసంతృప్తికి అద్దం పడుతోందా? లేక కార్యకర్తల ఆవేదనను వ్యక్తం చేసే ప్రయత్నమా? అన్న చర్చ స్థానికంగా సాగుతోంది. కరపత్రంలో చేసిన ఆరోపణలపై సంబంధిత కాంగ్రెస్ నాయకుల స్పందన వెలువడాల్సి ఉంది.
అసలు సిరిసిల్ల కాంగ్రెస్ పార్టీలో ఏం జరుగుతోంది? పార్టీ కోసం కష్టపడిన కార్యకర్తలకు న్యాయం జరిగేనా? అనే ప్రశ్నలు ప్రస్తుతం స్థానిక రాజకీయ వర్గాల్లో ఆసక్తిని రేకెత్తిస్తున్నాయి.
