Sircilla: సిరిసిల్ల కౌన్సిల్‌లో 21 తీర్మానాలకు ఆమోదం.. నీటి వృథాపై కఠినం

సిరిసిల్ల: సిరిసిల్ల పురపాలక సంఘ కౌన్సిల్ హాలులో చైర్‌పర్సన్ అధ్యక్షతన నిర్వహించిన సాధారణ సమావేశంలో మొత్తం 21 అంశాలకు కౌన్సిల్ ఆమోదం తెలిపింది. పట్టణంలో పారిశుధ్య నిర్వహణ, తాగునీటి సరఫరా, ఘన వ్యర్థాల నిర్వహణ, మౌలిక సదుపాయాల అభివృద్ధికి సంబంధించి పలు కీలక నిర్ణయాలు తీసుకున్నారు.

సిరిసిల్ల మున్సిపాలిటీ పరిధిలోని గృహాలు, వాణిజ్య సముదాయాలు, బహిరంగ ప్రదేశాల్లో ఘన వ్యర్థాల నిర్వహణ కోసం తడి, పొడి, సానిటరీ, హానికర వ్యర్థాలను వేర్వేరుగా సేకరించేందుకు నాలుగు రకాల డస్ట్‌బిన్ల కొనుగోలుకు రూ.12.50 లక్షల పరిపాలనా మంజూరు ఇచ్చారు.

పట్టణంలో పారిశుధ్య నిర్వహణకు ట్రాక్టర్లు, తాగునీటి సరఫరా కోసం ట్యాంకర్ల కొనుగోలుకు రూ.55 లక్షలు కేటాయిస్తూ ఆమోదం తెలిపారు. 9వ వార్డు సర్దాపూర్‌లోని స్మశానవాటిక అభివృద్ధికి రూ.12 లక్షలు కేటాయించారు.

పట్టణంలోని వివిధ వార్డుల్లో డ్రైనేజీల నిర్మాణం, సీసీ రోడ్ల నిర్మాణం, ఇతర అభివృద్ధి పనులకు సంబంధించి మొత్తం 14 పనుల కోసం రూ.29 లక్షలు కేటాయిస్తూ పరిపాలనా మంజూరు ఇచ్చారు.

నీటి వృథా చేస్తే రూ.2 వేల వరకు జరిమానా

వాతావరణ మార్పులు, ఎల్‌నినో ప్రభావంతో ఎండల తీవ్రత పెరిగి తాగునీటి లభ్యతపై ప్రభావం పడే అవకాశం ఉన్న నేపథ్యంలో నీటిని పొదుపుగా వినియోగించాలని కౌన్సిల్ సూచించింది. సిరిసిల్ల పట్టణంలోని మున్సిపల్ నల్లా కనెక్షన్లు కలిగిన ప్రతి ఇంటి యజమాని తప్పనిసరిగా ఆన్/ఆఫ్ వాల్వులు ఏర్పాటు చేసుకోవాలని నిర్ణయించింది.

అవసరమైనప్పుడు మాత్రమే నీటిని వినియోగించుకోవడం ద్వారా నీటి వృథాను అరికట్టాలని సూచించారు. నల్లా కనెక్షన్లకు ఆన్/ఆఫ్ వాల్వులు ఏర్పాటు చేయకుండా నీటిని వృథా చేసే ఇంటి యజమానులకు మున్సిపల్ నిబంధనల ప్రకారం రూ.2,000 వరకు జరిమానా విధించేందుకు కౌన్సిల్ ఆమోదం తెలిపింది.

సమావేశంలో పాల్గొన్న అధికారులు, ప్రజాప్రతినిధులు

ఈ సమావేశంలో వైస్ చైర్మన్, వార్డు సభ్యులు, కో-ఆప్షన్ సభ్యులు, మున్సిపల్ కమిషనర్, డిప్యూటీ ఎగ్జిక్యూటివ్ ఇంజనీర్, అసిస్టెంట్ ఇంజనీర్, టౌన్ ప్లానింగ్ అధికారులు, శానిటరీ ఇన్‌స్పెక్టర్, అకౌంట్స్ అధికారులు, ఇతర మున్సిపల్ సిబ్బంది పాల్గొన్నారు.