Sircilla: తహసీల్దార్లు క్షేత్రస్థాయిలో రీ సర్వేను పరిశీలించాలి

సిరిసిల్ల: భూముల రీ సర్వే ప్రక్రియను తహసీల్దార్లు క్షేత్రస్థాయిలో కచ్చితంగా పరిశీలించి, పారదర్శకంగా జరిగేలా చూడాలని జిల్లా అదనపు కలెక్టర్ గడ్డం నగేష్ ఆదేశించారు. భూముల రీ సర్వే పురోగతిపై శనివారం ఐడీఓసీ నుంచి సిరిసిల్ల, వేములవాడ ఆర్డీఓలు, తహసీల్దార్లు, మండల సర్వేయర్లతో అదనపు కలెక్టర్ టెలీ కాన్ఫరెన్స్ నిర్వహించారు. ఈ సందర్భంగా రీ సర్వే ప్రక్రియపై అధికారులకు పలు సూచనలు చేశారు.

రీ సర్వే సమయంలో భూముల హద్దులను క్షేత్రస్థాయిలో పరిశీలించి, సరిహద్దులను కచ్చితంగా నమోదు చేయాలని సూచించారు. భూ యజమానులకు ఎలాంటి ఇబ్బందులు తలెత్తకుండా నిబంధనల ప్రకారం సర్వే నిర్వహించాలని స్పష్టం చేశారు. సర్వే చేపట్టే సమయంలో భూముల రికార్డులతో పాటు క్షేత్రస్థాయి పరిస్థితులను క్షుణ్ణంగా పరిశీలించాలని తెలిపారు.

సర్వేలో గుర్తించిన అంశాలను సంబంధిత రికార్డుల్లో సక్రమంగా నమోదు చేయాలని, ఏవైనా సమస్యలు ఎదురైతే జిల్లా యంత్రాంగం దృష్టికి తీసుకురావాలని అధికారులకు సూచించారు.

జిల్లాలోని అన్ని మండలాల్లో నాయబ్ తహసీల్దార్లు, రెవెన్యూ అధికారులు, మండల, లైసెన్సుడ్ సర్వేయర్లతో మొత్తం 26 బృందాలు భూముల రీ సర్వే ప్రక్రియలో నిమగ్నమై ఉన్నాయని అదనపు కలెక్టర్ తెలిపారు. నిర్దేశించిన లక్ష్యాల మేరకు రీ సర్వే ప్రక్రియను పూర్తి చేసేందుకు సంబంధిత అధికారులు సమన్వయంతో పనిచేయాలని ఆదేశించారు.