Karimnagar: శాతవాహన వర్సిటీలో మెస్ బకాయిలతో ఫలితాల నిలిపివేత!

Karimnagar: శాతవాహన యూనివర్సిటీలో హాస్టల్ మెస్ బకాయిలు చెల్లించలేదనే కారణంతో పలువురు విద్యార్థుల నాలుగో సెమిస్టర్ పరీక్షా ఫలితాలను నిలిపివేశారని విద్యార్థులు ఆరోపిస్తున్నారు. ఈ చర్యతో తమ విద్యా భవిష్యత్తుపై ప్రభావం పడుతోందని, ఫలితాల విడుదలపై స్పష్టత లేక ఆందోళనకు గురవుతున్నామని వారు ఆవేదన వ్యక్తం చేస్తున్నారు.

విద్యార్థుల ఆరోపణల ప్రకారం, పరీక్ష హాల్‌టికెట్ల జారీ సమయంలో పెండింగ్ ఫీజులు, హాస్టల్ మెస్ బకాయిలను నిర్ణీత గడువులోగా చెల్లిస్తామని పేర్కొంటూ అండర్‌టేకింగ్ లేఖపై సంతకాలు తీసుకున్నారు. పరీక్షకు కొద్దిసేపటి ముందు ఈ ప్రక్రియ చేపట్టడంతో ఒత్తిడికి లోనై సంతకాలు చేయాల్సి వచ్చిందని విద్యార్థులు చెబుతున్నారు. ప్రస్తుతం బకాయిలు చెల్లించని విద్యార్థుల ఫలితాలు నిలిపివేయడంతో సమస్య మరింత తీవ్రమైందని ఆవేదన వ్యక్తం చేస్తున్నారు.

ఫలితాల నిలిపివేతపై చట్టపరమైన ప్రశ్నలు..

ఫీజు బకాయిల కారణంగా విద్యార్థుల విద్యా ధ్రువపత్రాలను నిలిపివేసిన అంశాలపై గతంలో న్యాయస్థానాలు విద్యార్థులకు అనుకూలంగా ఉపశమనం కల్పించిన సందర్భాలు ఉన్నాయి. ఈ నేపథ్యంలో, హాస్టల్ మెస్ బకాయిల కారణంగా సెమిస్టర్ ఫలితాలను నిలిపివేయడానికి విశ్వవిద్యాలయానికి ఏ నిబంధనల ప్రకారం అధికారం ఉందో స్పష్టం చేయాలని విద్యార్థులు కోరుతున్నారు.

బకాయిల వసూలుకు నిబంధనల ప్రకారం చర్యలు తీసుకోవచ్చు. అయితే, వాటి కారణంగా పరీక్షా ఫలితాలను నిలిపివేయడం సమంజసమేనా, దానికి చట్టపరమైన ఆధారం ఏమిటి అనే ప్రశ్నలు వ్యక్తమవుతున్నాయి. అండర్‌టేకింగ్‌పై సంతకం తీసుకున్నంత మాత్రాన ఫలితాల నిలిపివేత చట్టబద్ధమవుతుందా అనే అంశంపైనా స్పష్టత అవసరమని విద్యార్థులు పేర్కొంటున్నారు.

సమస్యకు త్వరగా పరిష్కారం లభించకపోతే యూనివర్సిటీ గ్రాంట్స్ కమిషన్ (UGC), సంబంధిత ఉన్నతాధికారులను ఆశ్రయించడంతో పాటు, అవసరమైతే తెలంగాణ హైకోర్టును సంప్రదించి న్యాయపరమైన పరిష్కారం కోరుతామని విద్యార్థులు తెలిపారు. ఈ వ్యవహారంపై శాతవాహన యూనివర్సిటీ అధికారుల అధికారిక స్పందన తెలియాల్సి ఉంది.