Sircilla: చంద్రంపేట-బైపాస్ 80 ఫీట్ల రోడ్డు నిర్మించాలి: నిరసన!

సిరిసిల్ల: రాజన్న సిరిసిల్ల జిల్లా కేంద్రంలోని చంద్రంపేట ఎక్స్‌ రోడ్డు నుంచి మొదటి బైపాస్‌ను కలుపుతూ 80 ఫీట్ల రోడ్డు నిర్మాణ పనులను వెంటనే చేపట్టాలని డిమాండ్ చేస్తూ పలువురు నాయకులు సిరిసిల్ల మున్సిపల్ కార్యాలయం ఎదుట నిరసన తెలిపారు.

గత ప్రభుత్వ హయాంలో ఈ రోడ్డు నిర్మాణానికి మంజూరు లభించినప్పటికీ ఇప్పటివరకు పనులు ప్రారంభించలేదని నిరసనకారులు పేర్కొన్నారు. దీంతో ఆ ప్రాంతంలోని పంట పొలాలకు వెళ్లే రైతులు తీవ్ర ఇబ్బందులు ఎదుర్కొంటున్నారని తెలిపారు. రోడ్డు స్థలం ఆక్రమణకు గురవుతున్నా ప్రజాప్రతినిధులు, మున్సిపల్ అధికారులు పట్టించుకోవడం లేదని విమర్శించారు.

మొదటి బైపాస్ చివరలో ఉన్న చేపూరి బుచ్చయ్య రోడ్డు నిర్మాణానికి ఆటంకాలు కల్పిస్తున్నారని నిరసనకారులు ఆరోపించారు. ప్రజలకు ఉపయోగపడే రోడ్డు నిర్మాణానికి అడ్డంకులు ఎదురవుతున్నప్పటికీ సంబంధిత అధికారులు, ప్రజాప్రతినిధులు ఎందుకు చర్యలు తీసుకోవడం లేదని ప్రశ్నించారు.

ఈ రోడ్డు నిర్మాణం పూర్తయితే చంద్రంపేటతో పాటు శ్రీనగర్ కాలనీ, శాంతినగర్ ప్రాంతాల ప్రజలకు రవాణా సౌకర్యం మెరుగుపడుతుందని పేర్కొన్నారు. ఇప్పటికైనా అధికారులు, మున్సిపల్ ప్రజాప్రతినిధులు స్పందించి రోడ్డు నిర్మాణ పనులను త్వరగా పూర్తి చేయాలని డిమాండ్ చేశారు. లేనిపక్షంలో రోడ్డు వద్ద టెంట్ వేసి త్వరలోనే ఆందోళన కార్యక్రమాలు చేపడతామని హెచ్చరించారు.

ఈ నిరసన కార్యక్రమంలో AIFTU న్యూ రాష్ట్ర కార్యవర్గ సభ్యుడు కామ్రేడ్ సోమిశెట్టి దశరథంతో పాటు అన్నారపు శ్రీనివాస్, గుజ్జే దేవదాస్, కొంపెల్లి విజయ్ కుమార్, వేముల మనోజ్, గోవర్ధన్ సిరిమల్ల, బాలసాని రాజు గౌడ్, రాచర్ల ఆంజనేయులు, అన్నారపు తేజ, పోతుగంటి పురుషోత్తం, చిటికెన దేవదాసు తదితరులు పాల్గొన్నారు.