Chandurthi: యూరిన్ కిట్లతో గంజాయి వ్యసనపరుల పట్టివేత!

Chandurthi: రాజన్న సిరిసిల్ల జిల్లా, చందుర్తి సర్కిల్ పరిధిలోని చందుర్తి, రుద్రంగి మరియు కోనరావుపేట మండలాల్లో గంజాయి రవాణా, విక్రయాలు మరియు వినియోగంపై ఉక్కుపాదం మోపుతున్నట్లు చందుర్తి సర్కిల్ ఇన్స్పెక్టర్ ఆఫ్ పోలీస్ కె. రవీందర్ తెలిపారు. ఇదే క్రమంలో, నిన్న నిర్వహించిన తనిఖీలలో ముగ్గురు వ్యసనపరులను పట్టుకొని, ఈ రోజు వారిని న్యాయస్థానానికి తరలించడం జరుగుతోందని ఆయన వెల్లడించారు.

గంజాయి అక్రమ దందాకు స్వస్తి చెప్పేందుకు ఒకవైపు విస్తృత తనిఖీలు చేపడుతూనే, మరోవైపు గంజాయి వినియోగదారులను (వ్యసనపరులను) సాంకేతికంగా పట్టుకోవడానికి నూతనంగా అందుబాటులోకి వచ్చిన "యూరిన్ టెస్ట్ E-Z స్ప్లిట్ కీ డ్రగ్ స్క్రీన్ కిట్లను" సమర్థవంతంగా వినియోగిస్తున్నామని సీఐ పేర్కొన్నారు.

ఇందులో భాగంగా, నిన్న సనుగుల గ్రామ శివారులో పోలీసులు తనిఖీలు నిర్వహిస్తుండగా సనుగుల గ్రామానికి చెందిన ఒక్క వ్యక్తి అనుమానాస్పదంగా కనిపించడంతో వారిని అదుపులోకి తీసుకున్నారు. మరియు సనుగుల గ్రామ జమ్మి గద్దె వద్ద కూడా పోలీస్ వారికి మరో ఇద్దరు మరుపాక గ్రామానికి చెందిన వ్యక్తులు అనుమానాస్పదంగా కనిపించడంతో వారిని అదుపులోకి తీసుకున్నారు.

మొత్తం ముగ్గురి కి "యూరిన్ టెస్ట్ E-Z స్ప్లిట్ కీ డ్రగ్ స్క్రీన్ కిట్ల" ద్వారా పరీక్ష చేయగా, వారి మూత్ర నమూనాలలో గంజాయిలోని ప్రధాన రసాయన పదార్థమైన THC (Tetrahydrocannabinol) ఆనవాళ్లు ఉన్నట్లు 'పాజిటివ్' అని తేలింది. దీని ద్వారా వారు గంజాయి సేవించినట్లు తక్షణమే ప్రాథమికంగా నిర్ధారించి, అదుపులోకి తీసుకుని తదుపరి చర్యల నిమిత్తం కోర్టుకు తరలించడం జరుగుతోంది. ఈ ఆపరేషన్‌లో ప్రతిభ కనబరిచిన చందుర్తి ఎస్సై రమేష్‌ను మరియు స్టేషన్ సిబ్బందిని సర్కిల్ ఇన్స్పెక్టర్ కె. రవీందర్ అభినందించారు.

పునరావాసం మరియు చట్టపరమైన చర్యలు: గంజాయి బానిసలైన వారిని కేవలం శిక్షించడమే కాకుండా, వారి జీవితాల్లో సానుకూల మార్పు తీసుకురావడమే పోలీసు శాఖ ముఖ్య ఉద్దేశమని సీఐ తెలిపారు. ఈ పరీక్షల ద్వారా పట్టుబడిన వ్యసనపరులకు ప్రత్యేక కౌన్సెలింగ్ ఇచ్చి, ప్రభుత్వ ఆధ్వర్యంలోని రిహాబిలిటేషన్ (పునరావాస) కేంద్రాలకు తరలించి వారిలో పరివర్తన తెచ్చేందుకు చర్యలు తీసుకుంటున్నామని వెల్లడించారు.

ప్రజలకు సర్కిల్ ఇన్స్పెక్టర్ కె. రవీందర్ గారి హెచ్చరిక / విజ్ఞప్తి:

"గంజాయిని విక్రయించినా, కొనుగోలు చేసినా, రవాణా చేసినా లేదా సేవించినా చట్టపరమైన తీవ్ర పరిణామాలు ఎదుర్కోక తప్పదు. ఆధునిక సాంకేతిక పరిజ్ఞానం అందుబాటులోకి వచ్చినందున వ్యసనపరులు చట్టం నుంచి తప్పించుకునే అవకాశం ఎంతమాత్రమూ లేదు.

యువత గంజాయి వంటి మహమ్మారికి దూరంగా ఉండి తమ బంగారు భవిష్యత్తును పాడుచేసుకోవద్దని విజ్ఞప్తి చేస్తున్నాము. ప్రజా ఆరోగ్యం మరియు సమాజంలో శాంతిభద్రతల పరిరక్షణకు ప్రతి ఒక్కరూ పోలీసులకు సహకరించాలి. గ్రామాలు లేదా పట్టణాల్లో గంజాయి విక్రయాలు, వినియోగం గురించిన సమాచారం ఏమైనా ఉంటే వెంటనే పోలీసులకు తెలియజేయగలరు. సమాచారం అందించిన వారి వివరాలు పూర్తిగా గోప్యంగా ఉంచబడతాయి.".