Peddapalli: డ్రగ్స్ రహిత సమాజానికి కృషి చేయాలి: పెద్దపల్లి డీసీపీ రామ్ రెడ్డి!

పెద్దపల్లి: యువత, విద్యార్థులు మాదకద్రవ్యాలకు, చెడు అలవాట్లకు దూరంగా ఉంటూ ఉన్నత లక్ష్య సాధనతో ఉజ్వల భవిష్యత్తును నిర్మించుకోవాలని పెద్దపల్లి డీసీపీ బి. రామ్ రెడ్డి పిలుపునిచ్చారు. బుధవారం ఓదెలలోని తెలంగాణ మోడల్ స్కూల్ ప్రాంగణంలో విద్యార్థుల్లో మత్తు పదార్థాల వినియోగం వల్ల కలిగే దుష్పరిణామాలపై ప్రత్యేక యాంటీ డ్రగ్ అవగాహన సదస్సును నిర్వహించారు.

​ఈ కార్యక్రమానికి ముఖ్య అతిథిగా హాజరైన డీసీపీ రామ్ రెడ్డి మాట్లాడుతూ... విద్యార్థి దశ నుంచే మంచి నడవడికను అలవర్చుకోవాలని, మత్తు పదార్థాల బారిన పడి జీవితాలను నాశనం చేసుకోవద్దని సూచించారు. అనంతరం ప్రముఖ మోటివేషనల్ స్పీకర్ ఎస్.పి. నాయక్ మహారాజ్ మాట్లాడుతూ, యువత తమలోని అనంతమైన శక్తిని సరైన మార్గంలో మళ్లించి సమాజ శ్రేయస్సుకు మరియు దేశాభివృద్ధికి తోడ్పడాలని ప్రేరణాత్మక ప్రసంగం చేశారు.

​పోలీస్ శాఖ ఆధ్వర్యంలో కఠిన చర్యలు: సదస్సులో పాల్గొన్న పెద్దపల్లి ఏసీపీ జి. కృష్ణ, సుల్తానాబాద్ సర్కిల్ ఇన్‌స్పెక్టర్ పి. రంజిత్ రావు, కాల్వ శ్రీరాంపూర్ ఎస్ఐ జి. సుధాకర్, పొత్కపల్లి ఎస్ఐ సనత్ కుమార్ మాట్లాడుతూ... సమాజంలో డ్రగ్స్ నిర్మూలనకు మరియు డ్రగ్స్ రహిత సమాజ స్థాపనకు పోలీస్ శాఖ శ్రమిస్తోందని, నిబంధనలు ఉల్లంఘించే వారిపై కఠిన చర్యలు ఉంటాయని స్పష్టం చేశారు.

​ఈ అవగాహన సదస్సులో తెలంగాణ మోడల్ స్కూల్ ప్రిన్సిపాల్, ప్రభుత్వ జూనియర్ కళాశాల ప్రిన్సిపాల్, కేజీబీవీ (KGBV) జూనియర్ కళాశాల ప్రిన్సిపాల్, వివిధ పాఠశాలల ఉపాధ్యాయులు మరియు దాదాపు 150 మంది విద్యార్థులు ఎంతో ఉత్సాహంగా పాల్గొన్నారు.ఈ కార్యక్రమంలో ఏసీపీ గజ్జి కృష్ణ,సుల్తానాబాద్ సీఐ రంజిత్ రావు, పోత్కపల్లి ఎస్ఐ సనత్ రెడ్డి ప్రభుత్వ జూనియర్ కళాశాల ప్రిన్సిపాల్ అమరేందర్ కస్తూర్బా పాఠశాల ప్రిన్సిపల్ జ్యోతి సర్పంచ్లు కనకిరెడ్డి సతీష్, నిమ్మ నాయక్, కాల్వ శ్రీరాంపూర్ ఎస్సై గట్ల సుధాకర్ పోలీసు సిబ్బంది, పాఠశాల ఉపాధ్యాయులు తదితరులు పాల్గొన్నారు.