Jagtial: జగిత్యాలలో ఎంపీ ధర్మపురి అరవింద్ విస్తృత పర్యటన

జగిత్యాల: నిజామాబాద్ ఎంపీ ధర్మపురి అరవింద్ జగిత్యాల పట్టణంలో విస్తృతంగా పర్యటించారు. పర్యటనలో భాగంగా పట్టణంలోని 4, 5వ వార్డుల పరిధిలో ఉన్న మోత చెరువు కట్ట వద్ద కేంద్ర ప్రభుత్వ నిధులతో చేపడుతున్న వివిధ అభివృద్ధి పనులను ఆయన క్షేత్రస్థాయిలో పరిశీలించారు.

పనుల్లో నాణ్యత పాటించాలి:

ఈ సందర్భంగా పనుల పురోగతిపై స్థానిక ప్రజలు, సంబంధిత అధికారులతో ఎంపీ మాట్లాడి వివరాలు అడిగి తెలుసుకున్నారు. పనుల నాణ్యత విషయంలో ఎక్కడా రాజీ పడకూడదని, నాణ్యతా ప్రమాణాలు పాటిస్తూ పనులను త్వరితగతిన పూర్తి చేసి ప్రజలకు అందుబాటులోకి తీసుకురావాలని అధికారులను ఆదేశించారు. ప్రధాని నరేంద్ర మోదీ నాయకత్వంలో దేశం నలుమూలలా అభివృద్ధి పనులు వేగంగా కొనసాగుతున్నాయని అరవింద్ పేర్కొన్నారు.

ఎఫ్‌సీఆర్‌ఏ నిధులపై తీవ్ర ఆరోపణలు:

మరోవైపు కొందరు వ్యక్తుల తీరుపై ఎంపీ ధర్మపురి అరవింద్ తీవ్రస్థాయిలో ధ్వజమెత్తారు. ఎఫ్‌సీఆర్‌ఏ (FCRA) నిధులను అడ్డం పెట్టుకుని కొందరు దేశ వ్యతిరేక కార్యకలాపాలకు పాల్పడుతున్నారని ఆయన తీవ్ర ఆరోపణలు చేశారు. మతాల మధ్య చిచ్చుపెట్టి, దేశ అంతర్గత భద్రతను బలహీనపరచాలని చూసే కుట్రలను ప్రజలంతా కలిసికట్టుగా తిప్పికొట్టాలని ఈ సందర్భంగా ఎంపీ పిలుపునిచ్చారు.