Karimnagar: శ్రీ వేంకటేశ్వరస్వామి ఆలయంలో మేయర్ కొలగాని పూజలు

కరీంనగర్: కరీంనగర్ నగరపాలక సంస్థ అభివృద్ధిలో భాగంగా నగర మేయర్ కొలుగని శ్రీనివాస్ శనివారం మార్కెట్ సమీపంలోని శ్రీ వేంకటేశ్వర స్వామి దేవాలయాన్ని అధికారులతో కలిసి సందర్శించారు. ఆలయ పరిసరాల్లో నెలకొన్న డ్రైనేజీ సమస్యను ఆయన స్వయంగా తనిఖీ చేసి పరిశీలించారు.​

అనంతరం మేయర్ శ్రీ వేంకటేశ్వర స్వామివారిని దర్శించుకుని, వేద పండితుల మంత్రోచ్చారణల నడుమ ప్రత్యేక పూజలు నిర్వహించి స్వామివారికి మొక్కులు చెల్లించుకున్నారు. ఈ సందర్భంగా ఆలయ ఈవో మరియు సిబ్బంది మేయర్‌ను శాలువా, కండువాతో ఘనంగా సత్కరించారు. అనంతరం వేద పండితులు ఆయనకు ఆశీర్వచనాలు అందజేసి స్వామివారి తీర్థప్రసాదాలను అందించారు.

​ఈ సందర్భంగా మేయర్ మాట్లాడుతూ ఆలయానికి సంబంధించిన నీరు రోడ్డుపైకి రాకుండా నేరుగా డ్రైనేజీలోకి ప్రవహించేలా తక్షణమే తగిన చర్యలు తీసుకోవాలని సంబంధిత ఇంజనీరింగ్ అధికారులను ఆదేశించారు. ఆలయం వద్ద భక్తులకు ఎలాంటి ఇబ్బందులు కలగకుండా పారిశుధ్య, డ్రైనేజీ వ్యవస్థలను మెరుగుపరుచాలని సూచించారు. ఈ కార్యక్రమంలో పలువురు నగరపాలక సంస్థ అధికారులు, టెంపుల్ ఈవో, సిబ్బంది తదితరులు పాల్గొన్నారు.