Karimnagar: కామ్రేడ్ ఎడవెల్లి మోహన్ రెడ్డి మృతి ప్రజా ఉద్యమాలకు తీరని లోటు

కరీంనగర్: పేదలు, బడుగు బలహీన వర్గాల హక్కుల కోసం తన జీవితాంతం కృషి చేసిన సీపీఎం సీనియర్ నాయకులు కామ్రేడ్ ఎడవెల్లి మోహన్ రెడ్డి మరణం ప్రజా ఉద్యమాలకు, ముఖ్యంగా భారత కమ్యూనిస్టు పార్టీ (మార్క్సిస్టు) సీపీఎంకు తీరని లోటని ఆ పార్టీ జిల్లా కార్యదర్శి మిల్కూరి వాసుదేవరెడ్డి అన్నారు. కార్మికుల హక్కుల సాధనతో పాటు ప్రజా సమస్యల పరిష్కారం కోసం నిరంతరం కృషి చేసిన మోహన్ రెడ్డి సేవలు చిరస్మరణీయమని పేర్కొన్నారు.

గురువారం రోజున సిపియం జిల్లా కమిటీ ఆధ్వర్యంలో కరీంనగర్‌లోని ముకుంద లాల్ మిశ్రా భవన్‌లో కామ్రేడ్ కోనేటి నాగమణి అధ్యక్షతన నిర్వహించిన సీపీఎం సీనియర్ నాయకులు కామ్రేడ్ ఎడవెల్లి మోహన్ రెడ్డి సంస్మరణ సభలో మిల్కూరి వాసుదేవరెడ్డి పాల్గొని ఆయన చిత్రపటానికి నివాళులర్పించారు. ఈ సందర్భంగా మోహన్ రెడ్డి పార్టీకి, కార్మిక ఉద్యమానికి, వివిధ ప్రజా సంఘాలకు అందించిన సేవలను స్మరించుకున్నారు.

మిల్కూరి వాసుదేవరెడ్డి మాట్లాడుతూ, ఎడవెల్లి మోహన్ రెడ్డి ఉద్యోగ బాధ్యతలను నిర్వహిస్తూనే ప్రజా సమస్యలపై నిరంతరం స్పందిస్తూ, కార్మికుల హక్కుల పరిరక్షణకు విశేషంగా కృషి చేశారని తెలిపారు. జిల్లాలో ఆర్టీసీలో స్టాఫ్ అండ్ వర్కర్స్ ఫెడరేషన్ యూనియన్ స్థాపనలో ఆయన కీలక పాత్ర పోషించారని గుర్తుచేశారు. కార్మికులు ఎదుర్కొంటున్న సమస్యల పరిష్కారం కోసం, వారి హక్కుల సాధన కోసం సంఘటిత పోరాటాల ప్రాధాన్యతను గుర్తించి పనిచేశారని పేర్కొన్నారు.

ఉద్యోగ ధర్మాన్ని నిర్వహిస్తూనే మూడు దశాబ్దాలకు పైగా ప్రజా ఉద్యమాల్లో క్రియాశీలకంగా పనిచేయడం ఆయన నిబద్ధతకు నిదర్శనమన్నారు. పార్టీ కార్యక్రమాల్లో చురుగ్గా పాల్గొంటూ, ప్రజా సమస్యలపై జరిగే పోరాటాలకు అండగా నిలిచారని తెలిపారు. పేదలు, కార్మికులు, బడుగు బలహీన వర్గాల ప్రజలు ఎదుర్కొంటున్న సమస్యల పరిష్కారానికి తన వంతు కృషి చేయడంతో పాటు వివిధ ప్రజా సంఘాలకు సహకారం అందించారని అన్నారు.

వ్యక్తిగత ప్రయోజనాల కంటే సమాజ ప్రయోజనాలకే ప్రాధాన్యతనిస్తూ, ప్రజల సంక్షేమం కోసం పనిచేయడం ఆయన జీవితంలో ప్రధాన లక్షణమని పేర్కొన్నారు. కార్మిక వర్గం ఎదుర్కొంటున్న సమస్యలపై అవగాహన కలిగి ఉండటంతో పాటు, ప్రజా ఉద్యమాల పట్ల నిబద్ధతతో వ్యవహరించారని తెలిపారు. పార్టీ పట్ల అంకితభావం, కార్మికుల పట్ల బాధ్యత, ప్రజా సమస్యల పరిష్కారం పట్ల చిత్తశుద్ధి ఆయనను ప్రత్యేకమైన నాయకుడిగా నిలిపాయని అన్నారు.

మోహన్ రెడ్డి ఆశయాలను కొనసాగించడమే ఆయనకు అందించే నిజమైన నివాళి అని మిల్కూరి వాసుదేవరెడ్డి పేర్కొన్నారు. కార్మికుల హక్కుల పరిరక్షణకు, పేద ప్రజల సమస్యల పరిష్కారానికి, సమానత్వంతో కూడిన సమాజ నిర్మాణానికి ప్రతి ఒక్కరూ కృషి చేయాలని పిలుపునిచ్చారు. ఆయన చూపిన మార్గంలో ముందుకు సాగుతూ ప్రజా ఉద్యమాలను మరింత బలోపేతం చేయాల్సిన అవసరం ఉందని అన్నారు.

కామ్రేడ్ ఎడవెల్లి మోహన్ రెడ్డి ఆశయాలు, ప్రజల కోసం ఆయన చేసిన సేవలు పార్టీ శ్రేణులకు, కార్మిక వర్గానికి ఎల్లప్పుడూ స్ఫూర్తిగా నిలుస్తాయన్నారు. ఈ కార్యక్రమంలో సిపిఎం పార్టీ జిల్లా కార్యదర్శి వర్గ సభ్యులు వర్ణ వెంకటరెడ్డి, జి బీమా సాహెబ్, జిల్లా కమిటీ సభ్యులు ఉప్పునూటి శ్రీనివాస్,

జి.రాజేశం, డి.నరేష్ పటేల్, నాయకులు కే. అరవింద్ ,పుల్లెల మల్లయ్య, ఎంకే తాజుద్దీన్, తిరుమలయ్య, శ్రీనివాస్, శివకుమార్, అరవింద్, రాజ్ కుమార్, అశోక్, ప్రకాష్, సాయి తదితరులు పాల్గొన్నారు.