Sircilla: సిరిసిల్లలో సీఎం పర్యటనపై బీఆర్ఎస్ తీవ్ర విమర్శలు!

Sircilla: సిరిసిల్లలో ఈ నెల 30న ముఖ్యమంత్రి రేవంత్‌రెడ్డి పర్యటన, భారీ బహిరంగ సభ నేపథ్యంలో రాజకీయ విమర్శలు కొనసాగుతున్నాయి. సిరిసిల్ల తెలంగాణ భవన్‌లో చొప్పదండి మాజీ ఎమ్మెల్యే సుంకే రవిశంకర్, బీఆర్ఎస్ జిల్లా అధ్యక్షుడు తోట ఆగయ్య, పార్టీ నేతలతో కలిసి మీడియా సమావేశం నిర్వహించారు. ఈ సందర్భంగా కాంగ్రెస్ ప్రభుత్వంపై, సీఎం రేవంత్‌రెడ్డిపై పలు విమర్శలు చేశారు.

చొప్పదండి మాజీ ఎమ్మెల్యే సుంకే రవిశంకర్ మాట్లాడుతూ.. సిరిసిల్లలో సీఎం రేవంత్‌రెడ్డి సభకు హడావుడి చేస్తున్నారని, మంత్రుల వ్యాఖ్యలు కూడా అందుకు తగ్గట్టుగానే ఉన్నాయని అన్నారు. కరీంనగర్ కలెక్టరేట్‌ను కేసీఆర్ నిర్మించారని, దాని ప్రారంభోత్సవానికి సీఎం రావడాన్ని తాము స్వాగతిస్తున్నామని తెలిపారు.

12 ఏళ్ల క్రితం సిరిసిల్ల ఎలా ఉండేది, ప్రస్తుతం ఎలా ఉందో సీఎం రేవంత్‌రెడ్డి తెలుసుకోవాలని అన్నారు. గతంలో రాష్ట్రంలో ‘ఉరిసిల్ల’గా ఉన్న సిరిసిల్లను ‘సిరుల సిల్ల’గా మార్చింది కేటీఆర్ అని పేర్కొన్నారు. రాష్ట్రంలోనే కాకుండా దేశంలోనూ సిరిసిల్ల నియోజకవర్గాన్ని ఆదర్శంగా తీర్చిదిద్దిన ఘనత కేటీఆర్‌దేనని వ్యాఖ్యానించారు.

అయితే కాంగ్రెస్ ప్రభుత్వం అధికారంలోకి వచ్చిన తర్వాత సిరిసిల్లలో ఉపాధి లేక 35 మంది నేత కార్మికులు ఆత్మహత్య చేసుకున్నారని రవిశంకర్ పేర్కొన్నారు. మృతి చెందిన నేత కార్మికుల కుటుంబాలకు ఒక్కొక్కరికి రూ.25 లక్షల ఎక్స్‌గ్రేషియా ఇవ్వాలని డిమాండ్ చేశారు. రైతులు, చేనేత కార్మికులకు బీమా పథకాలను ఎందుకు అమలు చేయడం లేదని ప్రశ్నించారు.

మిడ్ మానేరు ప్రాజెక్టును పూర్తి చేసి, నిర్వాసితులకు అండగా నిలిచింది కేసీఆర్ ప్రభుత్వం అని రవిశంకర్ అన్నారు. నిర్వాసితుల సమస్యల్లో 90 శాతం పరిష్కరించామని పేర్కొన్నారు. మిగిలిన హామీలను అమలు చేయాలని, ఒక్కో నిర్వాసిత కుటుంబానికి రూ.5.04 లక్షలు చెల్లించాలని డిమాండ్ చేశారు. నిర్వాసితులకు ఉపాధి కల్పించడంతో పాటు కారిడార్లు ఏర్పాటు చేయాలని కోరారు.

సిరిసిల్లలో జరిగిన అభివృద్ధిని చూసి కేటీఆర్‌ను ఆదర్శంగా తీసుకుని కొడంగల్‌ను కూడా అభివృద్ధి చేసుకోవాలని సూచించారు. గత మూడేళ్లుగా సిరిసిల్లకు ఒక్క రూపాయి కూడా ఇవ్వలేదని ఆరోపించిన రవిశంకర్.. సీఎం రేవంత్‌రెడ్డి సిరిసిల్లకు ఏ ముఖం పెట్టుకుని వస్తున్నారని ప్రశ్నించారు.

సిరిసిల్లలో అభివృద్ధి జరగలేదని మంత్రి పొన్నం ప్రభాకర్ చేస్తున్న వ్యాఖ్యలపై కూడా రవిశంకర్ స్పందించారు. గతంలో సిరిసిల్లకు నిధులు తీసుకురావడంపై మాట్లాడిన మాటలను గుర్తు చేసుకోవాలని, సిరిసిల్లలో జరిగిన అభివృద్ధి కనిపించడం లేదా అని ప్రశ్నించారు. మిడ్ మానేరు నిర్వాసితులకు రూ.5.04 లక్షలు ఇవ్వకపోతే ప్రజల నుంచి తీవ్ర నిరసన ఎదురవుతుందని హెచ్చరించారు.

రేవంత్ పాలనపై తోట ఆగయ్య విమర్శలు

బీఆర్ఎస్ జిల్లా అధ్యక్షుడు తోట ఆగయ్య మాట్లాడుతూ సీఎం రేవంత్‌రెడ్డికి కేసీఆర్, కేటీఆర్, హరీశ్‌రావు, బీఆర్ఎస్ నేతలను విమర్శించడం తప్ప మరో పని లేదని విమర్శించారు. రేవంత్‌రెడ్డి పాలనను ‘రాక్షస పాలన’గా అభివర్ణిస్తూ, ఎమ్మెల్యేలపై గుండాలతో దాడులు చేయిస్తున్నారని ఆరోపించారు.

రేవంత్‌రెడ్డి రాష్ట్రంలో అత్యంత దుష్టమైన పాలన సాగిస్తున్నారని తోట ఆగయ్య వ్యాఖ్యానించారు. సిరిసిల్లకు వచ్చేటప్పుడు ఖాళీ చేతులతో కాకుండా ఇచ్చిన హామీలను అమలు చేసి రావాలని డిమాండ్ చేశారు. సీఎం రేవంత్‌రెడ్డి పతనం ప్రారంభమైందని, ప్రజాక్షేత్రంలో తగిన గుణపాఠం చెబుతామని అన్నారు.

కాంగ్రెస్ నేతల మాటలకు మోసపోవద్దు: అకునూరి శంకరయ్య

మాజీ గ్రంథాలయ సంస్థ చైర్మన్ అకునూరి శంకరయ్య మాట్లాడుతూ.. సిరిసిల్ల అభివృద్ధి ప్రదాత కేటీఆర్ అని అన్నారు. కాంగ్రెస్ నేతల మాటలకు ప్రజలు మోసపోవద్దని సూచించారు. సిరిసిల్లను అభివృద్ధి చేసిన కేటీఆర్‌కు అండగా ఉండాల్సిన బాధ్యత అందరిపైనా ఉందని పేర్కొన్నారు.

నిర్వాసితులకు రూ.5.04 లక్షలు ఇవ్వాలి: కొండయ్య

బోయినపల్లి మండల బీఆర్ఎస్ అధ్యక్షుడు కొండయ్య మాట్లాడుతూ.. మిడ్ మానేరు నిర్వాసితులను ఆదుకున్నది కేసీఆర్ ప్రభుత్వమేనని అన్నారు. కాంగ్రెస్ ప్రభుత్వం ఇచ్చిన హామీలను అమలు చేయాలని డిమాండ్ చేశారు. 18 ఏళ్లు నిండిన యువతకు రూ.2 లక్షలు ఇచ్చిన ఘనత కేసీఆర్‌దేనని పేర్కొన్నారు. మిడ్ మానేరు నిర్వాసితులకు వెంటనే రూ.5.04 లక్షలు అందించాలని డిమాండ్ చేశారు.

ఈ సమావేశంలో బీఆర్ఎస్ నేతలు కుంబాల మల్లారెడ్డి, బోయినపల్లి మండల పార్టీ నేతలు తదితరులు పాల్గొన్నారు.