Sircilla: వరి ధాన్యం కొనుగోలు కేంద్రాలను వెంటనే ప్రారంభించాలి!

Sircilla: ఖరీఫ్ సీజన్‌లో వరి కోతలు ప్రారంభం కానున్న నేపథ్యంలో రైతులకు ఎలాంటి ఇబ్బందులు కలగకుండా వెంటనే ధాన్యం కొనుగోలు కేంద్రాలను ప్రారంభించాలని బీజేపీ నాయకులు డిమాండ్ చేశారు. ఈ మేరకు ఎల్లారెడ్డిపేట తహసీల్దార్ కార్యాలయం ఎదుట బీజేపీ నాయకులు నిరసన చేపట్టారు.

గత యాసంగి సీజన్‌లో సరైన ప్రణాళిక లేకుండా ధాన్యం కొనుగోళ్లు చేపట్టడంతో రైతులు తీవ్ర ఇబ్బందులు ఎదుర్కొన్నారని బీజేపీ నాయకులు ఆరోపించారు. ఈసారి ముందుగానే కొనుగోలు కేంద్రాలను ఏర్పాటు చేసి రైతులు పండించిన ధాన్యాన్ని ఎలాంటి జాప్యం లేకుండా కొనుగోలు చేయాలని కోరారు.

కొనుగోలు కేంద్రాల్లో సరిపడా గన్నీ బ్యాగులు, టార్పాలిన్ కవర్లు అందుబాటులో ఉంచాలని డిమాండ్ చేశారు. కొనుగోళ్లలో జాప్యం కారణంగా రైతులు ధాన్యాన్ని కల్లాల్లో ఎక్కువ రోజులు నిల్వ చేసుకోవాల్సి వస్తోందని, వర్షాలు కురిస్తే ధాన్యం తడిసి రైతులు ఆర్థికంగా నష్టపోయే అవకాశం ఉందని ఆవేదన వ్యక్తం చేశారు.

రైతులు పంట పండించిన తర్వాత కొనుగోళ్ల కోసం ఎదురుచూడాల్సిన పరిస్థితి రాకుండా ముందస్తు ప్రణాళికతో కొనుగోలు కేంద్రాలను సిద్ధం చేయాలని బీజేపీ నాయకులు కోరారు. అనంతరం తహసీల్దార్‌ను కలిసి వినతిపత్రం అందజేశారు. రైతులకు ఎలాంటి ఇబ్బందులు కలగకుండా తక్షణమే చర్యలు చేపట్టాలని విజ్ఞప్తి చేశారు.