Karimnagar: జంతర్ మంతర్ నిరసనను అడ్డుకోవడం రాజ్యాంగ విరుద్ధం జోజి రెడ్డి!
Karimnagar: జంతర్ మంతర్ నిరసనను కేంద్రం అడ్డుకోవడాన్ని ఖండించిన ఏఐఎఫ్‌బీ నేత జోజి రెడ్డి. ఎస్‌ఐఆర్‌పై ఓటర్ల సందేహాలను నివృత్తి చేయాలని డిమాండ్.
Karimnagar: జంతర్ మంతర్ నిరసనను అడ్డుకోవడం రాజ్యాంగ విరుద్ధం జోజి రెడ్డి!
Karimnagar: ఢిల్లీ జంతర్ మంతర్ వద్ద వామపక్ష నేతలు చేపట్టనున్న నిరసన కార్యక్రమానికి కేంద్ర ప్రభుత్వం అనుమతి నిరాకరించడాన్ని అఖిల భారత ఫార్వర్డ్ బ్లాక్ (ఏఐఎఫ్‌బీ) తెలంగాణ రాష్ట్ర ప్రధాన కార్యదర్శి అంబటి జోజి రెడ్డి తీవ్రంగా ఖండించారు.
ప్రజాస్వామ్యంలో నిరసన తెలిపే హక్కు ప్రతి పౌరుడికి రాజ్యాంగం కల్పించిన ప్రాథమిక హక్కు అని ఆయన పేర్కొన్నారు. ప్రజా సమస్యలపై గళమెత్తే వారిని అడ్డుకోవడం ప్రజాస్వామ్య స్ఫూర్తికి విరుద్ధమని అన్నారు.దేశ రాజధానిలో నిరసన కార్యక్రమాలకు అనుమతులు నిరాకరించడం, పోలీసు బలగాలతో ఆంక్షలు విధించడం ప్రజాస్వామ్య హక్కుల పరిరక్షణకు విఘాతం కలిగిస్తుందని తెలిపారు. ప్రజల సమస్యలను ప్రభుత్వం దృష్టికి తీసుకెళ్లేందుకు నిరసనలు ముఖ్యమైన ప్రజాస్వామ్య మార్గాలని, వాటిని అడ్డుకోవడం సరైన విధానం కాదని పేర్కొన్నారు.
ఓటర్ల జాబితాల సవరణపై ఆందోళనలు
భారత ఎన్నికల సంఘం ఆధ్వర్యంలో జరుగుతున్న ఓటర్ల జాబితాల ప్రత్యేక సమగ్ర సవరణ (ఎస్‌ఐఆర్‌) ప్రక్రియపై ప్రజల్లో అనేక సందేహాలు, ఆందోళనలు వ్యక్తమవుతున్నాయని అన్నారు. ఓటర్ల జాబితాల నుంచి అర్హులైన వారి పేర్లు తొలగిపోకుండా ఎన్నికల సంఘం తగిన జాగ్రత్తలు తీసుకోవాలని డిమాండ్ చేశారు. ఓటు హక్కు ప్రజాస్వామ్యానికి పునాది అని, ప్రతి అర్హుడైన పౌరుడికి ఆ హక్కు అందేలా చూడాల్సిన బాధ్యత ఎన్నికల సంఘంపై ఉందని స్పష్టం చేశారు. ఓటర్ల జాబితాల సవరణ ప్రక్రియ పారదర్శకంగా జరగాలని, పేర్ల తొలగింపుపై వచ్చే అభ్యంతరాలను సమగ్రంగా పరిశీలించాలని కోరారు.
ప్రజాస్వామ్య శక్తులు ఐక్యంగా ముందుకు రావాలి
ఈ ప్రక్రియలో ప్రజలకు ఇబ్బందులు కలగకుండా సంబంధిత అధికారులు చర్యలు తీసుకోవాలని సూచించారు. ప్రజాస్వామ్య హక్కులను కాపాడేందుకు అన్ని ప్రజాస్వామ్య శక్తులు ఐక్యంగా ముందుకు రావాలని పిలుపునిచ్చారు.
ప్రజల గొంతుకను వినడం, వారి సమస్యలకు పరిష్కారం చూపడం ప్రభుత్వాల బాధ్యత అని పేర్కొన్నారు. ప్రజాస్వామ్య పరిరక్షణకు, ప్రజా సమస్యల పరిష్కారానికి అఖిల భారత ఫార్వర్డ్ బ్లాక్ నిరంతరం కృషి చేస్తుందని అంబటి జోజి రెడ్డి స్పష్టం చేశారు.
