Kakinada: 'ఆపరేషన్ వజ్రప్రహార్': జగ్గంపేట పరిధిలో మెగా కార్డన్ సెర్చ్

కాకినాడ జిల్లా, గండేపల్లి: ఆంధ్రప్రదేశ్‌ రాష్ట్రంలో మాదకద్రవ్యాల వినియోగం, అక్రమ రవాణాను అరికట్టడమే లక్ష్యంగా చేపట్టిన ‘ఆపరేషన్‌ వజ్రప్రహార్‌’లో భాగంగా ఆదివారం రాష్ట్రవ్యాప్తంగా మెగా కార్డన్‌ అండ్‌ సెర్చ్‌ ఆపరేషన్‌ నిర్వహించారు. ఇందులో భాగంగా కాకినాడ జిల్లా గండేపల్లి మండలం నీలాద్రిరావుపేట గ్రామంలో జగ్గంపేట సర్కిల్‌ పోలీసుల ఆధ్వర్యంలో విస్తృత తనిఖీలు చేపట్టారు.

రాష్ట్ర పోలీసు డైరెక్టర్‌ జనరల్‌ హరీష్‌ కుమార్‌ గుప్తా ఆదేశాల మేరకు, ఈగల్‌ విభాగం ముఖ్య అధికారి, పోలీసు శాఖ ఐజీ ఆకే రవికృష్ణ పర్యవేక్షణలో, కాకినాడ జిల్లా పోలీసు సూపరింటెండెంట్‌ జి. బిందు మాధవ్‌ ఆధ్వర్యంలో ఈ కార్యక్రమం నిర్వహించారు.

జగ్గంపేట ఉపవిభాగ పరిధిలోని నీలాద్రిరావుపేట గ్రామంలో నిర్వహించిన ఈ తనిఖీల్లో మొత్తం 25 మంది పోలీసు అధికారులు, సిబ్బంది పాల్గొన్నారు. అనుమానాస్పద ప్రాంతాలు, నివాసాలు, వాహనాలను క్షుణ్ణంగా పరిశీలించారు. మాదకద్రవ్యాల వినియోగం, అక్రమ రవాణాకు అవకాశం ఉన్న ప్రాంతాలతో పాటు గతంలో గంజాయి, ఇతర మాదకద్రవ్యాల కేసుల్లో నిందితులుగా ఉన్నవారి వివరాలను పరిశీలించారు.

ఈ తనిఖీల్లో మొత్తం 100 మంది వ్యక్తులను, 50 వాహనాలను తనిఖీ చేయగా, సరైన పత్రాలు లేని 22 వాహనాలను గుర్తించారు. రౌడీషీటర్లు, అనుమానితుల జాబితాలో ఉన్న వ్యక్తులను పిలిపించి కౌన్సెలింగ్‌ నిర్వహించారు. చట్టవ్యతిరేక కార్యకలాపాలకు దూరంగా ఉంటూ సత్ప్రవర్తనతో మెలగాలని సూచించారు.

మాదకద్రవ్యాలపై ప్రజలకు అవగాహన

గంజాయి, ఇతర మాదకద్రవ్యాల వినియోగం వల్ల కలిగే ఆరోగ్య, సామాజిక, చట్టపరమైన దుష్పరిణామాలపై పోలీసులు ప్రజలకు అవగాహన కల్పించారు. మాదకద్రవ్యాల అలవాటు యువత భవిష్యత్తును దెబ్బతీయడమే కాకుండా కుటుంబ వ్యవస్థపై కూడా తీవ్ర ప్రభావం చూపుతుందని వివరించారు.

గ్రామాలు, పట్టణాల్లో ఎక్కడైనా గంజాయి లేదా ఇతర మాదకద్రవ్యాల వినియోగం, అక్రమ రవాణాకు సంబంధించిన సమాచారం తెలిస్తే వెంటనే ఆంధ్రప్రదేశ్‌ ఈగల్‌ విభాగం టోల్‌ఫ్రీ నంబరు 1972కు తెలియజేయాలని పోలీసులు విజ్ఞప్తి చేశారు. సమాచారం అందించే వారి వివరాలను గోప్యంగా ఉంచుతామని తెలిపారు.

ఈ సందర్భంగా పోలీసు అధికారులు, సిబ్బంది, ప్రజలు కలిసి ‘ఆపరేషన్‌ వజ్రప్రహార్‌’ ప్రతిజ్ఞ చేశారు. మాదకద్రవ్యాల నిర్మూలనకు ప్రతి ఒక్కరూ బాధ్యతగా వ్యవహరించాలని, యువతను మాదకద్రవ్యాల బారిన పడకుండా కాపాడేందుకు ప్రజల సహకారం అవసరమని అధికారులు పేర్కొన్నారు.

రాష్ట్రంలో మాదకద్రవ్యాల వ్యాప్తిని పూర్తిగా అరికట్టి, మాదకద్రవ్య రహిత సమాజ నిర్మాణమే లక్ష్యంగా ఇటువంటి ప్రత్యేక తనిఖీలు, అవగాహన కార్యక్రమాలను నిరంతరం కొనసాగిస్తామని పోలీసులు స్పష్టం చేశారు.