Tuni: తునిలో విజిలెన్స్ మెరుపు దాడులు.. షాపులు మూసేసి వ్యాపారుల పరార్!
Tuni: కాకినాడ జిల్లా తుని పట్టణంలో అధిక ధరలకు బియ్యం విక్రయిస్తున్నారన్న సమాచారంతో విజిలెన్స్ అధికారులు మెరుపు దాడులు నిర్వహించగా పలువురు వ్యాపారులు షాపులు మూసేసి పరారయ్యారు.
Tuni: తునిలో విజిలెన్స్ మెరుపు దాడులు.. షాపులు మూసేసి వ్యాపారుల పరార్!
తుని: తుని పట్టణంలో విజిలెన్స్ అధికారులు నిర్వహించిన ఆకస్మిక మెరుపు దాడులు వ్యాపార వర్గాల్లో కలకలం రేపాయి. పట్టణంలోని ఫీడర్ రోడ్డుతో పాటు పలు ప్రధాన ప్రాంతాల్లోని బియ్యం దుకాణాలు, కిరాణా షాపులపై విజిలెన్స్ అధికారులు విస్తృతంగా తనిఖీలు చేపట్టారు.
నిర్ణీత ధరల కంటే అధిక ధరలకు బియ్యాన్ని విక్రయిస్తున్నారన్న పక్కా సమాచారం మేరకు అధికారులు ఈ దాడులు నిర్వహించారు. అయితే, అధికారుల తనిఖీల విషయం ముందస్తుగా తెలియడంతో పలువురు వ్యాపారులు తమ షాపులకు తాళాలు వేసి అక్కడి నుంచి వెళ్లిపోయినట్లు తెలుస్తోంది.
అనంతరం అధికారులు పట్టణంలోని పలు చిన్న కిరాణా దుకాణాల్లోనూ సోదాలు నిర్వహించి ధరల పట్టికలు, నిల్వలను పరిశీలించారు. ఈ తనిఖీల్లో నిబంధనలకు విరుద్ధంగా విక్రయాలు జరుపుతున్న కొన్ని షాపులను గుర్తించి, వాటి నిర్వాహకులపై కేసులు నమోదు చేసినట్లు సమాచారం. అధికారుల ఆకస్మిక తనిఖీలతో అక్రమార్కుల గుండెల్లో గుబులు మొదలైంది.




