Duvvur: దువ్వూరులో వీఆర్ఏల వినూత్న నిరసన.. 21వ రోజుకు చేరిన సమ్మె!

Duvvur: తమ న్యాయమైన సమస్యలను పరిష్కరించాలని డిమాండ్ చేస్తూ దువ్వూరు మండల కేంద్రంలోని తహశీల్దార్ కార్యాలయం ఎదుట గ్రామ రెవెన్యూ సహాయకులు (వీఆర్ఏలు) చేపట్టిన నిరవధిక సమ్మె మంగళవారం నాటికి 21వ రోజుకు చేరుకుంది. ఈ సందర్భంగా వీఆర్ఏలు ఒంటికాలిపై నిలబడి వినూత్న రీతిలో నిరసన తెలుపుతూ ప్రభుత్వానికి వ్యతిరేకంగా నినాదాలు చేశారు.

​సమ్మె శిబిరంలో నాయకులు మాట్లాడుతూ, ప్రభుత్వం గతంలో ఇచ్చిన హామీలను వెంటనే నెరవేర్చాలని డిమాండ్ చేశారు. వీఆర్ఏలకు పేస్కేల్ వర్తింపజేయాలని, అర్హత కలిగిన వారికి పదోన్నతులు కల్పించాలని, నామినీలను వీఆర్ఏలుగా గుర్తించడంతో పాటు సంక్షేమ పథకాలను అమలు చేయాలని కోరారు. న్యాయమైన సమస్యల పరిష్కారం కోసం మూడు వారాలుగా శాంతియుతంగా ఆందోళన చేస్తున్నా పాలకులు నిమ్మకు నీరెత్తినట్లు వ్యవహరించడం తగదని ఆవేదన వ్యక్తం చేశారు.

​ఈ సమ్మె ప్రభావంతో మండలంలో రెవెన్యూ సేవలు, సర్టిఫికెట్ల జారీ, క్షేత్రస్థాయి విధులకు తీవ్ర ఆటంకం కలుగుతోందని తెలిపారు. ప్రభుత్వం ఇప్పటికైనా స్పందించి సమస్యలను పరిష్కరించకపోతే ఆందోళనలను మరింత ఉధృతం చేస్తామని హెచ్చరించారు. ఈ కార్యక్రమంలో మండల వీఆర్ఏ సంఘం నాయకులు, సభ్యులు పాల్గొన్నారు.