Mydukur: మైదుకూరులో నామినేషన్ పత్రాల చించివేత: 10 మంది అరెస్ట్

​మైదుకూరు: మైదుకూరు మున్సిపల్ ఎన్నికల ప్రక్రియలో తీవ్ర ఉద్రిక్తతకు దారితీసిన నామినేషన్ పత్రాల చించివేత ఘటనపై పోలీసులు వేగంగా స్పందించారు. ఈ కేసులో ప్రధానంగా ప్రమేయం ఉన్న పదిమంది నిందితులను పోలీసులు అరెస్ట్ చేశారు.

​నామినేషన్ల స్వీకరణ కేంద్రంలోకి కొందరు గుర్తుతెలియని వ్యక్తులు అకస్మాత్తుగా చొరబడి, అక్కడున్న నామినేషన్ పత్రాలను చింపివేసి గందరగోళం సృష్టించారు. ఈ ఘటనపై తీవ్ర అభ్యంతరం వ్యక్తం చేస్తూ రిటర్నింగ్ అధికారి, మున్సిపల్ కమిషనర్ స్థానిక పోలీస్ స్టేషన్‌లో అధికారికంగా ఫిర్యాదు చేశారు. వారి ఫిర్యాదు మేరకు పోలీసులు కేసు నమోదు చేసి దర్యాప్తు ప్రారంభించారు.

​దర్యాప్తును ముమ్మరం చేసిన పోలీసులు, ప్రాథమిక ఆధారాల ప్రకారం 10 మందిని గుర్తించి అదుపులోకి తీసుకున్నట్లు తెలిపారు. ఈ ఘటనపై మైదుకూరు డీఎస్పీ రాజేంద్రప్రసాద్ మీడియాకు వివరాలు వెల్లడిస్తూ, ఘటనా స్థలానికి సంబంధించిన ఆధారాలు, సీసీటీవీ ఫుటేజీల ఆధారంగా నిందితులను పట్టుకున్నామని చెప్పారు.

అంతేకాకుండా, ఈ వివాదంలో ప్రమేయం ఉన్న మరికొంతమందిని ఇప్పటికే గుర్తించామని, వారిని కూడా త్వరలోనే అరెస్టు చేస్తామని ఆయన స్పష్టం చేశారు. ఎన్నికల నియమావళిని ఉల్లంఘించి, శాంతిభద్రతలకు విఘాతం కలిగిస్తే ఎంతటి వారైనా ఉపేక్షించేది లేదని డీఎస్పీ హెచ్చరించారు.