Kadapa: మైదుకూరులో ఘనంగా ట్రాక్టర్ ర్యాలీ: ఉద్యాన హబ్‌గా రాయలసీమ!

Kadapa: రాయలసీమను ఉద్యాన పంటల కేంద్రంగా తీర్చిదిద్దే లక్ష్యంతో తలపెట్టిన ‘గ్లోబల్ హార్టికల్చర్ హబ్’ ప్రారంభోత్సవాన్ని పురస్కరించుకుని మైదుకూరులో నియోజకవర్గ స్థాయి భారీ ట్రాక్టర్ ర్యాలీ ఉత్సాహభరితంగా సాగింది. జిల్లా కలెక్టర్ ఆదేశాల మేరకు మైదుకూరు వ్యవసాయ సంచాలకులు ఎం. కృష్ణమూర్తి నేతృత్వంలో ఈ కార్యక్రమాన్ని నిర్వహించారు.

​ఈ సందర్భంగా వ్యవసాయ సంచాలకులు కృష్ణమూర్తి మాట్లాడుతూ, అక్టోబర్ 2న మదనపల్లెలో గౌరవ ముఖ్యమంత్రి, కేంద్ర ఆర్థిక శాఖ మంత్రి నిర్మలా సీతారామన్ చేతుల మీదుగా గ్లోబల్ హార్టికల్చర్ హబ్‌ను లాంఛనంగా ప్రారంభించనున్నట్లు వెల్లడించారు. ‘రాయలసీమ రైజింగ్’ ప్రాజెక్టు కింద సుమారు లక్ష కోట్ల రూపాయల వ్యయంతో సీమ జిల్లాలను ఉద్యాన పంటల హబ్‌గా తీర్చిదిద్దుతున్నామని పేర్కొన్నారు. ఇందులో భాగంగా తోటల పెంపకం, సాగునీటి వసతులు, గ్రామీణ రహదారుల విస్తరణ చేపట్టి అన్నదాతల ఆదాయాన్ని గణనీయంగా పెంచడమే ప్రభుత్వ ధ్యేయమని స్పష్టం చేశారు.

​అనంతరం మైదుకూరు ఉద్యాన అధికారి సి. రామకృష్ణ మాట్లాడుతూ, నియోజకవర్గంలో మూడు క్లస్టర్లను ఏర్పాటు చేశామని, అక్టోబర్ 2వ తేదీ ఉదయం ప్రతి క్లస్టర్ నుంచి రెండు చొప్పున ప్రత్యేక బస్సులు రైతులను మదనపల్లె సభకు తీసుకెళ్తాయని తెలిపారు. అంతేకాకుండా మదనపల్లెలో జరిగే ప్రారంభోత్సవ వేడుకను స్థానిక రైతులు వీక్షించేలా మైదుకూరులో లైవ్ టెలికాస్ట్ (ప్రత్యక్ష ప్రసారం) ఏర్పాటు చేస్తున్నట్లు వివరించారు.

​ఈ ర్యాలీలో మైదుకూరు తహశీల్దార్ వి. రాజసింహ నరేంద్ర, వ్యవసాయ అధికారి ఎస్. శివశంకర్ రెడ్డి, ఎంపీడీవో శ్రీధర్ నాయుడు, డ్వామా ప్రతినిధి బల్కి రెడ్డి, ఏపీవో రామచంద్రారెడ్డిలతో పాటు రైతు సేవా కేంద్రాల సిబ్బంది, రైతు సంఘాల నేతలు, స్థానిక రైతులు పెద్ద ఎత్తున ట్రాక్టర్లతో పాల్గొన్నారు.