Kadapa: కడపలో జెడ్పీటీసీ, ఎంపీటీసీ ఎన్నికలకు సర్వం సిద్ధం కలెక్టర్

కడప: వైఎస్సార్ కడప జిల్లాలో జెడ్పీటీసీ, ఎంపీటీసీ ఎన్నికల పోలింగ్‌కు సర్వం సిద్ధమైంది. నవంబర్ 5న జరగనున్న ఎన్నికల కోసం జిల్లా ఎన్నికల యంత్రాంగం అన్ని ఏర్పాట్లు పూర్తి చేసింది. 21 మండలాల్లో 599 పోలింగ్ కేంద్రాలను ఏర్పాటు చేయగా... దాదాపు 5 లక్షల 94 వేల మంది ఓటర్లు తమ ఓటు హక్కును వినియోగించుకోనున్నారు. ఈ మేరకు జిల్లా కలెక్టర్, ఎన్నికల అధికారి డాక్టర్ శ్రీధర్ చెరుకూరి వెల్లడించారు.

జిల్లాలో 16 జెడ్పీటీసీ, 55 ఎంపీటీసీ స్థానాలకు ఎన్నికలు జరగనున్నాయి. జెడ్పీటీసీ స్థానాలకు 71 మంది, ఎంపీటీసీ స్థానాలకు 171 మంది... మొత్తంగా 242 మంది అభ్యర్థులు బరిలో నిలిచారు. ఎన్నికల విధుల కోసం 2,995 మంది పోలింగ్ సిబ్బందిని నియమించారు. ఇప్పటికే పోలింగ్ సామగ్రిని భారీ భద్రత మధ్య ఆయా కేంద్రాలకు తరలించారు.

ఇక జిల్లాలో 134 సున్నిత, 167 అత్యంత సున్నిత, 5 సమస్యాత్మక పోలింగ్ కేంద్రాలను గుర్తించి ప్రత్యేక భద్రతా ఏర్పాట్లు చేశారు. పోలింగ్ అనంతరం బ్యాలెట్ బాక్సులను ఐదు రెవెన్యూ డివిజన్లలో ఏర్పాటు చేసిన స్ట్రాంగ్ రూమ్‌లకు తరలించనున్నారు.

ఓటర్లు ఎలాంటి భయాందోళనలకు గురికాకుండా స్వేచ్ఛగా తమ ఓటు హక్కును వినియోగించుకోవాలని కలెక్టర్ కోరారు. పోలింగ్ ప్రక్రియను ప్రశాంతంగా, పారదర్శకంగా నిర్వహించేందుకు అన్ని చర్యలు తీసుకున్నట్లు తెలిపారు.