US Midterm Elections: అమెరికా మధ్యంతర ఎన్నికల్లో ఈ స్థానాలే కీలకం

US Midterm Elections: అమెరికా ప్రతినిధుల సభలో మెజారిటీ నిలబెట్టుకోవడం రిపబ్లికన్లకు సవాలుగా మారింది. డెమోక్రాట్లకు నాలుగు స్థానాలు దక్కితే సభపై పట్టు సాధించే అవకాశం ఉంది. టెక్సాస్ నుంచి న్యూయార్క్ వరకు పలు రాష్ట్రాల్లో హోరాహోరీ పోటీ నెలకొంది. ట్రంప్ విధానాలు, వలసల నియంత్రణ, పెరుగుతున్న జీవన వ్యయం ఈ ఎన్నికల్లో కీలక అంశాలుగా మారాయి. అమెరికాలో నవంబర్‌లో జరగనున్న మధ్యంతర ఎన్నికలు అధ్యక్షుడు డొనాల్డ్ ట్రంప్ నేతృత్వంలోని రిపబ్లికన్ పార్టీకి కీలక పరీక్షగా మారనున్నాయి. ప్రతినిధుల సభలో ఇప్పటికే ఉన్న స్వల్ప మెజారిటీని నిలబెట్టుకోవడం ఆ పార్టీకి సవాలుగా మారగా, అధికారాన్ని తిరిగి చేజిక్కించుకోవాలని డెమోక్రాట్లు వ్యూహాలు రచిస్తున్నారు. సభలో మెజారిటీ సాధించాలంటే డెమోక్రాట్లు మరో నాలుగు స్థానాలను గెలుచుకోవాలి. మరోవైపు, ఎన్నికల్లో తమకు అనుకూలంగా ఫలితాలు వచ్చేలా రిపబ్లికన్లు పలు రాష్ట్రాల్లో నియోజకవర్గాల సరిహద్దులను మార్చే ప్రయత్నాలు చేపట్టారు. ఈ నేపథ్యంలో దేశవ్యాప్తంగా కొన్ని స్థానాల్లో పోటీ తీవ్రంగా మారింది. ఆర్థిక పరిస్థితులు, వలస విధానాలు, అభ్యర్థులపై వచ్చిన ఆరోపణలు, ట్రంప్ నిర్ణయాల ప్రభావం ఓటర్లను ఏ మేరకు ప్రభావితం చేస్తాయన్నది ఆసక్తికరంగా మారింది.

న్యూయార్క్- స్వల్ప ఆధిక్యమే కీలకం

న్యూయార్క్‌లో రిపబ్లికన్ అభ్యర్థి మైక్ లాలర్‌కు ఈసారి గట్టి పోటీ ఎదురవుతోంది. ఆయనపై డెమోక్రటిక్ అభ్యర్థి కైట్ కాన్లీ పోటీ చేస్తున్నారు. 2024 అధ్యక్ష ఎన్నికల్లో కమలా హారిస్ గెలిచినప్పటికీ రిపబ్లికన్ల ఆధీనంలో ఉన్న మూడు నియోజకవర్గాల్లో ఇది ఒకటి. సెప్టెంబర్ చివర్లో విడుదలైన రెండు సర్వేల్లోనూ అభ్యర్థుల మధ్య స్వల్ప ఆధిక్యమే కనిపించింది. డెమోక్రాట్లు ప్రచారానికి సుమారు 10 లక్షల డాలర్లు అధికంగా ఖర్చు చేయగా, లాలర్ వద్ద కాన్లీ కంటే దాదాపు ఐదు రెట్లు ఎక్కువ ప్రచార నిధులు ఉన్నాయి.

టెక్సాస్- నియోజకవర్గాల పునర్విభజన ప్రభావం

టెక్సాస్‌లో ఐదు అదనపు స్థానాలను గెలుచుకోవాలనే లక్ష్యంతో రిపబ్లికన్లు నియోజకవర్గాల సరిహద్దులను మార్చారు. అయితే, వాటిలో మూడు స్థానాలు ఇప్పుడు పోటీకి అనుకూలంగా మారాయి. ముఖ్యంగా దక్షిణ టెక్సాస్‌లో డెమోక్రటిక్ అభ్యర్థులకు అవకాశాలు కనిపిస్తున్నాయి. విన్సెంట్ గొంజాలెస్ రిపబ్లికన్ అభ్యర్థి ఎరిక్ ఫ్లోరెస్‌తో తలపడుతున్నారు. గొంజాలెస్ వద్ద ప్రత్యర్థి కంటే దాదాపు 20 లక్షల డాలర్లు అధికంగా ఉన్నాయి. మరోవైపు, హెన్రీ క్యూయెల్లార్ పోటీ చేస్తున్న స్థానంపైనా అందరి దృష్టి ఉంది. మూడో స్థానంలో రిపబ్లికన్ కార్లోస్ డి లా క్రూజ్, డెమోక్రాట్ జానీ గార్సియా మధ్య పోటీ నెలకొంది.

నార్త్ కరోలినా- సరిహద్దుల మార్పుతో సవాలు

నార్త్ కరోలినాలో డెమోక్రటిక్ ప్రతినిధి డాన్ డేవిస్ నియోజకవర్గం సరిహద్దులను మార్చడంతో ఆయనకు పోటీ మరింత కఠినమైంది. రిపబ్లికన్ అభ్యర్థి, రిటైర్డ్ ఆర్మీ కల్నల్ లారీ బక్‌హౌట్‌తో ఆయన తలపడుతున్నారు. ఈ వారం విడుదలైన సర్వేలో డేవిస్‌కు 10 శాతం పాయింట్ల ఆధిక్యం కనిపించింది. డెమోక్రాట్లు ఈ స్థానంలో 58 లక్షల డాలర్లు ఖర్చు చేయగా, రిపబ్లికన్ల వ్యయం ఆరు లక్షల డాలర్లకే పరిమితమైంది.

మైనే, ఒహియో: కొత్త సమీకరణాలు

మైనే రాష్ట్రంలో డెమోక్రటిక్ ప్రతినిధి జారెడ్ గోల్డెన్ రాజకీయాల నుంచి తప్పుకోవడంతో రిపబ్లికన్లకు అవకాశం ఏర్పడింది. మాజీ గవర్నర్ పాల్ లెపేజ్, డెమోక్రటిక్ అభ్యర్థి మాట్ డన్‌లప్‌తో పోటీ పడుతున్నారు. ఈ నెలలో వచ్చిన సర్వేల్లో డన్‌లప్ స్వల్ప ఆధిక్యంలో ఉన్నారు. ఒహియోలో రిపబ్లికన్ ప్రతినిధి మాక్స్ మిల్లర్‌పై గృహహింస, చిన్నారులపై వేధింపులకు సంబంధించిన ఆరోపణలు వచ్చాయి. వాటిని ఆయన ఖండించారు. డెమోక్రటిక్ అభ్యర్థి బ్రయాన్ పోయిండెక్స్టర్ ఆయనకు పోటీ ఇస్తున్నారు. ఈ స్థానాన్ని గెలుచుకోవడానికి డెమోక్రాట్లు 34 లక్షల డాలర్లు ఖర్చు చేయగా, రిపబ్లికన్ల వ్యయం 7.3 లక్షల డాలర్లుగా ఉంది.

అయోవా, ఫ్లోరిడా- జీవన వ్యయం, వలస విధానాల ప్రభావం

అయోవాలో డెమోక్రటిక్ అభ్యర్థి క్రిస్టినా బొహన్నన్, రిపబ్లికన్ ప్రతినిధి మరియానెట్ మిల్లర్-మీక్‌స్‌తో మూడోసారి పోటీ పడుతున్నారు. గత ఎన్నికల్లో ఓడిపోయిన బొహన్నన్‌కు ఈసారి జీవన వ్యయంపై పెరుగుతున్న ఆందోళనలు కలిసివచ్చే అవకాశం ఉంది. ఇంధనం, ఎరువుల ధరల పెరుగుదలతో రైతులు, సామాన్య కుటుంబాలపై పడుతున్న భారం ప్రచారంలో ప్రధాన అంశంగా మారింది. ఫ్లోరిడాలో రిపబ్లికన్ ప్రతినిధి మరియా ఎల్విరా సలాజర్ ట్రంప్ వలస విధానాలపై బహిరంగంగానే విమర్శలు చేశారు. అయితే, 2024లో ట్రంప్‌కు దాదాపు 15 శాతం పాయింట్ల ఆధిక్యం ఇచ్చిన నియోజకవర్గంలో ఆమె ఇప్పటికీ బలమైన అభ్యర్థిగా ఉన్నారు. డెమోక్రటిక్ అభ్యర్థి ఎలియట్ రోడ్రిగ్జ్‌తో పోటీ ఎలా సాగుతుందన్నది లాటినో ఓటర్ల వైఖరిపై కూడా ఆధారపడి ఉంటుంది.

వాషింగ్టన్, కెంటకీ, కాలిఫోర్నియా- ఉత్కంఠభరిత పోరు

వాషింగ్టన్‌లో డెమోక్రటిక్ ప్రతినిధి మేరీ గ్లూసెన్‌క్యాంప్ పెరెజ్‌కు రిపబ్లికన్ నేత జాన్ బ్రాన్ నుంచి సవాలు ఎదురవుతోంది. సెప్టెంబర్ సర్వేలో బ్రాన్‌కు ఒక్క శాతం పాయింటు ఆధిక్యం కనిపించింది. అయితే, పెరెజ్‌కు నిధుల సేకరణలో 40 లక్షల డాలర్ల ఆధిక్యం ఉంది. కెంటకీలో రిపబ్లికన్ ఆండీ బార్ సెనేట్ ఎన్నికల బరిలోకి దిగడంతో ఆరో కాంగ్రెస్ నియోజకవర్గం కీలకంగా మారింది. డెమోక్రటిక్ అభ్యర్థి జాక్ డెంబోకు తాజా సర్వేల్లో ఆధిక్యం కనిపిస్తున్నప్పటికీ, 2024లో ట్రంప్ ఈ నియోజకవర్గాన్ని 15 శాతం పాయింట్ల ఆధిక్యంతో గెలిచారు.

కాలిఫోర్నియాలో నియోజకవర్గాల పునర్విభజనతో రిపబ్లికన్ ప్రతినిధులు కెన్ కాల్వర్ట్, యంగ్ కిమ్ ఒకే స్థానానికి పోటీ పడుతున్నారు. డెమోక్రటిక్ ప్రతినిధి డోరిస్ మాట్సుయ్‌కు కూడా మై వాంగ్ నుంచి సవాలు ఎదురవుతోంది.

ఫలితాలు ఎందుకు కీలకం?

ఈ ఎన్నికలు కేవలం కొన్ని స్థానాల గెలుపోటములకు మాత్రమే పరిమితం కావు. ప్రతినిధుల సభపై ఏ పార్టీకి ఆధిపత్యం లభిస్తుందన్నది ట్రంప్ ప్రభుత్వ విధానాలకు పార్లమెంటులో ఎదురయ్యే మద్దతు, ప్రతిఘటనలను ప్రభావితం చేస్తుంది. వలసల నియంత్రణ, ఆర్థిక విధానాలు, ప్రభుత్వ వ్యయాలు వంటి అంశాలపై చట్టాల ఆమోదం కూడా సభలోని బలాబలాలపై ఆధారపడుతుంది. అందుకే నాలుగు స్థానాల తేడా డెమోక్రాట్లకు అధికారాన్ని అందించే అవకాశం కల్పిస్తుండగా, రిపబ్లికన్లకు ప్రస్తుత మెజారిటీని కాపాడుకోవడం అత్యంత కీలకంగా మారింది. చివరకు ఓటర్లు ఆర్థిక పరిస్థితులకు ప్రాధాన్యం ఇస్తారా? ట్రంప్ విధానాలకు మద్దతు కొనసాగిస్తారా? లేక అధికార పార్టీకి హెచ్చరిక పంపుతారా? నవంబర్ ఎన్నికల ఫలితాలు ఈ ప్రశ్నలకు సమాధానం ఇవ్వనున్నాయి.