US Midterm Elections 2026: అమెరికా మధ్యంత ఎన్నికల కోసం లక్షల కోట్లు ఖర్చుచేస్తోందా?

US Midterm Elections 2026: 2026 అమెరికా మధ్యంతర ఎన్నికలు కేవలం రాజకీయ పార్టీల మధ్య పోటీ మాత్రమే కాదు.. భారీగా డబ్బు ఖర్చు చేస్తున్న ఎన్నికల సమరంగా కూడా నిలుస్తున్నాయి. అభ్యర్థుల గెలుపు కోసం ప్రకటనలు, ప్రచార కార్యక్రమాలు, రాజకీయ సంస్థల మద్దతు రూపంలో బిలియన్ల డాలర్లు వెచ్చిస్తున్నారు. రాజకీయ ప్రకటనల ఖర్చు ఏకంగా 11.6 బిలియన్ డాలర్లకు చేరవచ్చని అంచనా. భారత కరెన్సీలో ఇది సుమారు రూ.లక్ష కోట్లకు పైమాటే. ఈ భారీ వ్యయంలో ఆసక్తికరమైన విషయం ఏమిటంటే.. ఖర్చు చేస్తున్న డబ్బులో అధిక భాగం అభ్యర్థుల సొంత ప్రచార నిధుల నుంచి కాకుండా, వారికి మద్దతు ఇస్తున్న బయటి రాజకీయ సంస్థలు, సూపర్ పీఏసీలు, సంపన్న దాతల నుంచి వస్తోంది. టెక్సాస్, ఒహాయో, మిషిగన్ వంటి రాష్ట్రాల్లో పోటీలు ఇందుకు ప్రధాన ఉదాహరణలుగా నిలుస్తున్నాయి.

2024 ఎన్నికల ఖర్చును దాటిన 2026 పోరు

అమెరికా ఎన్నికల చరిత్రలో గత రికార్డులను పరిశీలిస్తే ఈసారి ఖర్చు ఎంత పెరిగిందో అర్థమవుతుంది. 2022 మధ్యంతర ఎన్నికల సమయంలో రాజకీయ ప్రకటనల కోసం సుమారు 8.9 బిలియన్ డాలర్లు ఖర్చు చేశారు. 2024 అధ్యక్ష ఎన్నికల చక్రంలో ఈ మొత్తం దాదాపు 11.2 బిలియన్ డాలర్లకు చేరింది. ఇప్పుడు 2026 ఎన్నికల ప్రకటనల ఖర్చు 11.6 బిలియన్ డాలర్లకు చేరవచ్చని AdImpact అంచనా వేసింది. అక్టోబర్ 26 నాటికే 11.21 బిలియన్ డాలర్ల ప్రకటనలు ప్రసారమయ్యాయని లేదా వాటి కోసం నిధులు కేటాయించారని సంస్థ తెలిపింది.

టెక్సాస్‌లో రికార్డు స్థాయి పోటీ

ఈ ఎన్నికల్లో అత్యధిక ఖర్చుతో ఆసక్తి రేపుతున్న పోటీల్లో టెక్సాస్ సెనేట్ ఎన్నిక ముందుంది. డెమోక్రటిక్ అభ్యర్థి జేమ్స్ తలారికో, రిపబ్లికన్ అభ్యర్థి కెన్ పాక్స్టన్ మధ్య పోటీకి ప్రకటనల రూపంలోనే 560 మిలియన్ డాలర్లకు పైగా ఖర్చు చేసినట్లు అంచనాలు చెబుతున్నాయి. ఒహాయో, మిషిగన్ రాష్ట్రాల్లోనూ సెనేట్ స్థానాల కోసం భారీగా నిధులు వెచ్చిస్తున్నారు. ఈ మూడు రాష్ట్రాల్లోని పోటీలకే కలిపి సుమారు 1.3 బిలియన్ డాలర్ల స్థాయిలో ఖర్చు నమోదైనట్లు నివేదిక పేర్కొంది.

డబ్బు ఎక్కడి నుంచి వస్తోంది?

ఈ ఎన్నికల ప్రత్యేకత సంపన్న దాతలు, రాజకీయ కార్యాచరణ కమిటీలు పోషిస్తున్న పాత్ర. సూపర్ పీఏసీలు అని పిలిచే సంస్థలు అభ్యర్థులకు మద్దతుగా ప్రకటనలు, ప్రచార కార్యక్రమాలపై భారీగా ఖర్చు చేయగలవు. కొన్ని పోటీల్లో అభ్యర్థులు స్వయంగా సేకరించిన నిధుల కంటే బయటి సంస్థలు వెచ్చించిన మొత్తమే ఎక్కువగా ఉంది. ప్రపంచ కుబేరుడు ఎలాన్ మస్క్ కూడా ఈ ఎన్నికల ప్రచారానికి భారీగా నిధులు అందించిన ప్రధాన దాతల్లో ఒకరిగా వార్తల్లో నిలిచారు. రిపబ్లికన్ అభ్యర్థులకు మద్దతుగా పనిచేసే సంస్థలకు ఆయన ఇచ్చిన విరాళాలు ప్రత్యేకంగా చర్చకు వచ్చాయి. అయితే ఎన్నికల ఖర్చు ఎక్కువగా ఉండటం మాత్రమే గెలుపునకు హామీ ఇవ్వదు. ఓటర్ల సమస్యలు, అభ్యర్థులపై ప్రజల్లో ఉన్న అభిప్రాయం, పోలింగ్‌లో పాల్గొనే వారి సంఖ్య కూడా ఫలితాలను ప్రభావితం చేస్తాయి.

ఎన్నికల ఖర్చు ఓట్లను మార్చగలదా?

ప్రకటనల ద్వారా అభ్యర్థులు తమ విధానాలను ప్రజలకు వివరించవచ్చు. ప్రత్యర్థులపై విమర్శలు చేయవచ్చు. కానీ ప్రజలు ఎదుర్కొంటున్న ధరల పెరుగుదల, ఉద్యోగాలు, ఆరోగ్య సంరక్షణ వంటి సమస్యలకు పరిష్కారాలు చూపడమే చివరకు కీలకం. మొత్తానికి, 2026 అమెరికా మధ్యంతర ఎన్నికలు డబ్బు పరంగా సరికొత్త రికార్డును సృష్టిస్తున్నాయి. అయితే ఈ భారీ ఖర్చు రాజకీయ పార్టీలకు ఎంతవరకు ఓట్లుగా మారుతుంది? అదే ఇప్పుడు ఆసక్తికరమైన ప్రశ్న.