Trump Iran Remarks: ట్రంప్‌ సంచలన వ్యాఖ్యలు...ఇరాన్‌ నెక్ట్స్‌ టార్గెట్‌ ఈ నగరాలే?

Trump Iran Remarks: అమెరికా అధ్యక్షుడు డొనాల్డ్‌ ట్రంప్‌ చేసిన ఓ వ్యాఖ్య ఇప్పుడు అమెరికా రాజకీయాల్లోనే కాకుండా అంతర్జాతీయంగా కూడా తీవ్ర చర్చకు దారితీసింది. ఇరాన్‌తో కొనసాగుతున్న యుద్ధం గురించి నెబ్రాస్కాలోని గ్రాండ్‌ ఐలాండ్‌లో జరిగిన ఎన్నికల ప్రచార సభలో మాట్లాడిన ట్రంప్‌.. “వాళ్లు ఒక నగరాన్ని ధ్వంసం చేయగలరు.. లాస్‌ ఏంజెల్స్‌ను చేయనివ్వండి.. శాన్‌ డియాగోను చేయనివ్వండి” అనే అర్థం వచ్చేలా వ్యాఖ్యలు చేశారు. ఈ వ్యాఖ్యల పూర్తి ఉద్దేశం ఏమిటన్నది మాత్రం స్పష్టంగా తెలియలేదు. అయితే సభలోని కొంతమంది నుంచి చప్పట్లు రావడం, ఆ తర్వాత కాలిఫోర్నియా నేతలు తీవ్రంగా స్పందించడంతో ఈ వ్యవహారం రాజకీయ దుమారంగా మారింది.

అసలు ట్రంప్‌ ఏం అన్నారు?

ఇరాన్‌ యుద్ధం కారణంగా అమెరికాలో పెరుగుతున్న ఇంధన ధరలు, ఆర్థిక ఒత్తిడి గురించి ట్రంప్‌ మాట్లాడుతున్నారు. ప్రపంచాన్ని, అమెరికాను సురక్షితంగా ఉంచేందుకు ఈ పరిస్థితి ఒక చిన్న మూల్యం చెల్లించాల్సిన అవసరమని ఆయన అన్నారు. ఆ తర్వాతే లాస్‌ ఏంజెల్స్‌, శాన్‌ డియాగో నగరాల పేర్లు ప్రస్తావించారు. “వాళ్లు ఒక నగరాన్ని ధ్వంసం చేయగలరు. లాస్‌ ఏంజెల్స్‌ లేదా.... శాన్‌ డియాగోను ధ్వంసం చేయగలరు” అనే వ్యాఖ్యలు చేశారు. అనంతరం యుద్ధం త్వరలోనే ముగుస్తుందని కూడా చెప్పారు. అయితే ఈ మాటలను ట్రంప్‌ నిజంగా ఇరాన్‌ దాడిని అంగీకరించే ఉద్దేశంతో అన్నారా, లేక ఇరాన్‌కు అలాంటి సామర్థ్యం వస్తే అమెరికాకు ఎదురయ్యే ప్రమాదాన్ని ఉదాహరణగా చెప్పారా అన్నదానిపై స్పష్టత లేదు. అమెరికా అధ్యక్షుడి వ్యాఖ్యలు ఇదే కారణంగా మరింత చర్చకు దారితీశాయి.

కాలిఫోర్నియా గవర్నర్‌ తీవ్ర స్పందన

ట్రంప్‌ వ్యాఖ్యలపై కాలిఫోర్నియా గవర్నర్‌ గావిన్‌ న్యూసమ్‌ తీవ్రంగా స్పందించారు. ట్రంప్‌ వ్యాఖ్యలను ఆయన “ప్రమాదకరమైనవి” అంటూ విమర్శించారు. రెండు ప్రధాన నగరాల్లో 10 మిలియన్లకు పైగా ప్రజలు నివసిస్తున్న విషయాన్ని ప్రస్తావిస్తూ.. వారి ప్రాణాలను ఏ పరిస్థితుల్లోనూ చిన్న మూల్యంగా చూడలేమని అన్నారు. లాస్‌ ఏంజెల్స్‌ మేయర్‌ కరెన్‌ బాస్‌ కూడా ట్రంప్‌ వ్యాఖ్యలను తప్పుబట్టారు. ఒక దేశ అధ్యక్షుడి బాధ్యత ప్రజలను రక్షించడం కానీ, అమెరికన్‌ పౌరులపై దాడులను ప్రోత్సహించేలా మాట్లాడటం కాదని ఆమె వ్యాఖ్యానించారు. శాన్‌ డియాగో మేయర్‌ టాడ్‌ గ్లోరియా స్పందిస్తూ.. తమ నగరం “కొలేటరల్‌ డ్యామేజ్‌” కాదని, తమ ప్రజలు త్యాగం చేయాల్సిన చిన్న మూల్యం కాదని స్పష్టం చేశారు. ట్రంప్‌ తన “నిర్లక్ష్యపూరిత యుద్ధ వ్యాఖ్యల” నుంచి శాన్‌ డియాగోను దూరంగా ఉంచాలని కోరారు.

ఎందుకు ఈ రెండు నగరాలే?

లాస్‌ ఏంజెల్స్‌, శాన్‌ డియాగో సాధారణ అమెరికన్‌ నగరాలు మాత్రమే కావు. అమెరికాలో జనాభా పరంగా లాస్‌ ఏంజెల్స్‌ రెండో అతిపెద్ద నగరం. శాన్‌ డియాగో ఎనిమిదో అతిపెద్ద నగరంగా ఉంది. శాన్‌ డియాగోకు సైనికంగా కూడా ఎంతో ప్రాధాన్యత ఉంది. అక్కడ అమెరికా నేవీకి చెందిన నేవల్‌ బేస్‌ శాన్‌ డియాగో ఉంది. ఇది అమెరికా నేవీ పసిఫిక్‌ ఫ్లీట్‌కు కీలక స్థావరం. అలాగే కొరోనాడోలోని నేవల్‌ యాంఫిబియస్‌ బేస్‌, సమీపంలోని క్యాంప్‌ పెండిల్‌టన్‌ వంటి కీలక సైనిక ప్రాంతాలు ఉన్నాయి. క్యాంప్‌ పెండిల్‌టన్‌లో సుమారు 70,000 మంది సైనికులు, పౌరులు పనిచేస్తున్నారు. లాస్‌ ఏంజెల్స్‌ కూడా వ్యూహాత్మకంగా ముఖ్యమైన ప్రాంతమే. అక్కడ అమెరికా స్పేస్‌ ఫోర్స్‌కు చెందిన స్పేస్‌ సిస్టమ్స్‌ కమాండ్‌ ప్రధాన కార్యాలయం ఉంది. అందువల్ల ఈ రెండు నగరాల పేర్లు ట్రంప్‌ వ్యాఖ్యల్లో రావడం మరింత ఆసక్తిని కలిగించింది.

ట్రంప్‌–న్యూసమ్‌ మధ్య పాత విభేదాలు

ట్రంప్‌, న్యూసమ్‌ మధ్య రాజకీయ విభేదాలు కొత్తవి కావు. గతంలో కాలిఫోర్నియాలో వలసలపై జరిగిన నిరసనలు హింసాత్మకంగా మారిన సమయంలో నేషనల్‌ గార్డ్‌, ఇతర సైనిక బలగాల వినియోగంపై ఇద్దరి మధ్య తీవ్ర వివాదం జరిగింది. ట్రంప్‌ న్యూసమ్‌పై విమర్శలు చేయగా, న్యూసమ్‌ దాన్ని అధికార దుర్వినియోగంగా అభివర్ణించారు. ఇటీవల కూడా ఇద్దరి మధ్య మాటల యుద్ధం కొనసాగుతోంది. ఇప్పుడు ఇరాన్‌ యుద్ధం నేపథ్యంలో లాస్‌ ఏంజెల్స్‌, శాన్‌ డియాగో పేర్లను ట్రంప్‌ ప్రస్తావించడం ఆ పాత రాజకీయ విభేదాలకు మరో కోణాన్ని జోడించింది.

ఇరాన్‌ నిజంగా అమెరికా నగరాలపై దాడి చేయగలదా?

ఇక్కడ మరో ముఖ్యమైన ప్రశ్న కూడా తెరపైకి వచ్చింది. ట్రంప్‌ వ్యాఖ్యలు రాజకీయంగా ఎంతటి ప్రకంపనలు సృష్టించినా, ఇరాన్‌కు ప్రస్తుతం అమెరికా ప్రధాన భూభాగంపై నేరుగా క్షిపణి దాడి చేసే సామర్థ్యం ఉందా అన్నది వేరే అంశం. తాజా నివేదికల్లో అమెరికా రక్షణ అధికారులు ఇరాన్‌కు అమెరికా మెయిన్‌ల్యాండ్‌పై నేరుగా దాడి చేసే సామర్థ్యం ప్రస్తుతం లేదని పేర్కొన్నట్లు వెల్లడైంది. అందుకే ట్రంప్‌ వ్యాఖ్యలను ఒకవైపు రాజకీయ ప్రకటనగా, మరోవైపు ఇరాన్‌ నుంచి అమెరికాకు ఎదురయ్యే సంభావ్య ప్రమాదంపై చేసిన వ్యాఖ్యగా విశ్లేషిస్తున్నారు. వైట్‌హౌస్‌ కూడా తరువాత ఈ వ్యాఖ్యలపై వివరణ ఇస్తూ, ట్రంప్‌ అమెరికా నగరాలపై దాడులను కోరలేదని, ఇరాన్‌కు అలాంటి సామర్థ్యం రాకుండా అడ్డుకోవాల్సిన అవసరాన్ని ఆయన చెబుతున్నారని స్పష్టం చేసింది.

అయితే మాటలు ఏ ఉద్దేశంతో చెప్పినా.. అమెరికాలోని రెండు ప్రముఖ నగరాల పేర్లు ప్రస్తావించడంతో ఈ వ్యాఖ్యలు ఇప్పుడు అంతర్జాతీయంగా చర్చనీయాంశమయ్యాయి. ముఖ్యంగా మధ్యంతర ఎన్నికలకు ముందు జరిగిన ప్రచార సభలో ఈ వ్యాఖ్యలు రావడం అమెరికా రాజకీయాల్లో దీనికి మరింత ప్రాధాన్యతను తెచ్చింది.