Trump AI Chip Exports to China: స్పై వివాదంలోనూ వెనక్కి తగ్గని ట్రంప్...చైనాకు 8.79 లక్షల చిప్స్ ఎగుమతికి గ్రీన్ సిగ్నల్
చైనా కంపెనీలకు 8.79 లక్షల ఎన్విడియా, ఏఎండీ ఏఐ చిప్స్ ఎగుమతికి ట్రంప్ ప్రభుత్వం అనుమతులు ఇచ్చింది. జెన్సన్ హువాంగ్పై వివాదం, చైనా గూఢచర్య ఆరోపణల నేపథ్యంలో ఈ నిర్ణయం అంతర్జాతీయంగా చర్చనీయాంశమైంది.
Trump AI Chip Exports to China: అమెరికా, చైనా మధ్య సాంకేతిక ఆధిపత్య పోరు మరోసారి అంతర్జాతీయ చర్చకు దారితీసింది. చైనా సైనిక సామర్థ్యాన్ని పెంచే అవకాశం ఉందన్న ఆందోళనలతో గతంలో ఏఐ చిప్స్ ఎగుమతులపై ఆంక్షలు విధించిన అమెరికా.. ఇప్పుడు అదే చైనాకు భారీ స్థాయిలో అత్యాధునిక చిప్స్ పంపేందుకు అనుమతులు ఇచ్చినట్లు వెల్లడైంది. ఎన్విడియా (Nvidia), ఏఎండీ (AMD) సంస్థలు తయారు చేసిన మొత్తం 8,79,000 ఏఐ చిప్స్ ఎగుమతికి డొనాల్డ్ ట్రంప్ ప్రభుత్వం లైసెన్సులు మంజూరు చేసిందని అమెరికా ప్రతినిధుల సభ విదేశీ వ్యవహారాల కమిటీ వెల్లడించింది. ఈ వ్యవహారం వెలుగులోకి రావడంతో అమెరికా సాంకేతిక భద్రత, చైనా గూఢచర్య ఆరోపణలు మరోసారి చర్చనీయాంశమయ్యాయి.
3.4 మిలియన్ చిప్స్ కోసం దరఖాస్తులు
అమెరికా హౌస్ ఫారిన్ అఫైర్స్ కమిటీ వెల్లడించిన వివరాల ప్రకారం.. 2025 డిసెంబర్ నుంచి 2026 మే మధ్య కాలంలో చైనాకు 8,79,000 అధునాతన ఏఐ చిప్స్ ఎగుమతి చేసేందుకు వాణిజ్య శాఖ అనుమతులు ఇచ్చింది. అయితే ఈ కాలంలో వివిధ కంపెనీలు ఏకంగా 34 లక్షల చిప్స్ ఎగుమతికి అనుమతి కోరడం గమనార్హం. చైనా టెక్నాలజీ దిగ్గజాలకు కూడా ఈ అనుమతుల్లో వాటా దక్కింది. అలీబాబాకు 75,000, టెన్సెంట్కు 1,50,000, బైడూకు 43,000, బీవైడీకి 4,000 చిప్స్ ఎగుమతి చేసేందుకు అనుమతులు లభించినట్లు కమిటీ తెలిపింది. అయితే లైసెన్సులు మంజూరైనంత మాత్రాన ఆ చిప్స్ అన్నీ చైనాకు చేరినట్లు కాదని, వాస్తవంగా ఎన్ని రవాణా అయ్యాయన్నది ఇంకా స్పష్టంగా తెలియాల్సి ఉంది.
జెన్సన్ హువాంగ్ వివాదం వేళ వివరాల వెల్లడి
మాజీ ఎన్విడియా సీఈఓ జెన్సన్ హువాంగ్కు సంబంధించినట్లు ప్రచారంలో ఉన్న వ్యక్తిగత సంబంధాల వివాదం, ఆలిస్ హువాంగ్ అనే మహిళపై చైనా గూఢచారి అనుమానాలు ఈ వ్యవహారానికి మరింత ప్రాధాన్యత తీసుకొచ్చాయి. ఈ ఆరోపణలు స్వతంత్రంగా నిర్ధారణ కాలేదు. ఈ నేపథ్యంలోనే చిప్స్ ఎగుమతి లైసెన్సుల వివరాలను కమిటీ బహిర్గతం చేసింది. కమిటీ ఛైర్మన్ బ్రయాన్ మాస్ట్ ఎగుమతి నియంత్రణ సంస్కరణల చట్టం కింద తనకు ఉన్న అధికారాలను ఉపయోగించి ఎన్విడియా, ఏఎండీ దరఖాస్తుల వివరాలను ప్రజల ముందుకు తీసుకొచ్చారు. కమిటీ నివేదికలో ప్రస్తావించిన నాలుగు చైనా సంస్థలను పెంటగాన్ చైనా సైన్యానికి మద్దతు ఇచ్చే సంస్థలుగా గుర్తించినట్లు కూడా సమాచారం. దీంతో వాణిజ్య అనుమతులు, జాతీయ భద్రత మధ్య ఉన్న సంబంధంపై ప్రశ్నలు తలెత్తుతున్నాయి.
హెచ్200, ఎంఐ325ఎక్స్ చిప్స్కు అనుమతి
ఈ ఎగుమతుల్లో ఎన్విడియాకు చెందిన హెచ్200 (H200), ఏఎండీ తయారు చేసిన ఎంఐ325ఎక్స్ (MI325X) చిప్స్ ఉన్నాయి. ఇవి అత్యాధునిక ఏఐ మోడళ్లకు శిక్షణ ఇవ్వడం, భారీ స్థాయిలో డేటాను విశ్లేషించడం వంటి పనులకు ఉపయోగపడతాయి. అయితే చైనాకు చిప్స్ ఎగుమతి చేసేందుకు అనుమతులు ఇచ్చినప్పటికీ కఠినమైన నిబంధనలు, పరిమితులు విధించినట్లు ఎన్విడియా వెల్లడించింది. కొన్ని లైసెన్సులు పొందినప్పటికీ చైనాకు హెచ్200 చిప్స్ రవాణాను నిలిపివేసినట్లు కంపెనీ తెలిపింది. ఈ నివేదికపై ఏఎండీ మాత్రం ఇంకా స్పందించలేదు.
బైడెన్ ఆంక్షలు.. ట్రంప్ సడలింపులు
అమెరికా, చైనా మధ్య సాంకేతిక పోరుకు ప్రధాన కారణం ఏఐ రంగంలో ఆధిపత్యం. అత్యాధునిక చిప్స్ అందుబాటులో ఉంటే చైనా తన సైనిక, నిఘా, సాంకేతిక సామర్థ్యాలను మరింత పెంచుకునే అవకాశం ఉందని అమెరికా భావిస్తోంది. ఈ కారణంతోనే జో బైడెన్ ప్రభుత్వం చైనాకు ఏఐ చిప్స్ ఎగుమతులపై కఠిన ఆంక్షలు విధించింది. అయితే తిరిగి అధికారంలోకి వచ్చిన ట్రంప్ ప్రభుత్వం గత డిసెంబర్లో ఆ విధానాన్ని మార్చి ఎన్విడియా హెచ్200 చిప్స్ ఎగుమతికి అనుమతించింది. ఇప్పుడు బయటపడిన గణాంకాలు ఈ విధాన మార్పుపై మరోసారి ప్రశ్నలు లేవనెత్తుతున్నాయి.
లుట్నిక్ పదవికి ఎసరు?
మరోవైపు ఈ చిప్స్ వ్యవహారం ట్రంప్ ప్రభుత్వంలోని కీలక అధికారులపైనా ప్రభావం చూపుతోంది. అమెరికా వాణిజ్య మంత్రి హోవార్డ్ లుట్నిక్ పదవిపై వైట్హౌస్లో చర్చలు జరుగుతున్నట్లు రాయిటర్స్ గతవారం కథనం ప్రచురించింది. చైనా కంపెనీలను అమెరికా వాణిజ్య బ్లాక్లిస్ట్లో చేర్చే విషయంలో జాప్యం చేయడం, ఎన్విడియా చిప్స్ ఎగుమతుల పర్యవేక్షణలో లోపాలపై ఆయనను చట్టసభ సభ్యులు ప్రశ్నిస్తున్నట్లు సమాచారం. అయితే లుట్నిక్కు ట్రంప్ మద్దతుగా నిలిచారు. వివాదం కొనసాగుతున్నప్పటికీ వాణిజ్య మంత్రికి వైట్హౌస్ అండగా ఉంటుందని ప్రకటించింది. చైనాకు అత్యాధునిక చిప్స్ అక్రమంగా తరలిపోతున్నాయన్న నివేదికలపై చర్యలు తీసుకోవడంలో జాప్యం జరిగిందన్న ఆరోపణలు కూడా ఈ వివాదాన్ని మరింత పెంచాయి.




